9 ອາຫານທີ່ແມ່ຍິງຖືພາຄວນຮັບປະທານ

ເປັນທີ່ຮູ້ກັນດີວ່າ ອາຫານທີ່ແມ່ຍິງຖືພາ ຮັບປະທານເຂົ້າໄປຍ່ອມສົ່ງຜົນຕໍ່ລູກໃນທ້ອງ ດັ່ງນັ້ນການເລືອກຮັບປະທານອາຫານສໍາລັບແມ່ຍິງຖືພາຈຶ່ງເປັນທາງເລືອກທີ່ດີທີ່ສຸດ ທີ່ຈະເຮັດໃຫ້ສຸຂະພາບຂອງລູກນ້ອຍໃນທ້ອງແຂງແຮງ ສໍາລັບອາຫານທີ່ມີປະໂຫຍດ ຕໍ່ລູກໃນທ້ອງ ມີໃຫ້ເລືອກກັນຫລາກຫລາຍຢ່າງທີ່ຫາມາຮັບປະທານງ່າຍ ແລະ ມີຄຸນຄ່າທາງດ້ານໂຄສະນາການສູງ ແລະ ເປັນປະໂຫຍດ ຕໍ່ລູກນ້ອຍ ແລະ ແມ່ກໍາລັງຖືພາ ທີ່ສຸດ ມີ 9 ຢ່າງດັ່ງຕໍ່ໄປນີ້

1.ມັນເທດ ຈັດຢູ່ໃນອາຫານປະເພດທີ່ມີຄາໂບໄຮເດດຊຶ່ງໃຫ້ພະລັງງານກັບແມ່ຍິງຖືພາໄດ້ເປັນຢ່າງດີ ອີກທັງມັນເທດມີລົດຊາດແຊບ ຫວານ ມັນ...ມັນເທດຍັງເປັນພຶດທີ່ໃຫ້ຄຸນຄ່າທາງອາຫານສູງມາກອີກດ້ວຍ ເພາະອຸດົມໄປດ້ວຍໄຟເບີໂພແທສຊຽມ ທາດເຫລັກ ວິຕາມິນບີ6 ແລະ ວິຕາມິນຊີ ຄຸນປະໂຫຍດຂອງມັນເທດຕໍ່ລູກນ້ອຍໃນທ້ອງ ຄື ຊ່ວຍໃນເລື່ອງພັດທະນາການຂອງຕາ ກະດູກ ແລະ ຜິວຫນັງ

2.ຊີ້ນສັດທີ່ບໍ່ຕິດມັນ ບໍ່ວ່າຈະເປັນຊີ້ນຫມູ ຊີ້ນໄກ່ ລ້ວນແຕ່ຢູ່ໃນຫມູ້ອາຫານປະເພດໂປຕີນ ຊ່ວຍເສີມສ້າງລະບົບເຊລ ແລະ ເລືອດຂອງລູກໃນທ້ອງໄດ້ເປັນຢ່າງດີ ນອກນີ້ຍັງຊ່ວຍໃນເລື່ອງການພັດທະນາການຂອງກ້າມເນື້ອໄດ້ດີອີກດ້ວຍ ແມ່ຄວນເລືອກຮັບປະທານຊີ້ນສັດທີ່ບໍ່ຕິດມັນ ເພື່ອຫລີກລ້ຽງໄຂມັນທີ່ມາກັບຊີ້ນສັດເພາະເຖິງແມ່ນລົດຊາດຈະບໍ່ແຊບແຕ່ສົ່ງຜົນດີຕໍ່ລູກນ້ອຍໄດ້

3.ປາແຊລມອນ ເພາະມີກົດໄຂມັນດີຄື ໂອເມກ້າ3 ຊຶ່ງຈະສົ່ງຜົນດີຕໍ່ລູກນ້ອຍໃນດ້ານການພັດທະນາລະບົບປະສາດ ແລະ ສະຫມອງ ຢ່າງໃດກໍາຕາມແມ່ຄວນຮັບປະທານປາແຊລມອນທີ່ມາຈາກແຫລ່ງນໍ້າທໍາມະຊາດຫລາຍກ່ວາປາແຊລມອນທີ່ມາຈາກຟາມລ້ຽງເພາະປາແຊລມອນໃນຟາມລ້ຽງຖືກກະຕຸ້ນການຈະເລີນເຕີບໂຕດ້ວຍອາຫານເມັດ ອາດມີສານເຈືອປົນໃນເນື້ອປາ ບໍ່ເຫມາະໃຫ້ແມ່ຍິງຖືພາຮັບປະທານ ກ່ອນການຊື້ຄວນຮູ້ແຫລ່ງທີ່ມາຂອງປາແຊລມອນດ້ວຍ

