9 ຈຸດຊົມວິວທີ່ສູງ ແລະ ສວຍງາມໃນເອເຊຍ

   ໃນເມືອງໃຫຍ່ໆແຕ່ລະເມືອງມັກຈະສ້າງສິ່ງທີ່ໂດດເດັ່ນຂຶ້ນມາສະເໝີ ເຊິ່ງສິ່ງທີ່ເຮົາສາມາດເຫັນໄດ້ຊັດເຈນທີ່ສຸດກໍຄືຫໍຄອຍ ແລະ ຕຶກຕ່າງໆ, ໃນເອເຊຍເມືອງທີ່ສຳຄັນຄືໂຕກຽວ ໃຕ້ຫວັນ ຫຼື ສິງກະໂປ ກໍມີຕຶກສູງຊີ້ຟ້າເປີດໃຫ້ນັກທ່ອງທ່ຽວໄດ້ຂຶ້ນໄປຊັ້ນເທິງສຸດເພື່ອເບິ່ງຄວາມງົດງາມຂອງເມືອງນັ້ນໆ ຈາກເທິງຍອດຫໍຄອຍ ຫຼື ຍອດຕຶກ ເຊິ່ງເວັບໄຊ້ escapehere ໄດ້ລວມເອົາ 9 ຫໍຄອຍ ແລະ ຕຶກທີ່ສູງຊີ້ຟ້າໃນແຕ່ລະເມືອງທົ່ວເອເຊຍມາໃຫ້ເຮົາໄດ້ເກັບຂໍ້ມູນ ເພື່ອໃຫ້ເຮົາໄປທ່ອງທ່ຽວປະເທດເພື່ອນບ້ານໃຫ້ຄຸ້ມຄ່າທີ່ສຸດ ຈະມີຫໍຄອຍ ຫຼື ຕຶກໃດແດ່ເຮົາໄປເບິ່ງກັນເລີຍ!!!

1. ຕຶກໄທເປ 101, ໃຕ້ຫວັນ.

   ຕຶກໄທເປ 101 ຕັ້ງຢູ່ກາງເມືອງໄທເປຢ່າງໂດດເດັ່ນ ເປັນເອກະລັກທີ່ສຳຄັນຂອງໃຕ້ຫວັນ ມີຄວາມສູງຢູ່ທີ່ 509 ແມັດ ເປີດໃຫ້ນັກທ່ອງທ່ຽວເຂົ້າຊົມໃນຊັ້ນທີ 89 ແລະ 91 ເຊິ່ງຊັ້ນທີ 89 ຈະຄວາມສູງຢູ່ທີ່ປະມານ 382 ແມັດ ເປັນຈຸດຊົມວິວດ້ານໃນອາຄານ ສາມາດເບິ່ງເຫັນເມືອງໄທເປໄດ້ແບບ 180 ອົງສາ ມີການວາງສະແດງຂອງແບບຈຳລອງຕຶກ ແລະ ເມືອງໄທເປຈັດສະແດງຢູ່ໃນຊັ້ນນີ້ ສ່ວນຊັ້ນທີ 91 ນັ້ນຈະເປັນຈຸດຊົມວິວກາງແຈ້ງທີ່ເປີດໃຫ້ເຂົ້າຊົມໃນໂອກາດພິເສດເທົ່ານັ້ນ ນອກຈາກນີ້ຕຶກໄທເປ 101 ຍັງເປັນສະຖານທີ່ຊອບປິ້ງທີ່ສຳຄັນຂອງໃຕ້ຫວັນອີກດ້ວຍ.

2. ໂຕກຽວສະກາຍທຣີ, ຍີ່ປຸ່ນ.

