8 ເຄັດລັບວິທີນອນຫຼັບສະບາຍ ໄດ້ຜົນແທ້ຕາມຫຼັກວິທະຍາສາດ

8 ເຄັດລັບວິທີນອນຫຼັບສະບາຍ 

ໄວເຮັດວຽກ​ ຫຼື ລວມທັງ​ໄວ​ລຸ້ນ​ ແລະ​ ໄວ​ອາ​ວຸ​ໂສ​ບາງ​ຄົນ​ ອາດ​ມີ​ບັນຫານອນບໍ່​ຫຼັບ​ໄດ້​ຈາກ​ຫຼາຍ​ສາ​ເຫດ​ ບໍ່​ວ່າ​ຈະ​ເປັນ​ຄວາມ​ຄຽດ​ສະ​ສົມ​ ສິ່ງ​ແວດ​ລ້ອມ​ບໍ່​ເອື້ອ​ອຳ​ນວຍ​ ພັກ​ຜ່ອນ​ບໍ່​ຖືກ​ເວລາ​ດົນ​ໆ​ ຈົນ​ຮ່າງກາຍ​ລວນ​ ຫຼື ​ອາດຈະ​ບໍ່​ຮູ້​ສາ​ເຫດ​ຊັດເຈັນ​ ແຕ່​ຮັບຮອງ​ວ່າ​ເຄັດ​ລັບ​ທີ່​ເຮົາ​ນຳ​ມາ​ຝາກ​ ຈະ​ເຮັດໃຫ້​ເຈົ້າ​ຫຼັບ​ງ່າຍ​ຂຶ້ນ​ແນ່ນອນ​ ເພາະ​ອ້າງ​ອິງ​ຕາມຫຼັກ​ວິທະຍາ​ສາດ​ມາ​ເລີຍ​

1. ຫຼຸດ​ເວລາ​ເບິ່ງໜ້າຈໍ​ກ່ອນ​ເຂົ້າ​ນອນ​

ແສງ​ສີ​ຟ້າ​ຈາກ​ໜ້າຈໍ​ມື​ຖື​ ຫຼື ​ຄອມພິວເຕີ​ ລວມໄປ​ເຖິງ​ຈໍ​ໂທລະພາບ​ ລົບກວນ​ປະສາດ​ຂອງ​ເຈົ້າ​ ເຮັດໃຫ້​ເຈົ້າ​ນອນ​ບໍ່​ຫຼັບ​ໄດ້​ ເຖິງວ່າ​ຈະ​ຫຼັບ​ຕາ​ແລ້ວ​ກໍ່​ຕາມ​ ແລະ ​ຍັງ​ເຮັດໃຫ້​ລະບົບ​ການ​ເຮັດ​ວຽກງານ​ຂອງ​ຮໍ​​ໂມນ​ຫຼັບ​ສະບາຍ​ທີ່​ຊື່​ ເມ​ລາ​ໂທ​ນິນ​” ເຮັດວຽກ​ໄດ້​ບໍ່​ເຕັມ​ທີ່​ອີກ​ດ້ວຍ​ ເຮົາ​ແນະ​ນຳ​ໃຫ້​ປິດ​ໂທລະພາບ​ ປິດ​ໜ້າຈໍຄອມ​ພິວ​ເຕີ​ ແລະ​ ມື​ຖື​ກ່ອນ​ນອນ​ປະມານ​ 2 ຊົ່ວ​ໂມງ​ ໄດ້​ຢູ່ໃນ​ຫ້ອງ​ງຽບ​ໆ​ ຫຼື ​ຈະ​ເປີດ​ເພງ​ຊ້າ​ໆ​ ເບົາ​ໆ​ ທີ່​ຫົວ​ມຸມ​ຂອງ​ຫ້ອງ​ ໃຊ້​ປະ ສາດ​ຫູ​ແທນ​ຕາ​ຈັກໜ້ອຍ​ຈະ​ຊ່ວຍ​ໃຫ້​ຫຼັບ​ໄດ້​ງ່າຍ​ຂຶ້ນ​ 

