3 ຍັກລີກຜູ້ດີເລັງດຶງເຄນເສີມຄົມຫຼັງສັນຍາໃໝ່ນັກເຕະກັບໄກ່ຢຸດຊົ່ວຄາວ

 

ແມນເຊສເຕີ ຢູໄນເຕັດ, ແມນເຊສເຕີ ຊີຕີ ແລະ ເຊວຊີ ພ້ອມກັນເປີດເສິກນອກສະໜາມຍາດໂຕ ແຮຣີ ເຄນ ຫົວຫອກຂອງ ທັອດແນມ ຮັອດສະເປີ ຫຼັງການເຈລະຈາສັນຍາໃໝ່ຂອງນັກເຕະກັບຕົ້ນສັງກັດຍັງບໍ່ລົງຕົວ ແລະ ເລືອກທີ່ຈະຢຸດການເຈລະຈາເອົາໄວ້ກ່ອນ.

 

ແມນເຊສເຕີ ຢູໄນເຕັດ, ແມນເຊສເຕີ ຊີຕີ ແລະ ເຊວຊີ 3 ທີມຍັກໃຫຍ່ຂອງ ພຣີເມຍລີກ ອັງກິດຕົກເປັນຂ່າວວ່າກຽມເປີດເສິກນອກສະໜາມຍາດ ແຮຣີ ເຄນ ດາວຍິງຂອງ ທັອດແນມ ຮັອດສະເປີ ມາເສີມທັບຫຼັງຈາກທີ່ການເຈລະຈາລະຫວ່າງກອງໜ້າທີມຊາດອັງກິດກັບຕົ້ນສັງກັດຍັງບໍ່ລົງຕົວ ຈາກການລາຍງານເມື່ອວັນຈັນທີ່ຜ່ານມາ.

 

ລາຍງານຈາກ “ເດິຊັນ” ສື່ຂອງອັງກິດລະບຸວ່າ “ໄກ່ເດືອຍທອງ” ບໍ່ຍິນດີທີ່ຈະຈ່າຍຄ່າເມື່ອຍໃຫ້ກັບນັກເຕະທີ່ປັດຈຸບັນຮັບຢູ່ 60,000  ປອນຕໍ່ອາທິດໃນລະດັບທີ່ສູງສຸດຂອງສະໂມສອນ.

 

ຫຼ້າສຸດການຫາລືລະຫວ່າງຕົວແທນຂອງ ເຄນ ກັບ ສເປີ ຍັງບໍ່ລົງຕົວ ແລະ ອາດຈະຕ້ອງຢຸດສະຫງັກການຕໍ່ສັນຍາອອກໄປກ່ອນ ດ້ວຍເຫດນີ້ເຮັດໃຫ້ ແມນ ຢູໄນເຕັດ, ແມນ ຊີຕີ ແລະ ເຊວຊີ ເຖິງກັບຫູພຶງຕາຕັ້ງ ແລະ ຈັບຕາເບິ່ງສະຖານະການຂອງນັກເຕະຢ່າງໃກ້ຊິດ.

 

ທັງນີ້ປັດຈຸບັນ ເຄນ ມີສັນຍາຢູ່ກັບທີມຈົນຮອດປີ 2020 ຂະນະທີ່ເມື່ອລະດູການທີ່ຜ່ານມາເຂົາໂຊຟອມໄດ້ແບບເທບໂດຍການຍິງໄປເຖິງ 25 ປະຕູພ້ອມໄດ້ລາງວັນດາວຊັນໂວ ພຣີເມຍລີກໄປຄອງ.