5 ໂລກ​ທີ່​ມາພ້ອມ​ອາ​ກາດ​ຮ້ອນໆ​

5 ໂລກ​ທີ່​ມາພ້ອມ​ອາ​ກາດ​ຮ້ອນໆ​

ມື້​ນີ້​ຈຶ່ງ​ມາ​ບອກ​ວ່າ​ມີ​ 5 ໂລກ ທີ່​ມາພ້ອມ​ກັບ​ອາ​ກາດ​ຮ້ອນ​ເພື່ອ​ໃຫ້​ເຈົ້າ​ໄດ້​ຮູ້​ຂໍ້​ມູນ​ ພ້ອມ​ຮັບ​ມື​ມັນ​ໃຫ້​ໄດ້​ແລະ​ປ້ອງ​ກັນ​ໃຫ້​ດີ​ທີ່ສຸດ​

1.ຮ້ອນ​ສຸດໆ​ ໄມ​ເກນ​ຂຶ້ນ​

ມີ​ຜົນ​ການ​ວິໄຈ​ບອກ​ວ່າ​ ອາ​ກາດ​ທີ່​ຮ້ອນ​ຂຶ້ນ​ທຸກ​ໆ​ 5 ອົງ​ສາ​ເຊ ​ຈະ​ເຮັດໃຫ້​ ໄມ​ເກນ​ຈະເພີ່ມ​ຂຶ້ນ​ເຖິງ​ 7.5% ເນື່ອງ​ຈາກ​ຫຼອດ​ເລືອດ​ແດງ​ໃນ​ສະຫມອງ​ເກີດ​ການ​ບີບ​ແລະ​ຄາຍ​ຕົວ​ຫລາຍກວ່າ​ປົກກະຕິ​ຈົນ​ເຮັດໃຫ້​ເກີດ​ ອາການ​ປວດ​ຫົວ​ຢ່າງ​ຮຸນແຮງ​ ຍິ່ງ​ເຮັດວຽກ​ໃນ​ຫ້ອງ​ແອ​ແລ້ວ​ອອກ​ໄປ​ພົບ​ອາ​ກາດ​ຮ້ອນ​ ຍິ່ງ​ເຮັດໃຫ້​ອາການ​ໄມ​ເກນແຮງ​ຂຶ້ນ​

ວິທີ​ປ້ອງ​ກັນ​  ຫາກ​ຈຳ​ເປັນ​ຕ້ອງ​ຢູ່ໃນ​ອາ​ກາດ​ຮ້ອນ​ ລອງ​ດື່ມ​ນ້ຳ​ເຢັນ​ໄປ​ດ້ວຍ​ ຈະ​ຊ່ວຍ​ຄາຍ​ຄວາມ​ຮ້ອນ​ແລະ​ບໍ່​ເຮັດໃຫ້​ປວດ​ຫົວ​ ແຕ່​ຖ້າ​ສາມາດ​​ຫຼັບ​ຫລື​ນອນ​ຫຼັບ​ຕາ​ນິ່ງ​ໆ​ ບຶດໜຶ່ງ​ອາການ​ກໍ​ຈະ​ດີ​ຂຶ້ນ​ໄດ້​ເອງ​

2. ຮ້ອນ​ຈັດ​ ຂາດ​ນ້ຳ​

ໃນ​ຊ່ວງ​ທີ່​ອາ​ກາດ​ຮ້ອນ​ເຫື່ອ​ຈະ​ອອກ​ຫລາຍກວ່າ​ປົກກະຕິ​ ຫາກ​ດື່ມ​ນ້ຳ​ບໍ່​ພໍ​ກໍ​ອາດ​ຂາດ​ນ້ຳ​ແລະ​ສົ່ງ​ຜົນ​ໃຫ້​ຮ່າງກາຍ​ອ່ອນ​ເພຍ​ ໂດຍ​ສາມາດ​ສັງເກດ​ອາ ການ​ຂາດ​ນ້ຳ​ໄດ້​ຈາກ​ຍ່ຽວ​ ຫາກ​ມີ​ສີ​ເຫຼືອງ​ເຂັ້ມ​ແລະ​ມີກິ່ນ​ສະແດງ​ວ່າ​ເຈົ້າ​ດື່ມ​ນ້ອຍ​ ແລະ ​ຮ່າງກາຍ​ກຳ​ລັງ​ຂາດ​ນ້ຳ​

