3 ເມ​ນູຄີນ​ໆ​ ຈາກໝາກອຶ​ ກິນ​ເສີມ​ພູ​ມ​ຄຸ້ມ​ກັນ​ພະຍາດ​ ດີ​ຕໍ່​ລະບົບ​ຂັບ​ຖ່າຍ​ ເຮັດໃຫ້​ຜິວ​ບໍ່​ແກ່​ກ່ອນ​ໄວ

3 ເມ​ນູຄີນ​ໆ​ ຈາກໝາກອຶ​ ກິນ​ເສີມ​ພູ​ມ​ຄຸ້ມ​ກັນ​ພະຍາດ​ ດີ​ຕໍ່​ລະບົບ​ຂັບ​ຖ່າຍ​ ເຮັດໃຫ້​ຜິວ​ບໍ່​ແກ່​ກ່ອນ​ໄວ

ຫາກເວົ້າເຖິງ​ໝາກ​ອຶ​ເຊື່ອ​ວ່າຄົງ​ເປັນ​ພືດ​ຜັກ​ທີ່​ໃຜ​ຫຼາຍ​ໆ​ຄົນ​​ມັກ​ ດ້ວຍ​ລົດ​ຊາດ​ທີ່​ແຊບ​ ບວກ​ກັບ​ສັບພະຄຸນ​​ທີ່​ມີ​ໃນ​ໝາກ​ອຶ​ ແຖມ​ຍັງ​ສາມາດ​ນຳ​ມາ​ປະກອບ​ເປັນ​ອາຫານ​ໄດ້​ທັງ​ຄາວ​ ແລະ ​ຫວານ​ຫຼາກ​ຫຼາຍ​ເມ​ນູ​ອີກ​ດ້ວຍ​ ມື້​ນີ້​ເຮົາ​ລອງ​ມາ​ເຮັດ​ 3 ເມ​ນູ​ອາຫານ​ຄີນ​ຈາກ​ໝາກ​ອຶ​ທີ່​ຫຼາຍ​ໆ​ຄົນ​ມັກ​ ຮັບຮອງ​ວ່າ​ທັງ​ອິ່ມແຊບ ​ແລະ​ປະໂຫຍດ​ເຕັມໆ

3 ເມ​ນູ​ອາຫານ​ຄີນ​ຈາກ​ໝາກ​ອຶ​ມີ​ຫຍັງ​ດ້ວຍ​?

1. ໝາກ​ອຶ​ໜຶ້ງ​: ເອີ້ນວ່າ​ເປັນ​ເມ​ນູຄີນສຸດ​ໆ​ ຈາກ​ທຳມະຊາດ​ດ້ວຍ​ໝາກ​ອຶ​ເປັນ​ສຸດ​ຍອດ​ອາຫານ​ຂອງ​ຄົນ​ຮັກ​ສຸຂະພາບ​ຢູ່​ແລ້ວ​ ເຖິງວ່າ​ຈະ​ເປັນ​ເມ​ນູ​ທີ່​ສາມາດ​ເຮັດ​ຮັບປະທານ​ໄດ້​ງ່າຍໆ​ ແຕ່​ຫາກ​ໜຶ້ງ​ບໍ່​ຖືກ​ວິທີ​ກໍ​ອາດ​ເຮັດໃຫ້​ໝາກ​ອຶ​ແຂງ​ຮັບປະທານ​ບໍ່ແຊບ​ໄດ້​ໝາກ​ອຶ​ໜຶ້ງ​ 


ວິທີ​ການ​ໜຶ້ງ​ໝາກ​ອຶ​ແບບ​ງ່າຍໆ​ 
– ໃຫ້​ນຳ​ໝາກ​ອຶ​ມາ​ຊ່ອຍ​ເປັນ​ຊິ້ນ​ໆ​ ໂດຍ​ໃຫ້​ມີ​ຄວາມ​ໜາ​ໜ່ອຍໜຶ່ງ​ ຢ່າ​ໃຫ້​ຊິ້ນ​ນ້ອຍ​ຈົນ​ເກີນ​ໄປ​ ເພາະ​ການ​ຊ່ອຍ​ຊິ້ນ​ນ້ອຍ​ ແລະ​ ບາງ​ ຈະ​ເຮັດໃຫ້​ເວລາ​ໜຶ້ງ​ເນື້ອມັນ​ຊິເລະ​​ໄດ້​ງ່າຍໆ​
– ຈາກ​ນັ້ນ​ກໍ​ຄວ້ານ​ເມັດ​ອອກ​ໃຫ້​ໝົດ ແລ້ວ​ນຳ​ໄປ​ໜຶ້ງ​ປະ​ມານ​ 5–10 ນາ​ທີ​ ກະ​ເບິ່ງ​ຂະໜາດ​ຂອງ​ໝາກ​ອຶ​ທີ່​ເຮົາ​ຊ່ອຍ​ວ່າ​ໃຫຍ່​ຫຼື​ນ້ອຍ​ຫຼາຍ​ຂະໜາດ​ໃດ​ ພໍ​ຄົບ​ເວລາ​ເຮົາ​ກໍ​ຈະ​ໄດ້​ໝາກ​ອຶ​ໜຶ້ງ​ທີ່ແຊບ​ແລ້ວ​ 

