75 ລ້ານປອນ!!ທີມຈີນໝັ້ນໃຈດຶງຄອສຕ້າຮ່ວມທັບ

 

ເດິ ມີເລີ ສື່ດັງຂອງອັງກິດລະບຸ ທຽນຈິນ ສວນຈຽນ ທີມໃນຈີນໝັ້ນໃຈເຕັມທີ່ວ່າຈະໄດ້ຕົວ ດີເອໂກ ຄອສຕ້າ ຫົວຫອກຂອງ ເຊວຊີ ແລ້ວດ້ວຍຄ່າຫົວເຖິງ 75 ລ້ານປອນ ສ່ວນຄ່າເມື່ອຍທີ່ນັກເຕະຈະໄດ້ຮັບແມ່ນຢູ່ທີ່ 650,000 ປອນຕໍ່ອາທິດຫຼັງຫັກພາສີແລ້ວ.

 

ທຽນຈິນ ສວນຈຽນ ສະໂມສອນໃນລີກ ໄຊນິສ ຊູເປີລີກ ປະເທດຈີນສະແດງຄວາມໝັ້ນໃຈວ່າພວກເຂົາບັນລຸຂໍ້ຕົກລົງໃນການດຶງຕົວ ດີເອໂກ ຄອສຕ້າ ດາວຍິງຂອງ ເຊວຊີ ທີມຍັກໃຫຍ່ຂອງລີກຜູ້ດີໄປຮ່ວມທັບໄດ້ແລ້ວດ້ວຍຄ່າຫົວ 75 ລ້ານປອນ ຕາມການລາຍງານຂອງ ເດິ ມີເລີ ສື່ຊື່ດັງຂອງປະເທດອັງກິດ.

 

ເມື່ອອາທິດແລ້ວ ຄອສຕ້າ ໄດ້ນັດພົບກັບ ຮໍເກ ເມນເດດ ນາຍໜ້າຂອງເຂົາລວມເຖິງຕົວແທນຂອງທີມຈາກຈີນໂດຍເຊື່ອກັນວ່າພວກເຂົາບັນລຸຂໍ້ຕົກລົງໃນເບື້ອງຕົ້ນກັນໄດ້ຕັ້ງແຕ່ຕອນນັ້ນແລ້ວ ຈົນຫຼ້າສຸດກໍໝັ້ນໃຈວ່າປິດດິວໄປເປັນທີ່ຮຽບຮ້ອຍ.

 

ເຊື່ອກັນວ່າ ຄອສຕ້າ ຈະໄດ້ຮັບຄ່າເມື່ອຍເຖິງ 650,000 ປອນຕໍ່ອາທິດໂດຍຈະໄດ້ເທົ່ານັ້ນຫຼັງຈາກທີ່ຫັກພາສີແລ້ວ ໃນທາງກັບກັນສື່ຂອງສະເປນກໍລາຍງານວ່າຫົວຫອກຂອງ ເຊວຊີ ຍັງບໍ່ໄດ້ເຊັນສັນຍາຢ່າງເປັນທາງການແຕ່ມັນກໍຄືວ່າຈະແນ່ນອນແລ້ວວ່າເຂົາຈະຍ້າຍໄປຫຼິ້ນໃນແດນມັງກອນ.