4 ນັກໂທດຕ່າງຊາດແຫກຄຸກໃນອິນໂດເນເຊຍ

 

ນັກໂທດຕ່າງຊາດ 4 ຄົນຂຸດຂຸມລົບໜີອອກຈາກຄຸກຢູ່ເກາະບາຫຼີຂອງອິນໂດເນເຊຍເມື່ອວັນຈັນທີ່ຜ່ານມາ ໂດຍໜຶ່ງໃນນັ້ນເປັນນັກໂທດອົດສະຕຣາລີທີ່ເຫຼືອໂທດຈຳຄຸກໃນອີກບໍ່ເທົ່າໃດເດືອນ.

ສຳນັກຂ່າວຕ່າງປະເທດລາຍງານຈາກເມືອງເດນປາຊາປະເທດອິນໂດເນເຊຍເມື່ອວັນທີ 19 ມິຖຸນາວ່າ ນັກໂທດຕ່າງຊາດ 4 ຄົນຂຸດຂຸມລົບໜີອອກຈາກເຮືອນຈຳເຄໂຣໂບກັນໃນເມືອງເດນປາຊາຢູ່ເກາະບາຫຼີ ໂດຍຜູ່ຄົມຫາກໍຮູ້ການລົບໜີເມື່ອມີການກວດນັບຈຳນວນນັກໂທດຊ່ວງຕອນເຊົ້າຂອງວັນຈັນ.

ທ່ານ ແນງໂກລານ ຜູ່ບັນຊາການເຮືອນຈຳເຄໂຣໂບກັນກ່າວວ່າ ການກວດສອບພົບວ່າມີຂຸມອຸໂມງຂະໜາດ 50*75 ຊັງຕີແມັດຖືກຂຸດລອດກຳແພງດ້ານນອກຂອງເຮືອນຈຳ ອອກໄປຫາທໍ່ລະບາຍນຳ້ຂະໜາດຄວາມຍາວ 15 ແມັດທີ່ເຊື່ອມຕໍ່ອອກສູ່ຫົນທາງສາຍນອກ ເຊື່ອວ່ານັກໂທດໃຊ້ເວລາຂຸດໜີດົນກວ່າ 1 ອາທິດ ແລະ ສວຍໂອກາດໜີຂະນະທີ່ນັກໂທດສ່ວນໃຫຍ່ກຳລັງສວດມົນຕອນເຊົ້າ.

ນັກໂທດລົບໜີທັງ 4 ຄົນປະກອບ ຄອນ ເອັດເວິດ ເດວິດສັນ ອາຍຸ 33 ປີເປັນຄົນອົດສະຕຣາລີຖືກຈຳຄຸກ 1 ປີຈາກຄວາມຜິດຖານລັກລອບເຂົ້າເມືອງ ແລະ ມີກຳນົດພົ້ນໂທດໃນອີກບໍ່ເຖິງ 3 ເດືອນ, ດິມິຕາ ນິໂຄລອບ ອິວເຢບ ເປັນຄົນບູນກາລີອາຍຸ 43 ປີຖືກຈຳຄຸກ 7 ປີຕັ້ງແຕ່ປີ 2016 ຈາກຄວາມຜິດຖານຟອກເງິນ, ຊາຢີດ ໂມອຳເໝັດ ຊາອິດ ອາຍຸ 31 ປີຄົນອິນເດຍ ແລະ ຕີ໋ ກົກ ຄິງ ອາຍຸ 50 ປີຄົນມາເລເຊຍທັງສອງຄົນນີ້ຖືກໂທດໄລຍະຍາວຈາກຄະດີຢາເສບຕິດ.

ທ່ານ ແນງໂກລານ ກ່າວວ່າຕຳຫຼວດຈະລະດົມກຳລັງອອກຕິດຕາມໄລ່ລ່ານັກໂທດທັງ 4 ຄົນເຊິ່ງເຊື່ອວ່າຍັງຢູ່ເທິງເກາະບາຫຼີ ແລະ ບໍ່ໄກຈາກເຮືອນຈຳ.

ການລົບໜີອອກຈາກເຮືອນຈຳຖືເປັນເລື່ອງປົກກະຕິໃນອິນໂດເນເຊຍ ນັກໂທດລົ້ນຄຸກກາຍເປັນບັນຫາຂອງເຮືອນຈຳເກືອບທຸກແຫ່ງໃນປະເທດ ແລະ ນັກໂທດສ່ວນໃຫຍ່ກໍຖືກຄຸກໃນຄະດີຢາເສບຕິດ.

ເມື່ອອາທິດທີ່ຜ່ານມາ ນັກໂທດ 12 ຄົນລົບໜີອອກຈາກເຮືອນຈຳທີ່ແອອັດໃນແຂວງຈຳບີເທິງເກາະສຸມາຕຣາ ຫຼັງເກີດຝົນຕົກໜັກນຳ້ທ້ວມເຮັດໃຫ້ກຳແພງເຮືອນຈຳພັງຖະຫຼົ່ມ ແລະ ເມື່ອເດືອນທີ່ຜ່ານມານັກໂທດກວ່າ 440 ຄົນລົບໜີອອກຈາກເຮືອນຈຳເມືອງເປກັນບາຣູຢູ່ເກາະສຸມາຕຣາເຊັ່ນກັນ ຂະນະທີ່ມີຜູ່ຄຸມໃຫ້ນັກໂທດອອກນອກຫ້ອງຂັງເພື່ອສວດມົນ ແລະ ເຈົ້າໜ້າທີ່ສາມາດຕິດຕາມຈັບກຸມນັກໂທດຄືນໄດ້ປະມານເຄິ່ງໜຶ່ງ.