ວິທີ​ປ້ອງ​ກັນ​  ດື່ມ​ນ້ຳ​ໃຫ້​ໄດ້​ມື້​ລະ​ 1.5-2 ລີດ​ ໂດຍ​ການ​ກິນຈິບເລື້ອຍ​ໆ​ ທັງ​ມື້​ ບໍ່​ແມ່ນ​ດື່ມບາດ​ດຽວ​ໃຫ້​ຄົບ​ຈຳນວນ​ລີດ​ເທົ່າ​ນັ້ນ​ ແລະ ​ທີ່​ສຳຄັນ​ຄວນ​ງົດ​ດື່ມ​ນ້ຳ​ເຢັນ​ຈັດ​ ເພາະ​ຈະ​ເຮັດໃຫ້​ຮ່າງກາຍ​ປັບ​ອຸນຫະພູມ​ບໍ່​ທັນ​ແລະ​ປ່ວຍ​ໄດ້​ງ່າຍ​ຂຶ້ນ​

3. ຮ້ອນ​ຈັດ​ ເປັນ​ລົມ​

ຄວາມ​ຮ້ອນ​ເປັນ​ສາ​ເຫດ​ໃຫ້​ເລືອດ​ໄຫຼ​ໄປ​ທີ່​ຜິວ​ໜັງ​ເພີ່ມ​ຂຶ້ນ​ແລະ​ໄຫຼ​ໄປ​ທັງຫມົດ​ທີ່​ຂາ​ ຈຶ່ງ​ເຮັດໃຫ້​ຄວາມ​ດັນ​ເລືອດ​ຕົກລົງ​ຢ່າງ​ວ່ອງໄວ​ ເລືອດ​ໄປ​ລ້ຽງ​ສະຫມອງ​ບໍ່​ພໍ​ ເຮັດໃຫ້​ໜ້າ​ມືດ​ເປັນ​ລົມ​ ແຕ່​ບໍ່​ມີ​ອັນຕະລາຍ​ຫຍັງ​ ຕ່າງ​ຈາກ​ Heat Stroke ຊຶ່ງ​ເກີດ​ຈາກ​ການ​ຕາກ​ແດດ​ດົນ​ໆ​ ຈົນ​ອຸນຫະພູມ​ຮ່າງກາຍ​ສູງ​ເກີນ​ 40 ອົງ​ສາ​​ ເຮັດໃຫ້​ຊັອກ​ ໜ້າ​ມືດ​ ວິງ​ວຽນ​ ລະບົບ​ຕ່າງ​ໆ​ ພາຍ​ໃນ​ຮ່າງກາຍ​ບໍ່​ເຮັດວຽກ​ ໂດຍ​ກ່ອນ​ໜ້າ​ນີ້​ອາການ​ Heat Stroke ມັກ​ພົບ​ໃນ​ຊາວ​ຕ່າງ​ຊາດ​ແລະ​ນັກ​ກີລາ​ ແຕ່​ດຽວ​ນີ້ຄົນ​ທົ່ວ​ໄປ​ເລີ່ມ​ເປັນ​ຫລາຍ​ຂຶ້ນ​ແລ້ວ​

ວິທີ​ປ້ອງ​ກັນ​  ຫຼີກ​ລ້ຽງ​ການ​ຕາກ​ແດດ​ຮ້ອນ​ໆ​ ນອນ​ພັກ​ຜ່ອນ​ແລະ​ດື່ມ​ນ້ຳ​ໃຫ້​ພຽງ​ພໍ​ ທີ່​ສຳຄັນ​ຄວນ​ງົດ​ດື່ມ​ເຄື່ອງ​ດື່ມ​ແອນ​ກໍ​ຮໍ​ໃນ​ຊ່ວງ​ໜ້າ​ຮ້ອນ​ ເພາະ​ຈະ​ເຮັດໃຫ້​ເສັ້ນ​ເລືອດ​ຂະຫຍາຍ​ແລະ​ຮ່າງກາຍ​ສູນ​ເສຍ​ນ້ຳ​ຫລາຍ​ຂຶ້ນ​