   ໂຕກຽວສະກາຍທຣີ (Tokyo Skytree) ເວົ້າໄດ້ວ່າເປັນຫໍກະຈາຍຄື້ນວິທະຍຸ ແລະ ໂທລະພາບທີ່ສູງທີ່ສຸດໃນໂລກ ດ້ວຍຄວາມສູງ 634 ແມັດ ໃຜຢາກເບິ່ງເມືອງໂຕກຽວໃນແບບໄກສຸດລູກຫູລູກຕາໄລຍະຫຼາຍກວ່າ 70 ກິໂລແມັດ ໃນມູມ 360 ອົງສາ ກໍຂຶ້ນໄປໄດ້ເລີຍທີ່ຊັ້ນ 350 ເຊິ່ງມີທັງຮ້ານອາຫານ ແລະ ຮ້ານກາເຟໄວ້ຮັບຮອງ ແຕ່ຖ້າຍັງຮູ້ສຶກວ່າຍັງສູງບໍ່ພໍກໍຂຶ້ນໄປທີ່ຊັ້ນ 450 ເຊິ່ງຈະຕ້ອງຂຶ້ນຈາກຊັ້ນ 445 ເພື່ອໄປຍ່າງຢູ່ເທິງຟ້າທີ່ຊັ້ນ 450 ໃຜຢາກຮູ້ວ່າມັນຕື່ນເຕັ້ນ ແລະ ຕື່ນຕາຕື່ນໃຈປານໃດຕ້ອງໄປສຳຜັດດ້ວຍຕົນເອງ.

3. ມາຣີນາ ເບ ແຊນ, ສິງກະໂປ.

   ມາຣີນາ ເບ ແຊນ (Marina Bay Sands) ເປັນອີກໜຶ່ງສະຖາປັດຕະຍະກຳທີ່ໂດດເດັ່ນຂອງເອເຊຍ ດ້ວຍການທີ່ມີໂຄງສ້າງຂອງຕຶກທີ່ສູງຊີ້ຟ້າ ມີອາຄານເຊື່ອມຕໍ່ກັນ 3 ອາຄານ ແລະ ມີຊັ້ນດາດຟ້າເປັນແນວຍາວ ເຊິ່ງແບ່ງອອກເປັນຈຸດຊົມວິວ ແລະ ສະລອຍນ້ຳອິນຟີນິຕີ້ພູຍາວ 150 ແມັດ ເທິງຊັ້ນ 57 ເປັນບໍລິເວນຈຸດຊົມວິວເປີດໃຫ້ນັກທ່ອງທ່ຽວທົ່ວໄປເຂົ້າຊົມ ໂດຍນັກທ່ອງທ່ຽວສາມາດເບິ່ງທັດສະນີຍະພາບຂອງເມືອງສິງກະໂປ ທັງອ່າວມາຣີນາ, ສິງກະໂປຟລາຍເອີ້, ກາເດັນ ບາຍ ເດິ ເບ ເປັນຕົ້ນ ເປີດໃຫ້ບໍລິການທຸກມື້ ວັນຈັນ-ພະຫັດ ຕັ້ງແຕ່ເວລາ 09:30-10:00 ແລະ ວັນສຸກ-ອາທິດຕັ້ງແຕ່ເວລາ 09:30-11:00.

4. ຫໍໄຂ່ມຸກເມືອງຊຽງໄຮ້, ຈີນ.

   ຫໍໄຂ່ມຸກ (Oriental Pearl Tower) ເປັນຫໍສົ່ງສັນຍານວິທະຍຸໂທລະພາບ ມີລັກສະນະເປັນຫໍຄອຍສູງ ມີໂຄງສ້າງຄ້າຍຄືກັບເມັດໄຂ່ມຸກຢູ່ລະຫວ່າງເສົາຂອງຫໍຄອຍ  3 ເມັດ ມີຄວາມສູງເຖິງ 468 ແມັດ ນັກທ່ອງທ່ຽວສາມາດຂຶ້ນໄປທີ່ລະດັບຄວາມສູງ 259 ແມັດ ເພື່ອສຳຜັດກັບພື້ນ ແລະ ຝາທີ່ເປັນແກ້ວ ເຊິ່ງຈະເຮັດໃຫ້ສາມາດເບິ່ງເມືອງຊຽງໄຮ້ໄດ້ແບບ 360 ອົງສາ ເມື່ອເພີ່ມຄວາມຕື່ນເຕັ້ນໃຫ້ຮ່າງກາຍຮຽບຮ້ອຍແລ້ວກໍສາມາດໄປນັ່ງຮັບປະທານອາຫານຫຼູຫຼາລະດັບຄວາມສູງ 267 ແມັດ ໃນຕອນກາງຄືນຫໍຄອຍນີ້ຈະເປີດໄຟຍິບຍັບສວຍງາມຄືກັບໄຂ່ມຸກແຫ່ງຕາເວັນອອກເລີຍ.