2. ຫຼຸດ​ເຄື່ອງ​ດື່ມ​ຄາ​ເຟ​ອິນ​

ນັບ​ໄປ​ເລີຍ​ ກ່ອນ​ນອນ​ 5-6 ຊົ່ວ​ໂມງ​ ຫ້າມ​ດື່ມ​ເຄື່ອງ​ດື່ມ​ທີ່​ມີ​ຄາ​ເຟ​ອິນ​ເດັດ​ຂາດ​ ບໍ່​ແມ່ນ​ສະເພາະແຕ່​ກາ​ແຟ​ ລວມໄປ​ເຖິງ​ຊາ​ຈີນ​ ຊາ​ໄທ​ ຊາ​ຝ​ຣັ່ງ​ ຊາ​ຂຽວ​ຍີ່​ປຸ່ນ​ ໂກ​ໂກ້​ ນໍ້າ​ອັດ​ລົມ​ ແລະ​ ເຄື່ອງ​ດື່ມ​ອື່ນ​ໆ​ ອີກ​ຫຼວງຫຼາຍ ຄາ​ເຟ​ອີນ​ເຮັດໃຫ້​ປະສາດ​ຂອງ​ເຈົ້າ​ຕື່ນ​ຕົວ​ ໃຜ​ຈະ​ຢາກ​ມາ​ຕື່ນ​ຕົວ​ຕອນ​ກຳ​ລັງ​ຈະ​ນອນ​​? ຖ້າ​ຢາກ​ດື່ມ​ຫຍັງ​ກ່ອນ​ນອນ​ແທ້ໆ​ ແນະ​ນຳ​ນ້ຳ​ອຸ່ນ​ ນົມ​ຈືດ​ອຸ່ນ​ໆ​ ແທນ​ຈະ​ດີກວ່າ​ 

3. ເຂົ້າ​ນອນ​-ຕື່ນ​ນອນ​ເວລາ​ເກົ່າ​ທຸກ​ມື້​

ການສ້າງ​ໂມງ​ຊີວິດ​ໃຫ້​ກັບ​ຕົວເອງ​ ເປັນ​ການ​ຝຶກ​ວິ​ໄນ​ໃຫ້​ກັບ​ຮ່າງກາຍ​ຢ່າງ​ໜຶ່ງ​ ເວົ້າ​ກັນ​ວ່າ​ຫາກ​ເຮົາ​ເຮັດ​ຫຍັງ​ຈັກ​ຢ່າງ​ໃນ​ເວລາ​ເກົ່າໆ​ ຕິດ​ຕໍ່​ກັນ​ 21 ມື້​ ການ​ກະທຳ​ນັ້ນ​ໆ​ ຈະ​ເຮັດໃຫ້​ຮ່າງກາຍ​ຄຸ້ນເຄີຍ​ ແລະ ​ຕິດ​ເປັນ​ນິ​ໄສ ຖ້າ​ເຮົາ​ສ້າງ​ນິ​ໄສ​ການ​ນອນ​ ແລະ​ ຕື່ນ​ນອນ​ໃຫ້​ກັບ​ຮ່າງກາຍ​ໄດ້​ ເຮົາ​ກໍ​ຈະຢາກ​ນອນ​ ແລະ ​ຕື່ນ​ນອນ​ໄດ້​ກົງ​ເວລາ​ທຸກ​ມື້​ ບໍ່​ມີ​ບັນຫາ​ການ​ນອນ​ອີກ​ເລີຍ​

4. ຄວບ​ຄຸມ​ແສງ​ພາຍ​ໃນ​ຫ້ອງ​ໃຫ້​ດີ​

ກ່ອນ​ນອນ​ປິດ​ໄຟ​ ຫຼື ຜ່ອນໄຟ​ລົງ​ ເພື່ອ​ບໍ່​ໃຫ້​ແສງ​ໄຟ​ຊ່ອງ​ຕາ​ ຈົນ​ລົບກວນ​ການ​ນອນ​ຫຼັບ​ຂອງ​ເຮົາ​ໄດ້​ ຢ່າ​ລືມ​ເປີດ​ຜ້າກັ້ງ​ເອົາ​ໄວ້​ໜ້ອຍໆ​ກ່ອນ​ນອນ​​ ເພື່ອ​ທີ່ຕ​ອນ​ເຊົ້າ​ຕື່ນ​ມາ​ ແສງ​ແດດ​ຍາມ​ເຊົ້າ​ທາງ​ນອກ​ຈະ​ໄດ້​ຊ່ອງ​ເຂົ້າ​ມາ​ໃນ​ຫ້ອງນອນ​ ເຮັດໃຫ້​ເຮົາ​ຕື່ນ​ມາພົ​ບ​ກັບ​ແສງ​ແດດ​ອ່ອນ​ໆ​ຕອນເຊົ້າ​ພໍ​ດີ​ ເປັນ​ຕົວ​ປຸກ​ໃຫ້​ເຮົາ​ຕື່ນ​ໄດ້​ດີກວ່າ​ໂມງ​ປຸກ​​ອີກ​