4. ຮ້ອນ​ແລ້ວ​ ທ້ອງ​ເສຍ​

ອາ​ກາດ​ຮ້ອນ​ໆ​ ແບບ​ນີ້​ ເຊື້ອ​ພະຍາດ​ຕ່າງ​ໆ​ ຈະ​ເລີນ​ເຕີບໃຫ​ຍ່ໄດ້​ເປັນ​ຢ່າງ​ດີ​ ໂດຍ​ສະເພາະ​ໃນ​ອາຫານ​ທີ່​ຈະ​ບູດ​ເສຍ​ງ່າຍ​ກວ່າປົກ​ກະ​ຕິ​ ຊຶ່ງ​ຖ້າ​ກິນ​ອາຫານ​ບໍ່​ສະ​ອາດ​ ອາການ​ທ້ອງ​ເສຍ​ກໍ​ຈະ​ຕາມ​ມາ​ໄດ້​ງ່າຍ​ຂຶ້ນ​ ນີ້​ຈຶ່ງ​ເປັນ​ອີກ​ເລື່ອງ​ທີ່​ເຮົາ​ຄວນ​ໃສ່​ໃຈ​ເມື່ອ​ເຂົ້າ​ສູ່​ລະ​ດູຮ້ອນ​

ວິທີ​ປ້ອງ​ກັນ​  ຢຶດ​ຫຼັກ​ກິນ​ຮ້ອນ​ ບ່ວງ​ກາງ​ ລ້າງ​ມື​ ເພື່ອລົດ​ການ​ຕິດ​ເຊື້ອ​ ບໍ່​ກິນ​ອາຫານ​ທີ່​ຕັ້ງ​ຖິ້ມ​ໄວ້​ດົນ​ໆ​ ພະຍາຍາມ​ດື່ມ​ນ້ຳ​​ບໍ່​ໃສ່​ນ້ຳ​ແຂງ​ ເພາະ​ຈາກ​ການ​ສຳ​ຫຼວດ​ພົບ​ວ່າ​ສິ່ງ​ທີ່ປົນ​ເປື້ອນ​ເຊື້ອ​ພະຍາດ​ທີ່​ເຮັດໃຫ້​ທ້ອງ​ເສຍ​ຫລາຍ​ທີ່ສຸດ​ກໍຄື​ນ້ຳ​ແຂງ​

5. ຮ້ອນ​ຈັດ​ ເປັນ​ຫວັດ​

ໃນ​ຊ່ວງ​ທີ່​ອາ​ກາດ​ຮ້ອນ​ຈັດ​ແບບ​ນີ້​ ຢ່າ​ພະຍາຍາມ​ຄາຍ​ຮ້ອນ​ດ້ວຍ​ຫຍັງ​ທີ່​ເຢັນ​ສຸດ​ໆ ເພາະ​ອຸນຫະພູມ​ທີ່​ປ່ຽນ​ແປງ​ກະ​ທັນ​ຫັນ​ຈະ​ເຮັດໃຫ້​ຮ່າງກາຍ​ປັບ​ຕົວ​ບໍ່​ທັນ​ຈົນ​ເຮັດໃຫ້​ ເປັນ​ຫວັດ​ ເຈັບ​ຄໍ​ຫລື​ເປັນ​ໄຂ້​ໄດ້​ງ່າຍໆ​

ວິທີ​ປ້ອງ​ກັນ​ ດື່ມ​ນ້ຳ​ທີ່​ອຸນຫະພູມ​ຫ້ອງ​ ຫາກ​ຢາກ​ກິນ​ໄອ​ສະ​ຄ​ຮີມຫຼື​ກະ​ແລັມກໍ​ຕ້ອງ​ຄ່ອຍ​ໆ​ ກິນ​ເພື່ອ​ໃຫ້​ຮ່າງກາຍ​ຄ່ອຍ​ໆ​ປັບ​ຕົວ​ ຫາກ​ຢູ່ໃນ​ທີ່​ທີ່​ມີ​ອາ​ກາດ​ເຢັນ​ກໍ​ຕ້ອງ​ເຮັດໃຫ້​ຮ່າງກາຍ​ອົບ​ອຸ່ນ​ ແລະ ​ຢ່າ​ອອກ​ໄປ​ຕາກ​ແດດ​ທັນ​ທີ​ທີ່​ອອກຈາກ​ຫ້ອງ​ ແຕ່​ຄວນ​ຫາ​ທີ່ຮົ່ມ​ເພື່ອ​ໃຫ້​ຮ່າງກາຍ​ໄດ້​ປັບ​ອຸນຫະພູມ​ກ່ອນ​ຈະ​ອອກ​ໄປພົບ​ກັບ​ຄວາມ​ຮ້ອນ​