Lao ICT EXPO 2016 ຄັ້ງທໍາອິດຂອງປະເທດລາວທີ່ ຫໍປະຊຸມແຫ່ງຊາດ ຫຼັກ6

     

       ໃນ​ຕອນ​ບ່າຍ​ຂອງ​ວັນ​ທີ 09 ພະຈິກ 2016 ທີ່​ຜ່ານ​ມາ​ທາງ ກະຊວງ ​ໄປສະນີ ​ໂທລະ​ຄົມມະນາຄົມ ​ແລະ ການ​ສື່ສານ ​ໄດ້​ຈັດ​ງານ​ຖະ​ແຫຼງຂ່າວ​ກ່ຽວກັບ​ການ​ວາງສະ​ແດງ “Lao ICT EXPO 2016” ຂຶ້ນທີ່​ໂຮງ​ແຮມ​ແລນ​ມາກ, ​ເປັນກຽດຖະ​ແຫຼງຂ່າວ​ໂດຍ ທ່ານ ດຣ ທັນ​ສະ​ໄໝ ກົມມະ​ສິດ ລັດຖະມົນຕີ ກະຊວງ ​ໄປສະນີ ​ໂທລະ​ຄົມມະນາຄົມ ​ແລະ ການ​ສື່ສານ, ພ້ອມ​ດ້ວຍ​ແຂກ​ທີ່​ຖືກ​ເຊີນ​ເຂົ້າຮ່ວມ​ຈາກ​ບັນດາ​ກະຊວງ​ຕ່າງໆ, ສະ​ຖາ​ບັນ​ການ​ສຶກສາ ​ແລະ ບໍລິສັດ​ຕ່າງໆ​ເຂົ້າຮ່ວມ.

      ​ເພື່ອ​ປະ​ຕິ​ບັດ​ຕາມ​ພາລະ​ບົດບາດ​ໃນ​ການ​ຄຸ້ມ​ຄອງ​ວຽກງ​ານດ້ານ​ເຕັກ​ໂນ​ໂລ​ຊີ​ສື່ສານ-ຂໍ້​ມູນ​ຂ່າວສານ ທາງ​ກະຊວງ​ດັ່ງກ່າວ​ຈຶ່ງ​ໄດ້​ຈັດ​ງານ Lao ICT EXPO 2016 ຂຶ້ນ​ເປັນຄັ້ງທໍາ​ອິດ​ຂອງ ສປປ ລາວ. ງານ​ດັ່ງກ່າວ​ຈະ​ໄດ້​ຂຶ້ນ​ໃນ​ລະຫວ່າງ​ວັນ​ທີ 14-18 ທັນວາ 2016 ທີ່​ຫໍ​ປະຊຸມ​ແຫ່ງ​ຊາດ ຫຼັກ6. ຈຸ​ດປະສົງ​ແມ່ນ​ເພື່ອ​ສົ່ງ​ເສີມ​ໃຫ້​ທາງ​ພາກ​ລັດ ​ແລະ ​ເອກະ​ຊົນ​ທີ່​ປະກອບ​ການ​ທາງ​ດ້ານ​ໄອ​ຊີ​ທີ ​ແລະ ​ໂທລະ​ຄົມມະນາຄົມ ​ໄດ້​ມີ​ໂອກາດ​ສະ​ແດງ​ຜະລິດ​ຕະພັນ​ຂອງ​ຕົນ. ນອກ​ນັ້ນ, ກໍ​ເພື່ອ​ແລກປ່ຽນຂໍ້​ມູນ​ຂ່າວສານ, ປະສົບ​ການ​ໃນ​ການ​ພັດທະນາ​ຂະ​ແໜງການ​ໄອ​ຊີ​ທີ ພ້ອມ​ທັງ​ເປັນ​ເວທີ​ໃຫ້​ຄວາມ​ຮູ້​ແກ່​ນັກຮຽນ-ນັກ​ສຶກສາ ​ໂດຍ​ຜ່ານ​ກອງ​ປະຊຸມ​ສໍາ​ມະ​ນາ ​ແລະ ງານ​ເຝິກ​ອົບຮົມ​ຕ່າງໆ.