4.ຜັກໃບຂຽວ ອຸດົມໄປດ້ວຍໄຟເບີ ແຄລຊຽມ ແຮ່ທາດ ວິຕາມິນຕ່າງໆ ຫລາຍຢ່າງ ສານອາຫານໃນຜັກໃບຂຽວຍັງຊ່ວຍເລື່ອງພັດທະນາການຂອງລູກນ້ອຍໃນທ້ອງໄດ້ເປັນຢ່າງດີ ນອກຈາກນີ້ໃນໄຟເບີຍັງຊ່ວຍໃຫ້ການຂັບຖ່າຍຂອງແມ່ເຮັດວຽກໄດ້ດີຂື້ນ ຊ່ວຍຂັບໄຂມັນ ແລະ ສານພິດອອກຈາກລໍາໄສ້ໄດ້ເປັນຢ່າງດີ ຍ່ອມສົ່ງຜົນຕໍ່ລູນ້ອຍໃນທ້ອງດ້ວຍ ຜັກໃບຂຽວທີ່ແມ່ຄວນຮັບປະທານເຊັ່ນ ຜັກໂຂມ ຜັກຄະນ້າ ບັອກໂຄລີ່ ຫນໍ່ໄມ້ຝຣັ່ງ ຜັກຕໍານິນ

5.ໂຢເກັດ ນອກຈາກຈະເປັນອາຫານຫວ່າງທີ່ມີປະໂຫຍດບໍ່ເຮັດໃຫ້ອ້ວນແລ້ວຍັງເປັນອາຫານທີ່ອຸດົມໄປດ້ວຍ ວິຕາມິນບີ ໂປຣຕີນ ແຄລຊຽມ ແລະ ສັງກະສີ ໃນປະລິມານສູງ ໃນໂຢເກັດມີຈຸລິນຊີທີ່ເປັນປະໂຫຍດຕໍ່ຮ່າງກາຍ ດັ່ງນັ້ນ ການຮັບປະທານໂຢເກັດໃນຊ່ວງຕັ້ງທ້ອງຄວນຮັບປະທານໃນປະລິມານທີ່ເຫມາະສົມຈະຊ່ວຍໃຫ້ລູກນ້ອຍໃນທ້ອງມີກະດູກແລະແຂ້ວທີ່ແຂງແຮງ ແລະ ຊ່ວຍຫລຸດຄວາມສ່ຽງການຄອດກ່ອນກໍານົດ ແລະ ຊ່ວຍຄວບຄຸມນໍ້າຫນັກຂອງລູກນ້ອຍໃຫ້ຢູ່ໃນເກນມາດຕະຖານອີກດ້ວຍ

6.ໄຂ່ ຖືເປັນອາຫານທີ່ມີປະໂຫຍດຫລາຍດ້ວຍຄຸນຄ່າ ແລະ ສານອາຫານເມື່ອທຽບກັບລາຄາ ເປັນແຫລ່ງໂປຕີນຊັ້ນດີ ອີກທັງມີໂຟເລດສູງຊຶ່ງເຫມາະກັບການບໍາລຸງແມ່ຍິງຖືພາເປັນຢ່າງຫລາຍ ແມ່ສາມາດເລືອກໄຂມາເຮັດອາຫານບໍາລຸງໄດ້ຫລາກຫລາຍ ເຊັ່ນ ໄຂ່ຕຸ໋ນ ໄຂ່ຕົ້ມ ໄຂ່ດາວ ຢ່າງໃດກໍ່ດີຄວນໃຊ້ວິທີການປະກອບອາຫານປະເທດໄຂ່ທີ່ບໍ່ມີສ່ວນປະສົມຂອງໄຂມັນຫລາຍເກີນໄປ ຫລືໃຊ້ນໍ່າມັນໃນການທອດໄຂ່ທີ່ເປັນໄຂມັນດີ ເຊັ່ນ ນໍ້ມມັນຫມາກກອກ ຫລື ນໍ້າມັນຫມາກພ້າວ ແທນນໍ້າມັນປາມ ສານອາຫານໃນໄຂ່ຍັງສົ່ງຜົນດີຕໍ່ການພັດທະນາດ້ານສາຍຕາ ກະດູກ ແລະ ຜິວພັນຂອງເດັກໃນທ້ອງໄດ້ດີອີກດ້ວຍ