5. ເຮັດ​ກິດຈະກຳ​ເຂົ້າ​ຈັງ​ຫວະ​

ຂໍ້​ນີ້ຂໍສະຫງວນ​ສຳລັບ​ຄົົນທີ່​ມີ​ຄອບຄົວ​ ມີ​ຜົວ​ ຫຼື ​ເມຍ​ແລ້ວ​ເທົ່າ​ນັ້ນ​ ຫາກ​ເຈົ້າ​ໄປ​ເຖິງ​ຈຸດ​ສຸດ​ຍອດ​ເມື່ອໃດ​ ຮໍ​​ໂມນ​ໃນ​ກຸ່ມ​ຂອງ​ໂປຼຣ​ຕິນ​ທີ່​ມີ​ຊື່​ວ່າ​ ໂພຣ​ແລກ​ຕິນ​ ຈະ​ຫຼັ່ງ​ອອກ​ມາ​ ເຮັດໃຫ້​ຮ່າງກາຍ​ຂອງ​ເຈົ້າ​ຜ່ອນ​ຄາຍ​ ແລະ ​ຮູ້ສຶກ​ຢາກ​ນອນ​ ນອກ​ຈາກ​ນີ້​ກິດຈະກຳ​ນີ້​ຍັງ​ຊ່ວຍ​ໃຫ້​ຮໍ​ໂມນ​ຄໍ​​ຕິ​ຊອນ​ ທີ່​ມັກ​ຫຼັ່ງ​ອອກ​ມາ​ເມື່ອ​ເຮົາ​ຢູ່ໃນ​ພາ​ວະ​ຄວາມຄຽດ​ ມີ​ປະລິມານ​ຫຼຸດລົງ​ອີກ​​

6. ຢຸດ​ກິນ​ອາຫານ​ກ່ອນ​ນອນ​ 3 ຊົ່ວ​ໂມງ​

ການກິນ​ອາຫານ​ ບໍ່​ວ່າ​ຈະ​ເປັນ​ມື້​ປົກກະຕິ​ເຊັ່ນ ເຂົ້າ​ 1 ຈານ​ ຫຼື​ ຈະ​ເປັນພຽງ​ຂະໜົມ​ເຊັ່ນ​ ຄຸກ​ກີ້​ ຈືນມັນ​ຝ​ຣັ່ງ​​​ ຫຼື ​ອື່ນ​ໆ ກໍ່ຕາມ​ ເຮົາ​ຖື​ວ່າ​ເປັນ​ອາຫານ​ທັງ​ໝົດ​ ຮ່າງກາຍ​ຕ້ອງ​ການ​ຫຼາຍກວ່າ​ 3 ຊົ່ວ​ໂມງ​ໃນ​ການ​ຍ່ອຍ​ອາຫານ​ຫຼາຍ​ປະ​ເພດ​ ຫາກ​ຮ່າງກາຍ​ຍັງ​ຄົງ​ເຮັດວຽກ​ຢູ່​ ເຈົ້າ​ກໍ​ຈະ​ຮູ້ສຶກ​ຢາກນອນໜ້ອຍ​ລົງ​ ເພາະ​ຮ່າງກາຍ​ຍັງ​ຈຳ​ເປັນ​ຕ້ອງ​ຕື່ນ​ຕົວ​ເພື່ອ​ຍ່ອຍ​ອາຫານ​ນັ້ນ​ເອງ​ 

