7ສິ່ງທີ່ເຮົາຄວນຖິ້ມ ເພື່ອກ້າວເຂົ້າສູ່ ອານາຄົດທີ່ດີກວ່າ

7ສິ່ງທີ່ເຮົາຄວນຖິ້ມ ເພື່ອກ້າວເຂົ້າສູ່ ອານາຄົດທີ່ດີກວ່າ   1. ຢຸດໃຊ້ຄຳເວົ້າໃນທາງລົບໃຫ້ຕົນເອງຊະ!  ເຮົາມັນບໍ່ດີ ເຮົາມັນບໍ່ໄດ້ເລຶ້ອງ ເຮົາບໍ່ມີທາງເຮັດໄດ້ດອກ ຢຸດທຳຮ້າຍໂຕເອງໄດ້ແລ້ວດ້ວຍຄຳເວົ້າພວກນີ້ ຕ້ອງເລືອກທີ່ຈະຄິດວ່າໂຕເອງດີພໍ ແຂງແກ່ງ ສາມາດເຮັດຫຍັງກໍ່ໄດ້ຖ້າຫາກຢາກເຮັດ ແລະ ເລິ່ມຊື່ນຊົມໂຕເອງ ຕັ້ງຕົ້ນໃນປີນີ້ ເປັນປີທີ່ຈະບໍ່ເວົ້າບໍ່ຄິດລົບກັບໂຕເອງ  ແລະເຮັດມັນຕໍ່ໄປເລື້ອຍໆ ທຸກປີ ເພາະຖ້າຫາກວ່າເຈົ້າທັບຖົມຄວາມຄິດລົບໆໃສ່ໂຕເອງຫລາຍເທົ່າໃດ ເສັ້ນທາງທີ່ຈະໄປຮອດເປົ້າໝາຍທີ່ຕັ້ງ ອາດຈະຍາກລຳບາກກວ່າເກົ່າດ້ວຍຊຳ້ ສະນັ້ນຄວນຫັນມາໃຫ້ກຳລັງໃຈໂຕເອງແນ່ ພ້ອມກັບໂອບກອດໂຕເອງແນ່ມັນຈະເປັນເລື່ອງທີ່ດີຫລາຍ 2. ໂຍນຊິງຊັ່ງນຳ້ໜັກຖິ້ມໄປເລີຍ  ທ່ານຍິງຄົນໃດທີ່ມັກໃຈຈົດໃຈຈໍ່ກັບຊິງຊັ່ງນຳ້ໜັກຫລາຍຊັ່ງໄດ້ທຸກມື້ ມື້ລະ3ເທື່ອຫລັງກິນເຂົ້າ ຂໍບອກໄດ້ເລີຍວ່າມັນເປັນການບັ່ນທອນສຸຂະພາບຈິດຂອງໂຕທ່ານເອງ ຈະເຮັດໃຫເປັນຄົນທີ່ໝົກມຸ້ນກັບໂຕເລກຫລາຍເກີນໄປ ທັງໆທີ່ບໍ່ໄດ້ ຊື້ເລກ ຫລື ຫຸ້ນ ເລີຍກໍ່ຕາມ ເພາະເລື່ອງນີ້ໝໍຍັງຢືນຢັນວ່າ ການເຮັດແບບນີ້ມັນປຽບດັ່ງສັດຕູຂອງເຈົ້າເລີຍກໍ່ວ່າໄດ້ ບອກໄດ້ເລີຍວ່າ ຕົວເລກທີ່ຢູ່ເທິງຊິງຊັ່ງນັ້ນ ບໍ່ແມ່ນໂຕຊີ້ວັດວ່າເຈົ້າອອກກຳລັງກາຍຫນັກເທົ່າໃດ ເພາະບາງຄົນຫນັກກ້າມເນື້ອ ແລະ ທີ່ສຳຄັນຢ່າໃຫ້ຕົວເລກພຽງແຕ່ 2 ຫຼື 3 ຫລັກນັ້ນ ມາເຮັດໃຫ້ເຈົ້າຕ້ອງຄຽດເລີຍ 3. ຫຍຸດນັບແຄລໍຣີ່ຈາກອາຫານໄດ້ແລ້ວ  ກວ່າຈະກິນຫຍັງເຂົ້າໄປໄດ້ແຕ່ລະຢ່າງນັ້ນ ຕ້ອງມານັ່ງເບິ່ງນັ່ງຄຳນວນຈຳນວນແຄລໍຣີ່ອາຫານທີ່ຈະກິນເຂົ້າໄປປານກັບວ່າແຂ່ງຂັນກັນຄິດໄລ່ເລກ ຖ້າມັນເມື່ອຍຫລາຍກະເຊົາດີກວ່າ ຄິດຄືກັນບໍ່ວ່າການນັດແຄລໍຣີ່ແບບນີ້ ບໍ່ໄດ້ເຮັດໃຫ້ມີຄວາມສຸກກັບການກິນເລີຍ ກິນອັນນີ້ກະຕຸ້ຍ ກິນອັນນັ້ນກະຕຸ້ຍ ມີຫລາຍວິທີໃນການລົດນຳ້ໜັກໂດຍບໍ່ຕ້ອງມານັ່ງນັບແຄລໍຣີ່ແບບນີ້ ພຽງແຕ່ຮູ້ຈັກເລືອກກິນກໍ່ເຮັດບໍ່ຕ້ອງມາກັງວົນເລື່ອງແບບນີ້ອີກແລ້ວ 