4ແຍກດົງໂດກຫາໄຟແດງຕານມີໄຊກຳລັງບຸກເບິກເຮັດເສັ້ນທາງໃຫ່ມ

ຫົວໜ້າພະແນກ ໂຍທາທິການ ແລະ ຂົນສົ່ງ ນະຄອນຫລວງວຽງຈັນ ທ່ານ ເດດສົງຄາມ ທຳມະວົງ ໄດ້ເປີດເຜີຍ ໃນໄລຍະຜ່ານມານີ້ວ່າ: ການກໍ່ສ້າງເສັ້ນທາງເບຕົງ ແຕ່ 4 ແຍກໄຟແດງດົງໂດກ ຫາ 4 ແຍກໄຟແດງບ້ານຕານມີໄຊ ໄດ້ເລີ່ມລົງມືກໍ່ສ້າງແລ້ວ ເມື່ອທ້າຍອາທິດຜ່ານມາ, ມີຄວາມຍາວປະມານ 2,5 ກິໂລແມັດ, ປູເບຕົງອັດແໜ້ນ ໜາປະມານ 23 ຊັງຕີແມັດ ແລະ ມີຄວາມກວ້າງ 28 ແມັດ, ໃນມູນຄ່າ 10 ລ້ານໂດລາສະຫະລັດ ຫລື ປະມານ 80 ຕື້ກີບ, ໂດຍນຳໃຊ້ງົບປະມານ ຈາກແຫລ່ງທຶນສຳລັບປັບປຸງພື້ນຖານໂຄງລ່າງ ໃນນະຄອນຫລວງວຽງຈັນ ຈຳນວນ 95 ລ້ານໂດລາ ສະຫະລັດ, ທີ່ກູ້ຢືມຈາກທະນາຄານ ເອັກຊິມແບງ (EXIM BANK) ສປ ຈີນ ແລະ ຄາດວ່າຈະໃຫ້ສຳເລັດການກໍ່ສ້າງ ໃນກາງປີ 2016 ທີ່ຈະມາເຖິງນີ້. ປັດຈຸບັນ ພວມດຳເນີນການຍົກຍ້າຍເສົາໄຟຟ້າ, ນ້ຳປະປາ ແລະ ສິ່ງກີດຂວາງອອກຈາກແລວ ເຂດກໍ່ສ້າງໃຫ້ສຳເລັດໂດຍໄວ.

ທ່ານ ເດດສົງຄາມ ທຳມະວົງ ເປີດເຜີຍຕື່ມວ່າ: ເສັ້ນທາງດັ່ງກ່າວ ແຕ່ເດີມມີຄວາມກວ້າງພຽງ 12 ແມັດ, ເປັນທາງປູຢາງທຳມະດາ ນຳໃຊ້ມາຫລາຍ 10 ປີແລ້ວ, ເປັນເສັ້ນທາງສາຍໜຶ່ງ ທີ່ມີຄວາມສຳຄັນຕໍ່ການສັນຈອນ ຂອງພາຫະນະ ເຂົ້າ-ອອກ ລະຫວ່າງຊານເມືອງ ແລະ ຕົວເມືອງ, ເປັນເສັ້ນທາງເຊື່ອມຕໍ່ການລຳລຽງຂົນສົ່ງ ລະຫວ່າງ ພາກເໜືອ ຫາ ພາກໃຕ້ໃນແຕ່ລະວັນ. ປັດຈຸບັນ ການສັນຈອນຕາມເສັ້ນທາງດັ່ງກ່າວ ແມ່ນມີຄວາມຫຍຸ້ງຍາກຫລາຍ, ຍ້ອນເສັ້ນທາງເປ່ເພ ຊຸດໂຊມຢ່າງໜັກ ມີຫລາຍຍ່ານເປັນຂຸມເລິກ, ຍາມຝົນຕົກເປັນບວກເປິເປື້ອນ, ແດດອອກເປັນຂີ້ຝຸ່ນໄຫງ່ເປັນບໍລິເວນກວ້າງ. ສ້າງຄວາມລຳບາກໃຫ້ແກ່ການ ດຳລົງຊີວິດຂອງຜູ້ຢູ່ອາໄສ ແລະ ຜູ້ສັນຈອນໄປມາ, ສະນັ້ນ ຈຶ່ງເຫັນວ່າມີຄວາມຈຳເປັນຮີບດ່ວນ ເພື່ອກໍ່ສ້າງເສັ້ນທາງດັ່ງກ່າວ ໃຫ້ມີມາດຕະຖານ ແລະ ສະອາດສວຍງາມ.

  

ທີ່ມາ CRI-FM93