7. ຫຼຸດ​ການ​ດື່ມເຄື່ອງດື່ມທາດເຫຼົ້າ​​

ເຖິງວ່າ​ບາງ​ຄົນ​ຈະ​ດື່ມເຄື່ອງດື່ມທາດເຫຼົ້າ​​ແລ້ວ​ຮູ້ສຶກ​ຢາກນອນ​ກໍ່ຕາມ​ ແຕ່​ເຮົາ​ບໍ່​ຢາກ​ແນະ​ນຳ​ໃຫ້​ເຈົ້າ​ໃຊ້​ວິທີ​ນີ້​ໃນ​ການ​ບັງຄັບ​ໃຫ້​ຮ່າງກາຍ​ຕ້ອງ​ຢາກ​ນອນ​ເພາະ​ທາດເຫຼົ້າ​​ໄປ​ຕະຫຼອດ​ ເພາະ​ມີ​ສິດ​ທີ່​ເຈົ້າ​ຈະ​ຕິດ​ການ​ດື່ມ​ກ່ອນ​ນອນ​ຈົນ​ເປັນ​ນິ​ໄສ​ ແລະ ​ກາຍ​ເປັນ​ຄົນ​ຕິດເຄື່ອງດື່ມມືນເມົາ​​ໄດ້​ ນອກ​ຈາກ​ນີ້​ເຄື່ອງດື່ມທາດເຫຼົ້າ​​ຍັງ​ລົບກວນ​ການ​ເຮັດ​ວຽກ​ຂອງ​ວົງ​ຈົນ​ການ​ນອນ​ຫຼັບ​ (REM Cycle) ເຮັດໃຫ້​ເຈົ້າ​ມີ​ອາການ​ຫຼັບ​ໆ​ ຕື່ນ​ໆ​ ຫຼື​ ອາດຈະ​ຫຼັບ​ບໍ່​ສະນິດ​ໄປ​ຕະ ຫຼອດ​ຄືນ​ໄດ້​

8. ອອກກຳລັງກາຍຕອນ​ເຊົ້າ​

ເຮົາ​ບໍ່​ຄວນ​ອອກ​ກຳ​ລັງ​ກາຍ​ຕອນ​ກ່ອນ​ນອນ​ ຫຼື ​ໃກ້​ເວລາ​ນອນ​ ຫຼາຍ​ຄົນ​ອາດຈະ​ອອກ​ກຳ​ລັງ​ກາຍ​ຫຼັງ​ເລີກ​ວຽກ​ ກວ່າ​ຈະ​ອອກ​ກຳ​ລັງ​ກາຍແລ້ວ​ຈາກຟິດເນສກໍ​ເດິກ​ແລ້ວ ເຊິ່ງ​ຮ່າງກາຍ​ອາດ​ຍັງ​ບໍ່​ຢູ່ໃນ​ຊ່ວງ​ cool down ຫຼາຍ​ພໍ​ທີ່​ຮ່າງກາຍ​ຈະ​ສະຫງົບ​ ຜ່ອນ​ຄາຍ​ ແລະ ​ພ້ອມ​ນອນ​ຫຼັບ​ ຖ້າໃຜ​ອອກ​ກຳ​ລັງ​ກາຍ​ຕອນ​ແລງ​ແລ້ວ​ໄປ​ຫາ​ຫຍັງ​ໜັກ​ໆ​ກິນ​ຕໍ່​​ຍິ່ງຈະເຮັດໃຫ້ນອນບໍ່ຫຼັບ

ການ​ອອກ​ກຳ​ລັງ​ກາຍ​ຕອນ​ເຊົ້າ​ ບໍ່​ພຽງ​ຊ່ວຍ​ໃຫ້​ຕອນ​ກາງ​ຄືນ​ເຈົ້າ​ຫຼັບ​ໄດ້​ສະບາຍ​ຍິ່ງ​ຂຶ້ນ​ ແຕ່​ຍັງ​ຊ່ວຍ​ໃຫ້​ເຈົ້າ​ຮູ້ສຶກ​ສົດຊື່ນ​ ກຽມ​ຮ່າງກາຍ​ເພື່ອ​ການ​ເຮັດ​ວຽກງານ​ຢ່າງ​ສົດ​ຊື່ນ​ໄດ້​ຕະຫຼອດ​ໝົດມື້​

ເຄັດ​ລັບ​ງ່າຍໆ​ແບບນີ້​ ຢ່າ​ລືມ​ນຳ​ໄປ​ໃຊ້​ກັນ​ເບິ່ງ​ເດີ້​

Cr: http://muan.sanook.com