5 ປ ຊ່ວຍປ້ອງກັນການເຈັບເປັນ ຍ້ອນພະຍາດໄຂ້ຍຸງ

 

ພະ​ແນກ​ສາທາລະນະ​ສຸກ ນະຄອນຫຼວງ​ວຽງ​ຈັນ ໄດ້​ລາຍງານ​ໃຫ້​ຮູ້​ວ່າ: ເລີ່ມ​ແຕ່​ອາທິດ​ທີ 1 ມາ​ຮອດ​ອາທິດ​ທີ 46 ຂອງ​ປີ 2015 ເຫັນ​ວ່າໃນ 9 ຕົວ​ເມືອງໃນ​ນະຄອນຫຼວງ​ວຽງ​ຈັນ ມີ​ຄົນເຈັບເປັນ​ພະຍາດ​ໄຂ້ຍຸງ​ລາຍ​ທັງໝົດ 112 ກໍລະນີ ແຕ່​ບໍ່​ມີ​ກໍລະນີເສຍ​ຊີວິດ ໃນ​ນັ້ນ: ເມືອງ​ຈັນທະບູ​ລີ ມີ 23 ກໍລະນີ ໄຊ​ເຊດ​ຖາ 34 ກໍລະນີ ສີ​ໂຄດ​ຕະບອງ 18 ກໍລະນີ ສີ​ສັດຕະ​ນາກ 5 ກໍລະນີ ນາຊາຍ​ທອງ 15 ກໍລະນີ ໄຊ​ທານີ 15 ກໍລະນີ ຫາດ​ຊາຍ​ຟອງ 2 ກໍລະນີ ສັງ​ທອງ ແລະ ເມືອງ​ປາກ​ງື່ມ​ຍັງບໍ່​ພົບ​ກໍລະນີ ເຖິງ​ວ່າ​ສະພາບ​ພະຍາດ​ໄຂ້ຍຸງ​ລາຍ​ມາ​ຮອດ​ປັດ​ຈຸບັນ​ ຈະ​ຢູ່​ໃນ​ສະພາບ​ປົກກະຕິ​ກໍ່ຕາມ ແຕ່​ກໍ່​ຂໍ​ໃຫ້​ປະຊາຊົນ​ບັນດາເຜົ່າ​ໃນ​ທົ່ວ​ປະເທດ ຕ້ອງ​ເພີ່ມຄວາມ​ເອົາໃຈໃສ່​ໃນ​ການ​ປ້ອງກັນ​ພະຍາດ​ດັ່ງກ່າວ ​ສືບຕໍ່​ໄປເລື້ອຍໆ ສິ່ງ​ສຳຄັນ​ທີ່​ພວກ​ເຮົາຄວນ​ເອົາໃຈໃສ່​ແມ່ນ​ການ​ປະຕິ​ບັດ​ຕາມ​ຫຼັກການ 5 ປ ທີ່​ກະຊວງ​ສາທາລະນະ​ສຸ​ກວາງ​ອອກ ເພື່ອ​ຫຼີກ​ລ່ຽງ​ການ​ເຈັບເປັນ​ຍ້ອນພະຍາດ​ດັ່ງກ່າວ.

       ສຳລັບ​ຫຼັກການ 5 ປ ທີ່ທຸກ​ຄົນ​ກໍ່​ຄື​ທຸກ​ຄອບຄົວ​ຕ້ອງ​ປະຕິບັດ​ໃຫ້​ໄດ້​ເປັນ​ປະຈຳ​ນັ້ນ ປະກອບມີ: ປິດ​ຝາ​ພາຊະນະ​ທີ່​ເກັບ​ນ້ຳ​ໃນເຮືອນ ແລະ ນອກ​ເຮືອນ ເພື່ອ​ບໍ່ໃຫ້​ຍຸງ​ມາ​ໄຂ່​ໃສ່ ປ່ຽນ​ນ້ຳ​ໃນ​ພາຊະນະ ເຊັ່ນ: ເຕົ້າ​ດອກ​ໄມ້ ນ້ຳຮອງ​ຕີນ​ຕູ້ ຖ້ານ​ຮອງ​ຈອກ​ນ້ຳ ປ່ອຍ​ປາ​ຫາງ​ນົກ​ຍຸງເພື່ອ​ກິນໜອນ​ນ້ຳ ປັບປຸງ​ການ​ອະນາໄມ ສິ່ງແວດລ້ອມ​ອ້ອມ​ເຮືອນ​ບໍ່​ໃຫ້​ມີກະໂປະ ກະ​ປ໋ອງ ຢາງ​ຕີນລົດ​ເກົ່າທີ່​ມີ​ນ້ຳ​ຂັງ ປະຕິບັດ​ໃຫ້​ເປັນ​ນິໄສປະຈຳ​ທຸກໆ​ອາທິດ ຖ້າ​ເປັນໄຂ້ໃຫ້​ໄປ​ພົບ​ແພດ​ໝໍ​ດ່ວນ ຖ້າ​ຫາກທຸກ​ຄົນ​ປະຕິບັດ​ໄດ້​ຕາມ 5 ປ ຢ່າງເຂັ້ມ​ງວດ​ກໍ່​ຈະ​ສາມາດ​ຫຼຸດຜ່ອນ ແລະ ປ້ອງ​ກັນ​ການ​ເຈັບເປັນຈາກ​ພະຍາດ​ດັ່ງກ່າວ​ນີ້​ໄດ້.