JDB ເປີດໜ່ວຍບໍລິການ ປແຂວງ ອັດຕະປື ແລະ ແຂວງ ເຊກອງ

ອີກ​ບາດກ້າວ​ການ​ຂະຫຍາຍໜ່ວຍ​ບໍລິການ ​ຂອງ​ທະນາຄານຮ່ວມ​ພັດທະນາ (JDB) ໃນ​ການເປີດ​ໜ່ວຍ​ບໍລິການ​ໃໝ່ ເຊິ່ງ​ແມ່ນໜຶ່ງ​ໃນ​ແຜນການ​ຂະຫຍາຍ​ເຄືອຂ່າຍ​ບໍລິການ​ ໃຫ້​ເຂົ້າ​ເຖິງ​ລູກ​ຄ້າຫຼາຍ​ຂຶ້ນ ແລະ ເນັ້ນ​ການ​ເປີດໂຕ​ຢ່າງ​ເປັນ​ທາງ​ການ ​ເພື່ອ​ໃຫ້​ລູກຄ້າ​ຮູ້ຈັກ​ກັບ JDB ຫຼາຍ​ຂຶ້ນ.

ການ​ເປີດ​ໜ່ວຍ​ບໍລິການ​ອັດຕະ​ປື ທີ່​ແຂວງ​ອັດ​ຕະ​ປຶຢ່າງ​ເປັນທາງ​ການ​ ແມ່ນ​ໄດ້​ຈັດ​ຂຶ້ນໃນ​ວັນທີ 28 ພຶດສະພາ 2015 ນີ້ ໂດຍເປັນ​ກຽດ​ເຂົ້າ​ຮ່ວມ​ຂອງ​ທ່ານ ​ດຣ. ນາມ ວິ​ຍະ​ເກດ ເຈົ້າແຂວງອັດ​ຕະ​ປື ມີ​ອຳນາດ​ການ​ປົກຄອງເມືອງ ນັກທຸລະກິດ ແລະ ຊາວຄ້າຂາຍ​ເຂົ້າ​ຮ່ວມ ພີ​ທີ​ເປີດ​ໜ່ວຍບໍລິການເຊ​ກອງ ແຂວງ​ເຊ​ກອງ ໄດ້​ຈັດ​ຂຶ້ນ​ໃນ​ວັນ​ທີ 29 ພຶດ​ສະພາ 2015 ທີ່​ຜ່ານ​ມາ ໂດຍ​ການເຂົ້າ​ຮ່ວມ​ຂອງ​ທ່ານ ພອນ​ເພັດ ຄິວ​ລາ​ວົງ ຮອງ​ເຈົ້າແຂວງ​ເຊກອງ ພ້ອມ​ດ້ວຍ​ທ່ານ ນະຈັນ ຕະ​ລີ​ວົງ ຫົວໜ້າ​ທະນາຄານແຫ່ງ ​ສປປ ລາວ ປະຈຳ​ພາກ​ໃຕ້.

ທ່ານ ສູນ​ທອນ ຈັນທະ​ວົງ ຜູ້ອຳນວຍການ​ໃຫຍ່ ທະນາຄານຮ່ວມ​ພັດທະນາ ໄດ້​ກ່າວ​ວ່າ: ການ​ເປີດ​ໜ່ວຍ​ບໍລິການ​ຂອງ​ທະນາ​ຄານ​ຮ່ວມ​ພັດທະນາ ໃນ​ໄລຍະ​ທີ່​ຜ່ານ​ມາ​ນັ້ນ ນັບ​ວ່າ​ປະສົບຜົນສຳເລັດ​ເປັນ​ຢ່າງ​ດີ ທີ່​ໄດ້​ຮັບການ​ຊ່ວຍເຫຼືອ ແລະ ໄວ້​ວາງໃຈຈາກ​ພາກ​ລັດ ເອກະ​ຊົນ ແລະ ໄດ້​ຮັບ​ຄວາມ​ເຊື່ອ​ໝັ້ນ​ຈາກ​ລູກຄ້າ​ດ້ວຍ​ດີ​ຕະຫຼອດ​ມາ ການ​ເປີດໜ່ວຍ​ບໍລິການ​ທີ່​ແຂວງ​ອັດ​ຕະ​ປື ແລະ ແຂວງ​ເຊ​ກອງ​ໃນ​ຄັ້ງ​ນີ້ ກໍ່ແມ່ນ​ແຜນການ​ຕໍ່​ຍອດ​ບໍລິການໃຫ້​ເຂົ້າ​ເຖິງ​ລູກ​ຄ້າ ແລະ ອຳນວຍ​ຄວາມ​ສະດວກ​ສະບາຍ​ໃຫ້ລູກ​ຄ້າ​ທີ່ຢູ່​ແຂວງ​ດັ່ງກ່າວ ​ໃນ​ການ​ເຮັດ​ທຸລະ​ກຳ​ການ​ເງິນ​ໃຫ້​ມີ​ທາງເລືອກ​ຫຼາຍ​ຂຶ້ນ ໃນ​ໂອກາດ​ເປີດໜ່ວຍ​ບໍລິການ​ສອງ​ແຫ່ງ​ນີ້ ທະນາ​ຄານ​ຮ່ວມ​ພັດທະນາ​ຍັງ​ປະກອບ​ສ່ວນ​ອຸປະຖຳ​ຊ່ວຍເຫຼືອ​ ໃນການ​ກໍ່ສ້າງ​ໂຮງຮຽນ​ຫ່າງ​ໄກສອກຫຼີກ ທີ່​ແຂວງ​ອັດ​ຕະ​ປື ມູນຄ່າ 50 ລ້ານ​ກີບ ແລະ ໂຮງຮຽນ​ຫ່າງ​ໄກ​ສອກຫຼີກ ທີ່​ແຂວງເຊ​ກອງ ມູນ​ຄ່າ 50 ລ້ານ​ກີບ ໂດຍ​ໃຫ້​ກຽດ​ມອບ​ໂດຍ​ທ່ານ ເອກະ​ພັນ ພະ​ພິ​ທັກ ປະທານ​ສະພາ​ບໍລິຫານ​ທະນາຄານ​ຮ່ວມພັດທະນາ ຮັບ​ໂດຍ​ທ່ານ ​ດຣ. ນາມ ວິ​ຍະ​ເກດ ເຈົ້າແຂວງ​ອັດຕະ​ປື ແລະ ທ່ານ ພອນ​ເພັດ ຄິວລາ​ວົງ ຮອງ​ເຈົ້າແຂວງ​ເຊ​ກອງ.