5. ໄບເທັກໂກ້ ໄຟແນນຊ້ຽວ ທາວເວີ້, ຫວຽດນາມ.

   ຖ້າໃຜມີໂອກາດໄປຢ້ຽມຢາມປະເທດອ້າຍນ້ອງຫວຽດນາມຂອງເຮົາກໍຈະເຫັນວ່າຕຶກ ໄບເທັກໂກ້ ທາວເວີ້ (Bitexco Financial Tower) ຕັ້ງຢູ່ຢ່າງໂດດເດັ່ນໃຈກາງເມືອງ ດ້ວຍການເປັນຕຶກທີ່ສູງທີ່ສຸດແຫ່ງໜຶ່ງໃນເມືອງໂຮຈິມິນມີຄວາມສູງ 262 ແມັດ ເປີດໃຫ້ນັກທ່ອງທ່ຽວເຂົ້າຊົມໃນຊັ້ນເທິງສຸດຂອງຕຶກໄດ້ ຜູ້ເຂົ້າຊົມຈະເບິ່ງທັດສະນີຍະພາບຂອງເມືອງໂຮຈິມິນໄດ້ໄກສຸດລູກຫູລູກຕາ ພາຍໃນຕຶກແຫ່ງນີ້ຍັງມີຮ້ານຈາກຍີ່ຫໍ້ດັງໆອີກຫຼາກຫຼາຍພ້ອມກັບຮ້ານອາຫານທີ່ເປີດໃຫ້ບໍລິການ ໃນສ່ວນຂອງຈຸດຊົມວິວເປີດໃຫ້ເຂົ້າຊົມທຸກມື້ຕັ້ງແຕ່ເວລາ 09:30-21:30.

6. ເປໂຕຣນາສທາວເວີ້, ມາເລເຊຍ.

   ຕຶກເປໂຕຣນາສທາວເວີ້ (Petronas Towers) ມັກລັກສະນະເປັນຕຶກແຝດ ເຊິ່ງໃນຂະນະນີ້ເປັນຕຶກທີ່ສູງທີ່ສຸດໃນໂລກ ມີຄວາມສູງເຖິງ 451.9 ແມັດ ສິ່ງທີ່ໂດດເດັ່ນອີກຈຸດໜຶ່ງຂອງຕຶກແຫ່ງນີ້ກໍຄືມີຂົວເຊື່ອມກັນລະຫວ່າງ 2 ຕຶກໃນຊັ້ນທີ 41 ແລະ 42 ແຕ່ຖ້າໃຜຢາກເຫັນເມືອງກົວລາລຳເປີໃນຈຸດທີ່ສູງຫຼາຍກວ່າກໍຂຶ້ນລິບໄປຊັ້ນທີ 86 ໃນລະດັບຄວາມສູງ 360 ແມັດ ພາບຂອງເມືອງຫຼວງຂອງມາເລເຊຍທີ່ກວ້າງໃຫຍ່ຈະປະກົດສູ່ສາຍຕາຂອງນັກທ່ອງທ່ຽວເປັນຄວາມປະທັບໃຈທີ່ບໍ່ມີມື້ລືມ.

7. ຕຶກອິນເຕີເນຊັນແນວ ຄອມເມີດ ເຊັນເຕີ້, ຮົງກົງ.

