7 ວິທີ​ບຳບັດ​ໃຈ ໃຫ້ຫາ​ຍ​ເຈັບ​ຈາກຮັກ​ເກົ່າ ພ້ອມ​ກ້າວ​ຕໍ່​ໄປ

 

  1. ເຈັບ​ໃຫ້​ໄດ້​ບົດຮຽນ

ແມ້ວ່າການນຶກເຖິງເລື່ອງລາວເກົ່າໆຈະເຮັດໃຫ້​ເຈົ້າເຈັບປວດ ແລະ ມີນ້ຳຕາ ແຕ່ການທີ່ໄດ້ນັ່ງຍ້ອນຄິດທົບທວນເຖິງມັນ ​ເຈົ້າກໍຈະໄດ້ຮັບບົດຮຽນຕ່າງໆກ່ຽວກັບຄວາມຮັກ ເອີ້ນໄດ້ວ່າບໍ່ເຈັບລ້າ ແຕ່ຍັງໄດ້ປະສົບການມາໄວ້ໃຊ້ ເທື່ອວ່າມື້​ໜຶ່ງ ທີ່ໃຈພ້ອມເປີດຮັບຮັກຄັ້ງໃໝ່ກໍຈະໄດ້ບໍ່ຕ້ອງ​ເຮັດຜິດຊ້ຳຊາກແລ້ວກັບໄປເຈັບແບບ​ເດີມໆ.

2. ​ເບິ່ງ​ແຍງ​ຫົວ​ໃຈ​ຕົນ​ເອງ

ຫົວໃຈຂອງ​ເຈົ້າຕ້ອງເຈັບປວດກັບເລື່ອງລາວຄວາມຮັກທີ່ບໍ່ສົມຫວັງມາແລ້ວ ຄົງບໍ່ແມ່ນເລື່ອງດີຫາກ​ເຈົ້າຈະຍັງເອົາແຕ່ຊ້ຳເຕີມຫົວໃຈຕົນເອງ ຫັນມາໃສ່ໃຈທີ່ຈະໃຫ້ຄວາມຮັກກັບ​ໂຕ​ເຈົ້າເອງເບິ່ງແຍງຕົນເອງໃຫ້ຫຼາຍ ບໍ່ປ່ອຍຕົວ​ເລີຍ​ເຖີດພຽງເພາະຕ້ອງການ ປະຊົດຊີວິດທີ່ບໍ່ສົມຫວັງໃນຮັກເທົ່ານັ້ນ.

3. ມ່ວນ​ກັບ​ຄວາມ​ໂສດ

ເບິ່ງໃນແງ່ດີວ່າການທີ່ເຈົ້າໄດ້ກັບມາເປັນໂສດອີກຄັ້ງນັ້ນ ເປັນໂອກາດທີ່​ເຈົ້າຈະໄດ້ມ່ວນກັບຊີວິດຢ່າງທີ່ບໍ່ຕ້ອງຄອຍຫ່ວງຄວາມຮູ້ສຶກໃຜ ເຮັດຫຍັງໄດ້ຢ່າງອິດສະລະ ບໍ່ຕ້ອງກັງວົນວ່າຈະມີໃຜຄິດຫຼາຍກັບການກະທຳຂອງ​ເຈົ້າ ຫຼື ບໍ່ເມື່ອຄິດໄດ້ແບບນີ້ຊີວິດໂສດກໍຈະບໍ່ເຮັດໃຫ້​ເຈົ້າຮູ້ສຶກບໍ່ດີອີກຕໍ່ໄປ.

4. ບໍ່ປິດ​ກັ້ນ​ຕົນ​ເອງ

ຢ່າໃຫ້ຄວາມເຈັບປວດຈາກຮັກຄັ້ງເກົ່າຢູ່ກັບ​ເຈົ້າດົນເກີນໄປ ເພາະອາດເຮັດໃຫ້ຫົວໃຈຂອງ​ເຈົ້າປິດຕາຍຈົນບໍ່ສາມາດກັບມາຮູ້ສຶກຮັກໃຜໄດ້ອີກ ເມື່ອເຖິງເວລາທີ່​ເຈົ້າສາມາດຍິ້ມຮັບກັບເລື່ອງລາວຄວາມຮັກຄັ້ງເກົ່າໄດ້ແລ້ວ ນັ້ນກໍຄົງເປັນສັນຍານທີ່ດີ ທີ່​ເຈົ້າຈະເປີດໃຈ ໃຫ້ຄວາມຮັກຄັ້ງໃໝ່ໄດ້ເຂົ້າມາທັກທາຍຫົວໃຈອີກຄັ້ງ.