ໃນ​ຄ່ຳ​ຄືນວັນ​ທີ 28 ແລະ 29 ພຶດສະພາ 2015 ທະນາຄານຮ່ວມ​ພັດທະນາ ໄດ້​ຈັດ​ງານ​ລ້ຽງພິທີ​ເປີດ​ໜ່ວຍ​ບໍລິການ​ອັດ​ຕະ​ປື ແລະ ເຊ​ກອງ ຢ່າງ​ເປັນ​ທາງ​ການ ແລະ​ ໄດ້​ທຳ​ການ​ຈັບ​ສະຫຼາກ ເພື່ອ​ມອບ​ໂຊກ​ໃຫ້​ລູກ​ຄ້າ ລວມມູນ​ຄ່າ 50 ລ້ານ​ກວ່າ​ກີບ.

ສຳນັກງານ​ໃຫຍ່ ທະນາຄານຮ່ວມ​ພັດທະນາ ຕັ້ງ​ຢູ່​ຖະໜົນລ້ານ​ຊ້າງ ເລກ​ທີ 82 ນະຄອນຫຼວງ​ວຽງ​ຈັນ ປັດຈຸບັນ​ທະ​ນາຄານ​ຮ່ວມ​ພັດທະນາ ກຳລັງ​ສ້າງ ແລະ ຂະຫຍາຍ​ໜ່ວຍ​ບໍລິການແລ້ວ 25 ໜ່ວຍ ເຊິ່ງ​ຕັ້ງ​ຢູ່ທາດຫຼວງ ຫຼວງ​ພະ​ບາງ ສີ​ໄຄ ວັງ​ວຽງ ປາກ​ເຊ ທ່າ​ແຂກ ສະຫວັນ​ນະເຂດ ປາກ​ຊັນ ຕົ້ນ​ເຜີ້ງ (ບໍ່​ແກ້ວ) ຫ້ວຍ​ຊາຍ ໄຊ​ຍະ​ບູ​ລີ ອຸດົມ​ໄຊ ຫຼວງ​ນ້ຳ​ທາ ເຊ​ໂນ ລາວ​ບາວ ບູດ​ສະຫວັນ​ເວ​ກັດ ຊຳ​ເໜືອ ຊຽງຂວາງ ດົງ​ໂດກ ຊ້າງ​ຄູ້ ໜອງໜ້ຽວ ສາລະ​ວັນ ອັດ​ຕະ​ປື ເຊກອງ ສອງ​ຄອນ ແລະ ບັນດາ​ຕົວເມືອງ​ໃຫຍ່ຕື່ມ​ອີກ ​ໃນ​ຂອບ​ເຂດທົ່ວ​ປະເທດ ເຊິ່ງ​ມີ​ແຜນ​ສືບຕໍ່ເປີດ​ໜ່ວຍ​ບໍລິການ​ຢ່າງ​ເປັນ​ທາງການ ​ຢູ່​ທາງ​ພາກ​ໃຕ້​ຕື່ມ​ອີກ​ໄວໆນີ້ ເຊັ່ນ: ໜ່ວຍ​ບໍລິການສອງຄອນ ແລະ ໜ່ວຍ​ບໍລິການສາລະ​ວັນ.

---------------------------------------

ທີ່ມາ Vientiane Mai Online

ບົດຄວາມໃຫມ່ໆ