   ໃນເມືອງທີ່ມີເສດຖະກິດຮັ່ງມີຄືຮົງກົງເຕັມໄປດ້ວຍຕຶກສູງຫຼວງຫຼາຍ ໂດຍໜຶ່ງໃນນັ້ນກໍຄື ຕຶກອິນເຕີເນຊັນແນວ ຄອມເມີດ ເຊັນເຕີ້ (International Commerce Center) ເຊິ່ງເປັນຕຶກທີ່ສູງທີ່ສຸດໃນຮົງກົງ ແຕະຂອບຟ້າຢູ່ທີ່ຄວາມສູງ 490 ແມັດ ມີທັງໝົດ 118 ຊັ້ນ ນັກທ່ອງທ່ຽວສາມາດຂຶ້ນລິບໄປໃນຊັ້ນ 100 ເພື່ອເບິ່ງຄວາມງົດງາມຂອງເກາະຮົງກົງໃນມູມສູງແບບ 360 ອົງສາ ເຫັນທັງວິວຂອງເມືອງ ແລະ ອ່າວວິກຕໍເຣຍ ໂດຍນັກທ່ອງທ່ຽວສາມາດຮຽນຮູ້ເລື່ອງລາວຂອງຮົງກົງລວມທັງຕຶກແຫ່ງນີ້ໄດ້ຈາການວາງສະແດງຢູ່ໃນຊັ້ນນີ້.

8. ອະນຸສາວະລີແຫ່ງຊາດ, ອິນໂດເນເຊຍ.

   ອະນຸສາວະລີແຫ່ງຊາດອິນໂດເນເຊຍ (National Monument) ຕັ້ງຢູ່ກາງຈະຕຸລັດເມີເດກາ ນະຄອນຈາກາຕາປະເທດອິນໂດເນເຊຍ ມີລັກສະນະເປັນຫໍຄອຍສູງ ຈາກຖານຂອງຫໍຄອຍຈົນເຖິງຈຸດສູງສຸດມີຄວາມສູງທີ່ 137 ແມັດ ໃນຍາມກາງຄືນຫໍຄອຍແຫ່ງນີ້ຈະເປີດໄຟງົດງາມ ນັ້ນຈຶ່ງເຮັດໃຫ້ເບິ່ງເຫັນຈຸດສູງສຸດຂອງຫໍຄອຍໄດ້ຢ່າງຊັດເຈນ ເຊິ່ງໂອບດ້ວຍທອງຄຳໜັກເຖິງ 35 ກິໂລກຣາມ ນັກທ່ອງທ່ຽວສາມາດຂຶ້ນໄປຫາ The Top Yard  ເພື່ອເບິ່ງຄວາມງົດງາມຂອງນະຄອນຈາກາຕາໄດ້ທັງໃນຍາມກາງເວັນ ແລະ ກາງຄືນ.

9. ຫໍຄອຍເອັນໂຊ ທາວເວີ້, ເກົາຫຼີໃຕ້.

   ຖ້າໃຜຢາກສ້າງຕຳນານແຫ່ງຄວາມຮັກຕ້ອງບໍ່ພາດການໄຢຢາມຫໍຄອຍ ເອັນໂຊ ທາວເວີ້ (N Seoul Tower) ເອກະລັກທີ່ສຳຄັນຂອງນະຄອນໂຊ ແລະ ເປັນສະຖານທີ່ທ່ອງທ່ຽວຍອດຮິດຂອງທັງນັກທ່ອງທ່ຽວຄົນເກົາຫຼີ ແລະ ຕ່າງຊາດ ຕັ້ງຢູ່ເທິງພູເຂົານຳຊານ ມີຄວາມສູງ 236.7 ແມັດ ໂດຍຈຸດຊົມວິວຢູ່ທີ່ຊັ້ນ 3 ນັກທ່ອງທ່ຽວສາມາດນຳເອົາໜ່ວຍກະແຈໄປລັອກກັບຮົ້ວຂອງຕຶກ ເຊິ່ງຄົນເກົາຫຼີເອງເຊື່ອວ່າຈະເຮັດໃຫ້ຄວາມຮັກຂອງຄູ່ຮັກນັ້ນຍືນຍາວ ສ້າງບັນຍາກາດໂລແມນຕິກໃຫ້ກັບຫໍຄອຍແຫ່ງນີ້ ແລະ ນະຄອນໂຊຢ່າງຫຼວງຫຼາຍ.