ASEAN SUMMITS ເປີດສາກໃຕ້ຄຳຂວັນ ຫັນວິໄສທັດໃຫ້ເປັນຮູບປະທຳ

ກອງປະຊຸມສຸດຍອດອາຊຽນ ຄັ້ງທີ 28 ແລະ 29 ແລະບັນດາກອງປະຊຸມສຸດຍອດທີ່ກ່ຽວຂ້ອງ ໄດ້ໄຂຂຶ້ນຢ່າງເປັນທາງການໃນຕອນບ່າຍຂອງວັນທີ 6 ກັນຍາ 2016 ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນ. ທ່ານ ບຸນຍັງ ວໍລະຈິດ ປະທານປະເທດແຫ່ງ ສປປ ລາວ ໄດ້ກ່າວໃນສູນທອນພົດໃນພິທີເປີດງານຄັ້ງນີ້ວ່າ ສປປ ລາວ ຮູ້ສຶກເປັນກຽດຢ່າງສູງ ແລະພາກພູມໃຈຢ່າງຍິ່ງທີ່ໄດ້ຮັບກຽດເປັນປະທານຈັດກອງປະຊຸມສຸດຍອດອາຊຽນ ຄັ້ງທີສອງ ພາຍໃຕ້ຄຳຂວັນ ຫັນວິໄສທັດໃຫ້ເປັນຮູບປະທຳ ເພື່ອຄວາມເຂັ້ມແຂງຂອງປະຊາຄົມອາຊຽນ ໃນປີ 2016ນີ້ ເຊິ່ງເປັນປີແຫ່ງການເລີ່ມຕົ້ນສັງກາດໃໝ່ແຫ່ງການເປັນປະຊາຄົມອາຊຽນ ແລະການຈັດຕັ້ງປະຕິບັດວິໄສທັດປະຊາຄົມອາຊຽນ 2025. ນອກຈາກນັ້ນ, ພະນະທ່ານຍັງຍົກໃຫ້ເຫັນເຖິງຜົນສຳເລັດຊອງອາຊຽນ ໃນໄລຍະ 5 ທົດສະວັດທີ່ຜ່ານມາ ໂດຍສະເພາະແມ່ນການປະກາດສ້າງຕັ້ງສະມາຄົມເສດຖະກິດອາຊຽນ ( AEC) ແລະເນັ້ນໜັກເຖິງຄວາມສຳຄັນໃນການສືບຕໍ່ຮ່ວມມືກັນພາຍໃນອາຊຽນ ແລະລະຫວ່າງຄູ່ຮ່ວມມື ເພື່ອສົ່ງເສີມ ແລະຮັດແໜ້ນປະຊາຄົມອາຊຽນໃຫ້ເຂັ້ມແຂງ ແລະຈະເລີນກ່າວໜ້າຕາມວິຖີທາງອາຊຽນ ກໍຄືຫຼັກການອາຊຽນ ພ້ອມດຽວກັນນັ້ນ ກໍເປັນການປະກອບສ່ວນເຂົ້າໃນພາລະກິດແຫ່ງການປົກປັກຮັກສາ ແລະສົ່ງເສີມສັນຕິພາບດ ສະຖຽນລະພາບ ແລະການຮ່ວມມືເພື່ອການພັດທະນາພາກພື້ນ ແລະໃນໂລກ. ສປປ ລາວ ໄດ້ຮັບກຽດເປັນປະທານອາຊຽນຄັ້ງທີສອງ ຫຼັງຈາກຄັ້ງທຳອິດເມື່ອປີ 2004-2005. ຂ່າວ ແລະພາບ: ມິດປະຊາ

ບົດຄວາມໃຫມ່ໆ