 

2. ຊຸບ​ໝາກ​ອຶ​ ນີ້​ກໍ​ຈັດ​ເປັນ​ເມ​ນູ​ໝາກ​ອຶ​ແບບ​ຄີນ​ໆ​ ທີ່​ຫຼາຍ​ຄົນ​​ມັກ ວິທີ​ການເຮັດ​ກໍ​ສຸດແສນ​ງ່າຍ​ໆບໍ່​ຫຍຸ້ງ​ຍາກ​


ວິທີ​ເຮັດ​ຊຸບ​ໝາກ​ອຶ​ແບບ​ງ່າຍໆ​ 
– ໃຫ້​ກະກຽມ​ສ່ວນ​ປະສົມ​ ໄດ້​ແກ່​ ໝາກ​ອຶ​, ຫອມ​ຫົວ​ໃຫຍ່​, ເນີຍ​ສົດ​, ຫົວກາລົດ​, ເກືອ​ປົ່ນ​, ພິກ​ໄທ​, ນ້ຳ​ດື່ມຫຼື​ນ້ຳ​ຊຸບ​ ແລະ ​ນົມ​ສົດ
– ໃຫ້​ນຳ​ໝາກ​ອຶ​ມາປອກເປືອກ​ອອກ​ ລວມ​ໄປ​ເຖິງ​ການ​ຊ່ອຍ​ຫົວກາລົດ ແລະ​ຫອມ​ຫົວ​ໃຫຍ່​ ເມື່ອ​ສຳເລັດ​ຮຽບຮ້ອຍ​ລ້າງ​ດ້ວຍ​ນ້ຳ​ໃຫ້​ສະ​ອາດ​ 
– ຈາກ​ນັ້ນ​ກໍ​ນຳ​ໄປ​ຜັດ​ກັບ​ເນີຍ​ສົດ​ໃຫ້​ຫອມ​ຫົວ​ໃຫຍ່​ພໍ​ສຸກ​ ແລ້ວ​ເທ​ນ້ຳ​ຫຼື​ນ້ຳ​ຊຸບ​ລົງ​ໄປ​ໃຫ້​ທ່ວມ​ຈົນ​ເດືອດ​ກໍ່ຜ່ອນ​ໄຟ​ໃຫ້​ອ່ອນ​ລົງ​ ຖ້າ​ຈົນ​ຜັກ​ເລີ່ມ​ອ່ອນ​ 
– ສຳເລັດ​ແລ້ວ​ກໍ​ນຳ​ນ້ຳ​ຊຸບ​ໄປ​ປັ່ນ​ໃຫ້​ລະອຽດ​ ແລ້ວ​ກໍ​ນຳ​ລົງ​ໄປ​ຕົ້ມ​ໃນ​ໝໍ້​ອີກ​ເທື່ອ​ດ້ວຍ​ໄຟ​ອ່ອນ​ໆ​ ຄົນ​ໄປ​ເລື່ອຍ​ໆ​ ຈົນ​ໄດ້​ກໍ​ປຸງ​ລົດຊາດ​ດ້ວຍ​ພິກ​ໄທ​ແລະ​ເກືອ​ປົ່ນ​ຕາມ​ໃຈ​(ພະຍາຍາມ​ຢ່າ​ໃສ່ເກືອ​ໄດ້​ຍິ່ງດີ​ ເພາະ​ເກືອ​ມີ​ປະລິມານ​ໂຊ​ດຽມ​ ເຮັດໃຫ້​ເກີດ​ການ​ບວມ​ນ້ຳ​ໄດ້​) 
– ຈາກ​ນັ້ນ​ກໍ​ປະສົມ​ນົມ​ລົງ​ໄປ​ໜ້ອຍໜຶ່ງອແລ້ວ​ຄົນ​ໃຫ້​ເຂົ້າ​ເປັນ​ເນື້ອດຽວ​ກັນ​ກັບ​ນ້ຳ​ຊຸບ​ໝາກ​ອຶ​ ສຳເລັດ​ແລ້ວ​ກໍ​ຕັກ​ໃສ່​ຖ້ວຍ​ນ້ອຍ​ໆ​ ພຽງເທົ່ານີ້​ກໍ​ໄດ້​ຊຸບ​ໝາກ​ອຶ​ຮ້ອນ​ໆ​ ພ້ອມ​ຮັບປະທານແລ້ວ​ 


3. ໝາກ​ອຶ​ຜັດ​ໄຂ່​ ເມ​ນູ​ນີ້​ກໍ​ເປັນ​ອີກ​ໜຶ່ງ​ເມ​ນູກຄີນທີ່​ດີ​ຕໍ່​ສຸຂະພາບ​​​ ແຖມລົດ​ຊາດ​ແຊບ ສາມາດ​ເຮັດ​ຮັບປະທານ​​ໄດ້​ງ່າຍໆ​ ຢູ່​ບ້ານ​​ 

