7 ວິທີເຜົາຜານໄຂມັນ ແລະຫຼຸດນໍ້າໜັກໄດ້ໄວທີ່ສຸດໂດຍຜູ້ຊ່ຽວຊານ

 

1. ພະຍາຍາມສ້າງມວນກ້າມເນື້ອ:

 ກ້າມເນື້ອຊ່ວຍໃຫ້ຮ່າງກາຍມີຮູບຮ່າງສວຍງາມ ແລະຊ່ວຍໃນການເຜົາຜານໄຂມັນ ແລະພະລັງງານໄດ້ດີທີ່ສຸດ ສັງເກດງ່າຍໆຄົນມີກ້າມເນື້ອທີ່ແຂງແຮງຈະບໍ່ຕຸ້ຍງ່າຍ ເຖິງນ້ຳໜັກຈະຫຼາຍແຕ່ຮູບຮ່າງກໍເຟີມມີສັດສ່ວນ. ຖ້າຕ້ອງການຫຼຸດນ້ຳໜັກສິ່ງທຳອິດທີ່ຄວນຄິດເຖິງຄືການສ້າງມວນກ້າມເນື້ອ ດ້ວຍການອອກກຳລັງກາຍແບບຄາດິໂອ, ການຍົກເວດ, ຖີບລົດຖີບ, ແລ່ນ ແລະອື່ນໆເຊິ່ງສາມາດປະຕິບັດໄດ້ງ່າຍຕາມສູນອອກກຳລັງກາຍທົ່ວໄປ ແລະຢ່າລືມກິນອາຫານປະເພດໂປຣຕິນໄປຄຽງຄູ່ກັນ.

2. ເຄື່ອນໄຫວຮ່າງກາຍຢູ່ສະເໝີ:

ເຖິງວ່າຮ່າງກາຍຈະມີຂະບວນການເຜົາຜານພະລັງງານດ້ວຍຕົນເອງ ແຕ່ກໍຢ່າລືມວ່ານຳມື້ມັນນັບຈະເສື່ອມປະສິດທິພາບລົງຕາມໄວອາຍຸ ສະນັ້ນ, ການເຄື່ອນໄຫວຮ່າງກາຍເປັນປະຈຳຈະຊ່ວຍກະຕຸ້ນການເຜົາຜານໄຂມັນ ແລະເຮັດໃຫ້ເຮົາຮູ້ສຶກຄ່ອງແຄ້ວບໍ່ຄ່ອຍປວດເມື່ອຍຕາມຕົນໂຕ ໂດຍສະເພາະບັນດາຄົນທີ່ນັ່ງຢູ່ຫ້ອງລ້າຫ້ອງການ ທ່ານອາດຈະຍ່າງໄປກິນເຂົ້າແທນການໃຊ້ລົດ, ຂຶ້ນຂັນໄດແທນການໃຊ້ລິບ, ຫຼືລຸກຈັບນັ້ນບາຍນີ້ດ້ວຍຕົນເອງແທນທີ່ຈະຫາໃຊ້ຄົນອື່ນ.

3. ກິນອາຫານປົກກະຕິ ຢ່າອົດອາຫານເປັນເດັດຂາດ:

ການອົດອາຫານຢ່າງໜັກເຮັດໃຫ້ຮ່າງກາຍຂາດຄວາມສຳດຸນ, ປະລິມານນ້ຳຕານໃນເມັດເລືອດຫຼຸດລົງກະທັນຫັນ ເຮັດໃຫ້ຮ່າງກາຍຕ້ອງສ້າງສານເຄມີອອກມາກະຕຸ້ນການຜະລິດ ລວມໄປເຖິງລະບົບຍ່ອຍອາຫານ ແລະເຜົາຜານກໍເກີດອາການສັບສົນ ດີບໍ່ດີຖ້າຫາກທ່ານອົດອາຫານຈົນເກີດໜ້າມືດຕາລາຍ ຄາບຕໍ່ໄປອາດກິນຫຼາຍກວ່າເກົ່່າຊ້ຳອີກ. ສະນັ້ນ, ຢ່າພະຍາຍາມຫຼຸດນ້ຳໜັກດ້ວຍວິທີນີ້ ໂດຍສະເພາະໄວລຸ້ນທີ່ພວມຕ້ອງການສານອາຫານໄປຫຼໍ່ລ້ຽງເຊວສະໝອງ ແລະອະໄວຍະວະອື່ນໃນຮ່າງກາຍ.

4. ຫຼຸດຜ່ອນນ້ຳຕານ, ອາຫານຈືນ, ໄຂມັນ:

 ດັ່ງທີ່ພວກເຮົາຮູ້ນັ້ນລະອາຫານປະເພດນີ້ເປັນສັດຕູຕໍ່ຫຸ່ນອັນສວຍງາມ ທັງກໍ່ໃຫ້ເກີດໂລກໄພອີກຫຼາຍຢ່າງ ຄວນຫຮັບປະທານແຕ່ໜ້ອຍໆໂດຍເລືອກນ້ຳຕານຈາກຜັກໝາກໄມ້, ນ້ຳມັນທຳມະຊາດເຊັ່ນ ນ້ຳມັນໝາກກອກ, ນ້ຳມັນງາ, ນ້ຳມັນລຳເຂົ້າ ເຊິ່ງຈະລະລາຍງ່າຍ ແລະມີປະໂຫຍດຕໍ່ຮ່າງກາຍ.

5. ດື່ມນ້ຳຫຼາຍໆ:

ໂດຍສະເພາະກ່ອນຮັບປະທານແອາຫານຈະເຮັດໃຫ້ອີ່ມໄວຂຶ້ນ, ນ້ຳຊ່ວຍໃຫ້ຜິວພັນຊຸ່ມຊື່ນ ແລະຂັບສານພິດອອກຈາກຮ່າງກາຍ. ຖ້າໃຜຢາກຫຼຸດນ້ຳໜັກຢ່າໃຫ້ຮ່າງກາຍຂາດນ້ຳເດັດຂາດ ໂດຍສະເພາະໃນໄລຍະອອກກຳລັງກາຍ.

6. ຫຼີກລ້ຽງຄວາມຄຽດ:

ຄວາມຕຶງຄຽດເຮັດໃຫ້ຮ່າງກາຍສ້າງສານເຄມີທີ່ມາຂັດຂວງຕໍ່ການເຜົາຜານພະລັງງານ ແລະບາງຄັ້ງຄວາມຄຽດຈະເຮັດໃຫ້ທ່ານຮັບປະທານອາຫານ ແລະດື່ມເຫຼົ້າເບຍຫຼາຍຂຶ້ນ.

7. ນອນຫຼັບໃຫ້ພຽງພໍ:

ຂະນະທີ່ນອນຫຼັບຢ່າງແຈບຈົມ ໂດຍສະເພາະໄລຍະ 22:00-02:00 ສະໝອງຈະຜະລິດຮໍໂມນທີ່ຊ່ວຍເຜົາຜານພະລັງງານ ແລະສ້ອມແຊມສ່ວນທີ່ຊຸດໂຊມພາຍໃນຮ່າງກາຍ ເຮັດໃຫ້ທ່ານຕື່ນມາຢ່າງສົດຊື່ນກະປີ້ປະເປົ່າຕະຫຼອດມື້.

 

ທີ່ມາ ວາລະສານມະຫາຊົນ