4. ຢ່າຝຶນອອກກຳລັງກາຍແບບທີ່ໂຕເອງບໍ່ມັກ  ຖ້າຫາກວ່າການອອກກຳລັງກາຍທີ່ເຮັດໃຫ້ເຮົາເບື່ອກໍ່ຄວນປ່ຽນ ແລະ ຢ່າຝຶນດີກວ່າ ລອງຊອກຫາການອອກກຳລັງກາຍແບບໃຫມ່ໆເລື້ອຍໆ ຈົນກວ່າຈະເຫັນການອອກກຳລັງກາຍທີ່ເຈົ້າມັກແທ້ໆ ດຽວນີ້ການອອກກຳລັງກາຍມີຫລາຍແບບ ຮູບແບບໃຫມ່ຫລາຍຢ່າງ ຢ່າຟ້າວຫມົດກຳລັງໃຈເດີ້ ການທີ່ມີສຸຂະພາບທີ່ມີທັງກາຍແລະໃຈ ມັນເປັນເລື່ອງທີ່ສຳຄັນຫລາຍ ບໍ່ຈຳເປັນຕ້ອງຝຶນຮ່າງກາຍຫລືຝຶນໃຈເຮັດໃນສິ່ງທີ່ບໍ່ມັກເລີຍ 5. ຜັກທີ່ບໍ່ມັກ ກໍ່ບໍ່ກິນ  ບໍ່ແມ່ນສະໜັບສະໜຸນໃຫ້ເຈົ້າເປັນເດັກນ້ອຍທີ່ບໍ່ກິນຜັກເດີ້ ແຕ່ ຜັກ ຫມາກໄມ້ຢູ່ໃນໂລກນີ້ມີຫລາຍແນວ ບໍ່ຈຳເປັນຕ້ອງພະຍາຍາມບອກໂຕເອງວ່າຜັກມີປະໂຫຍດຫລາຍຊຳ່ໃດແລ້ວເຮົາຕ້ອງກິນມັນ ແຕ່ຖ້າວ່າທໍລະມານຕໍ່ການກິນ ກະພຽງແຕ່ຫາຜັກແນວທີ່ກິນງ່າຍ ແຊບ ແລະ ໂຕເອງຈະຕ້ອງມັກ ດີກວ່າ 6. ຄວາມຄຽດຈົ່ງອອກໄປ!  ຄວາມຄຽດມັນເປັນສິ່ງທີ່ຮ້າຍແຮງກວ່າທີ່ເຈົ້າຄິດອີກ ເພາະສົ່ງຜົນເສຍທັງຮ່າງກາຍ ແລະ ຈິດໃຈ ຄວາມຄຽດສາມາດ ເຮັດໃຫ້ນຳ້ໜັກຂຶ້ນ ທ້ອງອືດ ເກີດຄວາມເຈັບປວດທາງກາຍ ມີປັນຫາທາງຜິວ    ສ່ວນທາງໃຈເດ ມັນແນ່ນອນຢູ່ແລ້ວທີ່ຈະເຮັດໃຫ້ຈິດໃຈເຮົາຫົດຫູ່ໄປພ້ອມ ສະນັ້ນເຮົາຄວາມຫາແນວເຮັດ ເພື່ອເປັນການຜ່ອນຄາຍ ເພື່ອຄວາມສະບາຍໃຈ ອອກກຳລັງກາຍ ຫລື ຫລິ້ນດົນຕີ ອັນໃດກໍ່ໄດ້ ຂໍພຽງແຕ່ມັນສາມາດ ບັນເທົາຄວາມຄຽດລົງໄດ້ 7. ອັນໃດທີ່ບໍ່ຈຳເປັນກໍ່ບໍ່ຄວາມແບກມັນໄວ້ດີກວ່າ  ມີຫຍັງກໍ່ຕາມທີ່ເຈົ້າກຳລັງແບກໄວ້ນັ້ນໂດຍບໍ່ຈຳເປັນເລີຍ ທັງເລື່ອງຂອງຄວາມສຳພັນທີ່ບໍ່ຊັດເຈນ ຮູ້ສຶກບໍ່ດີ ວຽກທີ່ເຮັດແລ້ວບໍ່ໄດ້ຮູ້ສຶກດີ ບໍ່ຢາກຕື່ນເຊົ້າແລ້ວຕ້ອງມາເຮັດວຽກ ຫລາຍໆຢ່າງພວກນີ້ ທ່ານຄວາມຈະປ່ອຍໄປເລີຍດີກວ່າ ຢ່ານຳພາລະພວກນີ້ມາຜູກມັດເຮົາຈົນອີ່ລຸງຕຸງນັງ ບໍ່ສາມາດແກ້ມັນໄດ້ ເປັນທາງຕັນເຈົ້າໄວ້ທີ່ຈະໄປສູ່ເປົ້າໝາຍຊ້າກວ່າເກົ່າ ເຮັດໃນສິ່ງທີ່ໄດ້ພັດທະນາໂຕເຈົ້າເອງ ພັດທະນາຄວາມຄິດ ຍ່າງຕາມຄວາມຝັນ ຖ້າຮັກແລະເຊື່ອໝັ້ນໃນໂຕເອງ ກໍ່ບໍ່ຕ້ອງເສຍໃຈກັບສິ່ງທີ່ຄິວ່າໂຕບໍ່ຄູ່ຄວນດອກ!!