ວິທີ​ເຮັດ​ເມ​ນູ​ໝາກ​ອຶ​ຜັດ​ໄຂ່​ແບບ​ງ່າຍໆ​ 

– ຂັ້ນທຳອິດ​ກໍ່​ມາກະກຽມ​ສ່ວນ​ປະສົມ​ໃຫ້​ພ້ອມ​ ໄດ້​ແກ່​ ໝາກ​ອຶ​ຊ່ອຍ​ຊິ້ນ​ນ້ອຍ​ໆ​, ກະ​ທຽມ​ສັບ​, ໄຂ່​ໄກ່​, ນ້ຳ​ຕານຊາຍ​ນ້ອຍໆ​, ຊີ​ອິ໊ວ​ຂາວ​, ນ້ຳ​ມັນ​ໝາກກອກ​ 
– ຈາກ​ນັ້ນ​ກໍ່​ນຳ​ກະ​ທຽມ​ສັບ​ລົງ​ໄປ​ໃນ​ກະ​ທະຫຼືໝໍ້ ​ດ້ວຍ​ໄຟ​ປານ​ກາງ​ຈົນ​ຫອມ​ ແລ້ວ​ຕາມ​ລົງໄປດ້ວຍ​ໄຂ່​ໄກ່​ພໍໃຫ້​ສຸກ​ 
– ສຳເລັດ​ແລ້ວ​ກໍ​ເທ​ໝາກ​ອຶ​ລົງ​ໄປ​ຜັດ​ໃຫ້​ເຂົ້າ​ກັນ​ ພ້ອມ​ປຸງລົດ​ຊາດດ້ວຍ​ນ້ຳ​ຕານ​ຊາຍ​ນ້ອຍໆ​ ແລະ ​ຊີ​ອິ໊ວ​ຂາວ​ ຊິມ​ລົດ​ຊາດ​ຕາມ​​ໃຈ​ ຄຸກ​ໃຫ້​ເຂົ້າ​ກັນ​ແລ້ວ​ກໍ​ຍົກ​ຂຶ້ນ​ຕັກ​ໃສ່​ຈານ​ພ້ອມ​​ຮັບປະທານ​ 

ປະໂຫຍດ​ຂອງ​ໝາກ​ອຶ​ມີ​ຫຍັງ​ດ້ວຍ​? 
– ຊ່ວຍ​ບຳ​ລຸງ​ຜິວ​ພັນ​ໃຫ້​ງາມ​ ເພາະ​ມີ​ສານ​ເບ​ຕ້າ​ແຄ​ໂຣ​ທີນ​ສູງ​ 
– ດີ​ຕໍ່​ລະບົບ​ຂັບ​ຖ່າຍ​ ເພາະ​ມີ​ກາກ​ໃຍ​ອາຫານ​ຢູ່​ສູງ​ 
– ເຮັດໃຫ້​ຜິວ​ບໍ່​ແກ່​ກ່ອນ​ໄວ​ ເພາະ​ຊ່ວຍ​ເສີມ​ສ້າງ​ຄໍລາ​ເຈນ​ໃຕ້​ຜິວ​ໜັງ​ໄດ້​ດີ​
– ຊ່ວຍ​ບຳ​ລຸງ​ກະດູກ​ແລະ​ແຂ້ວ​ ເພາະ​ມີ​ແຄລ​ຊຽມ​ສູງ​ 
– ຊ່ວຍຫຼຸດ​ລະ​ດັບ​ນ້ຳ​ຕານ​ແລະ​ຄໍ​ເລດ​ເຕີ​ຣໍໃນ​ເລືອດ​ໄດ້​​ 
– ຊ່ວຍ​ໃຫ້​ຮ່າງກາຍ​ມີ​ພູ​ມ​ຄຸ້ມ​ກັນ​ພະຍາດ​ຕ່າງ​ໆ​ ໄດ້​ດີ​ຫຼາຍ​ໆ​ ເນື່ອງ​ຈາກ​ມີ​ວິ​ຕາ​ມິນ​ຊີ​ຢູ່​ສູງ​

ເຫັນ​ແລ້ວບໍວ່າ​ງ່າຍໆ​ ເຮົາ​ກໍ​ຈະ​ໄດ້​ເມ​ນູຄີນ​ເພື່ອ​ສຸຂະພາບ​ ​ໝາກ​ອຶ​ມາພ້ອມ​ຮັບປະທານ​ ແຖມ​ຍັງ​ໄດ້​ປະໂຫຍດ​ຈາກ​ໝາກ​ອຶ​ຫຼວງ​ຫຼາຍ​ ລອງ​ເຮັດ​ຮັບປະທານ​ເບິ່ງ ຮັບຮອງ​ວ່າ​ດີ​ຕໍ່​ສຸຂະພາບ​ແຖມ​ບໍ່ຕຸ້ຍ​ອີກ​