7.ເຂົ້າໂອດ ຖືເປັນພັນພືດທີ່ມີຄຸນຄ່າທາງອາຫານສູງຫລາຍ ອຸດົມໄປດ້ວຍວິຕາມິນບີ6 ໄຟເບີ ແຮ່ທາດຕ່າງໆຫລາກຫລາຍຢ່າງ ຊຶ່ງວິຕາມິນບີ6 ໃນເຂົ້າໂອດຈະຊ່ວຍໃຫ້ລູກມີພັດທະນາການໃນທ້ອງໄດ້ດີຂື້ນ ເຂົ້າໂອດຍັງເປັນພືດພັນທີ່ໃຫ້ພະລັງງານກັບແມ່ໄດ້ເປັນຢ່າງດີ ຈຶ່ງຊ່ວຍໃຫ້ແມ່ຮູ້ສຶກສົດຊື່ນ ມີກໍາລັງເພີ່ມຂື້ນຫລັງຈາກຮັບປະທານ

8.ນໍ້າສົ້ມຄັ້ນ ອຸດົມໄປດ້ວຍວິຕາມິນຊີ ໂຟເລດ ໂພແທສຊຽມ ທີ່ແມ່ດື່ມໃນຂະນະທີ່ຕັ້ງທ້ອງຈະຊ່ວຍຫລຸດຄວາມສ່ຽງຂອງການພິການຂອງລູກໃນທ້ອງ ໂພແທສຊຽມຊ່ວຍພັດທະນາການເຮັດວຽກຂອງກ້າມເນື້ອ ວິຕາມິນຊີຊ່ວຍໃຫ້ຮ່າງກາຍຂອງລູກນ້ອຍດູດຊຶມທາດເຫລັກ ໄດ້ດີຍິ່ງຂື້ນ ອີກທັງຊ່ວຍສ້າງພູມຄຸ້ມກັນໃຫ້ແມ່ບໍ່ເປັນຫວັດງ່າຍ ນອກນີ້ວິຕາມິນຊີຍັງສົ່ງຜົນໃຫ້ແມ່ມີຜິວພັນທີ່ເປັ່ງປັ່ງສົດໃສ ແລະ ສົ່ງຜົນໄປຍັງລູກນ້ອຍດ້ວຍເຊັ່ນກັນ

9.ຖົ່ວ ເປັນແຫລ່ງໂປຣຕີນ ແລະ ແມັກນີຊຽມ ຊຶ່ງແມັກນີຊຽມຈະຊ່ວຍຫລຸດຄວາມສ່ຽງຂອງການຄອດກ່ອນກໍານົດຂອງລູກໃນທ້ອງໄດ້ ຖົ່ວຍັງເປັນອາຫານຫ່ວາງໃຫ້ກັບແມ່ເວລາຢາກກິນຈຸກກິນຈິບ ຖົ່ວໃຫ້ພະລັງງານ ມີຄຸນຄ່າແຕ່ບໍ່ເຮັດໃຫ້ແມ່ອ້ວນ ຫລື ເພີ່ມນໍ້າໜັກໃຫ້ແມ່ ແຖມຮັບປະທານໄດ້ງ່າຍ ແຕ່ຕ້ອງລະວັງຢ່າເລືອກກິນຖົ່ວທີ່ປະສົມເກືອຈົນເຄັມຈັດ ເພາະເກືອໂຊດຽມສູງອາດເຮັດໃຫ້ໂລກກະດູກຜຸ ແລະ ຄວາມດັນສູງແກ່ແມ່ຍິງຖືພາໄດ້

9ອາຫານທີ່ເນາະນໍາມາ ລ້ວນແຕ່ເປັນອາຫານທີ່ຫນ້າຮັບປະທານທັງນັ້ນເລີຍ ຮູ້ຈັກເມນູຕ່າງໆໄປແລ້ວ ອາຫານທີ່ແມ່ຍິງຖືພາກໍ່ບໍ່ແມ່ນເລື່ອງຫຍຸ້ງຍາກສໍາລັບແມ່ອີກຕໍ່ໄປ ທີ່ຕ້ອງກຽມອາຫານແຕ່ລະມື້ ເປັນອາຫານທີ່ຫາງ່າຍ ໃຫ້ປະໂຫຍດຕໍ່ຄວາມສົມບູນ ແຂງແຮງແກ່ແມ ແລະ ບໍາລຸງລູກນ້ອຍໃຫ້ຈະເລີນເຕີບໂຕ ທີ່ຕັ້ງແຕ່ຢູ່ໃນທ້ອງໄດ້ອີກດ້ວຍ.