5. ອະດີດ​ບໍ່​ແມ່ນ​ປະຈຸ​ບັນ

ເລື່ອງລາວໃນອະດີດກໍຄວນຈະປ່ອຍໃຫ້ເປັນອະດີດ ບໍ່ຈໍາເປັນຕ້ອງທຳທ່າ​ເຮັດ​ລືມ​ມັນໄປ ແຕ່ຮຽນຮູ້ທີ່ຈະຢູ່ກັບມັນ ແລະ ຍິ້ມຮັບໃຫ້ໄດ້ ໃນຈັກມື້ໜຶ່ງຖ້າ​ເຈົ້າເຮັດໄດ້ ອະດີດກໍຈະບໍ່ສົ່ງຜົນກັບປັດຈຸບັນ ແລະ ຈະບໍ່ເປັນ​ໂຕທຳລາຍອະນາຄົດຂອງ​ເຈົ້າ.

6. ຢ່າ​ຢ້ານ​ເສຍໜ້າ

ບໍ່ແມ່ນເລື່ອງໜ້າອາຍທີ່ຈະຕ້ອງຢູ່​ໂຕຄົນດຽວ ຫຼັງຈາກສູນເສຍຄວາມຮັກໄປ ຢ່າປ່ອຍໃຫ້ຄວາມຮູ້ສຶກຢ້ານເສຍໜ້າມາເຮັດໃຫ້​ເຈົ້າ ບໍ່ກ້າທີ່ຈະຢູ່ຄົນດຽວ ແລ້ວຕ້ອງຮີບເປີດຮັບຄວາມຮັກຄັ້ງໃໝ່ທັນທີ ເພາະຫົວໃຈທີ່ຍັງອ່ອນລ້າຂອງ​ເຈົ້າອາດຈະບໍ່ໄດ້ພ້ອມທີ່ຈະຮຽນຮູ້ ຫຼື ຮັກໃຜແລ້ວສຸດທ້າຍຄວາມຮັກຄັ້ງໃໝ່ກໍຈະໄປບໍ່ລອດ.

7. ຢາກ​ຮັກ​ຕ້ອງ​ຮັບ​ຄວາມ​ສ່ຽງ

ເມື່ອ​ໃດກໍຕາມທີ່​ເຈົ້າຄິດຈະມີຄວາມຮັກກໍຕ້ອງກຽມໃຈທີ່ຈະຮັບຄວາມຜິດຫວັງເອົາໄວ້ສະເໝີ ວິທີທີ່ດີເມື່ອມີຄວາມຮັກຄື ການທີ່​ເຈົ້າຮູ້ຈັກເຜື່ອໃຈ ຢ່າທຸ້ມເທທັງຊີວິດໃຫ້ກັບຄວາມຮັກ ເມື່ອ​ໃດກໍຕາມທີ່ຕ້ອງສູນເສຍມັນໄປ ຢ່າງໜ້ອຍ​ເຈົ້າກໍຍັງເຫຼືອໃຈທີ່ຈະໃຊ້ຊີວິດຕໍ່ຢ່າງມີຈຸດໝາຍບໍ່ມີໃຜສາມາດຮັບຮູ້ໄດ້ວ່າ ຄວາມເຈັບປວດທີ່​ເຈົ້າໄດ້ຮັບເມື່ອຕ້ອງທົນເສຍຄວາມຮັກໄປມັນທໍລະມານຫຼາຍປານ​ໃດ ເມື່ອມີແຕ່​ເຈົ້າເທົ່ານັ້ນທີ່ເຂົ້າໃຈໃນຄວາມເຈັບປວດຂອງຫົວໃຈຕົນເອງກໍຕ້ອງຮຽນຮູ້ທີ່ຈະປວດໃຈ ແລະ ຢຽວຢາຫົວໃຈຕົນເອງໃຫ້ເປັນເທົ່ານັ້ນເອງ.

 

ບົດຄວາມໃຫມ່ໆ