3 ຄ້າຍມວຍດັງ ອຸປະຖຳ 6 ລ້ານກີບ ໃຫ້ທັບນັກກິລາມວຍລາວ ຮ່ວມ ຊີເກມ

3 ຄ້າຍມວຍດັງ ໃນນະຄອນຫຼວງວຽງຈັນ ກໍ່ຄື ຂັວນໃຈສີໂຄດ, ສອນທອງຄໍາ ແລະ ນົບພະລິດ ໃຫ້ການສະໜັບສະໜູນເງິນ ຈໍານວນ 6 ລ້ານກີບ ຊ່ວຍທັບນັກກິລາມວຍທີມຊາດລາວ ກຽມອອກເດີນທາງໃນວັນທີ 22 ສິງຫານີ້ ເຂົ້າຮ່ວມລ່າຫຼຽນຄຳ ງານມະຫະກໍກິລາຊີເກມ ຄັ້ງທີ 29 ຫຼື ກົວລາລຳເປີເກມ  ລະຫວ່າງວັນທີ 19-30 ສິງຫາ 2017.

ພິທີມອບ-ຮັບເງິນ ຈຳນວນ 6 ລ້ານກີບ ໃຫ້ທັບນັກກິລາມວຍລາວ ເຂົ້າຮ່ວມກົວລາລຳເປີ ເກມ 2017 ໃນຄັ້ງນີ້ ໄດ້ມີຂຶ້ນ ເມື່ອວັນທີ 17 ສິງຫາ ຜ່ານມາ ເປັນການກ່າວມອບຂອງ ທ່ານ ນາງ ສຸພັດຕາ ກຸນນະວົງ ເຈົ້າຂອງຄ້າຍມວຍ ຂັວນໃຈສີໂຄດ ຕາງໜ້າກ່າວຮັບແມ່ນທ່ານ ສາຍສະໝອນ ໄຊຍະສອນ ປະທານສະຫະພັນມວຍແຫ່ງຊາດລາວ ມີບັນດາ ຄະນະບໍລິຫານງານ ສະຫະພັນມວຍແຫ່ງຊາດລາວ ແລະ ພະນັກງານ ທັງສອງພາກສ່ວນ ທີ່ກ່ຽວຂ້ອງເຂົ້າຮ່ວມ.

ໃນການເຂົ້າຮ່ວມແຂ່ງຂັນ ງານມະຫະກໍກິລາຊີເກມ ຄັ້ງທີ 29 ທີ່ປະເທດມາເລເຊຍ ເປັນເຈົ້າພາບໃນຄັ້ງນີ້ ສະຫະພັນມວຍແຫ່ງຊາດລາວ ໄດ້ສົ່ງນັກກິລາເຂົ້າຮ່ວມ ລ່າຫຼຽນຄຳ ທັງໝົດ 5 ຄົນ ປະກອບມີ ທ້າວ ທອງບາງ ເຊື້ອພົມ ສົມຍານາມ ລາຍເພັດນ້ອຍ ປກສ ຮຸ່ນນໍ້າໜັກ 54 ກິໂລກຣາມ, ແສງສຸລີ (ສອນນະລາຍ) ລູກບ້ານດຸງ ຮຸ່ນນໍ້າໜັກ 57 ກິໂລກຣາມ, ສຸກັນ ໄຕປັນຍາວົງ (ນ້ອງໂອ) ປກສ ຮຸ່ນນໍ້າໜັກ 63,5 ກິໂລກຣາມ, ລາດສະສັກ ສຸລິຍະວົງ (ເຈົ້າສອງເມືອງ ຫຼື ເສືອໃຫຍ່) ຈາກແຂວງຈຳປາສັກ ຮຸ່ນນໍ້າໜັກ 67 ກິໂລກຣາມ ແລະ ດຳຊຸມພອນ ຂຽວສະຫວາດ (ສະຫຼາມດໍາ) ກະຊວງປ້ອງກັນປະເທດ ຫຼື ກອງທັບ ຮຸ່ນນໍ້າໜັກ 71 ກິໂລກຣາມ.

ຂໍ້ມູນຈາກ: http://laosportnews.com