27 ຄອບຄົວທຸກຍາກເມືອງຈຳພອນ ຈະໄດ້ຮັບການຊ່ວຍເຫຼືອຈາກນັກທຸລະກິດ

ດັ່ງນັ້ນວັນທີ 31 ທັນວາ 2015 ທີ່ຫ້ອງປະຊຸມໂຮງງານຜະລິດນ້ຳດື່ມ ແລະນ້ຳກ້ອນປາໂລມາຄຳ ໄດ້ມີພິທີເຊັນບົດບັນທຶກຮ່ວມກັນຈັດຕັ້ງປະຕິບັດໂຄງການລຶບລ້າງຄວາມທຸກຍາກ (ລຶບລ້າງຄອບຄົວຄົນຂໍທານ) ລະຫວ່າງທ່ານ ສີທົນ ນັນທະລາດ ເຈົ້າເມືອງຈຳພອນ ກັບທ່ານ ເກຍ ອູ໊ສິດທິດເດດ ໂດຍຊ້ອງໜ້າທ່ານ ດຣ ສຸພັນ ແກ້ວມີໄຊ ເຈົ້າແຂວງສະຫວັນນະເຂດ, ມີພະແນກການອ້ອມຂ້າງແຂວງ, ອຳນາດການປົກຄອງເມືອງ ແລະແຂກທີ່ກ່ຽວຂ້ອງເຂົ້າຮ່ວມ. ຕາມບົດບັນທຶກໄດ້ລະບຸວ່າ: ເຈົ້າຂອງໂຮງງານນ້ຳດື່ມ ແລະນ້ຳກ້ອນປາໂລມາຄຳ ຍິນດີໃຫ້ການຊ່ວຍເຫຼືອເຂົ້າກິນເປັນເວລາ 1 ປີ, ຮູບການຊ່ວຍເຫຼືອນັ້ນແມ່ນໃຫ້ຜ່ານການອອກແຮງງານເອົາ ໂດຍຄິດໄລ່ຄ່າອອກແຮງງານສົມທຽບໃສ່ລາຄາເຂົ້າ (ຕະຫຼາດ) ແລະນອກຈາກນີ້ຈະໄດ້ພິຈາລະນາແກ້ໄຂໃນສິ່ງທີ່ຈຳເປັນທີ່ສຸດເຊັ່ນ: ເຂົ້າ, ເກືອ, ປາແດກ, ເຄື່ອງມືທຳການຜະລິດ ທັງນີ້ກໍ່ເພື່ອປູກຈິດສຳນຶກໃຫ້ພວກເຂົາເຈົ້າມີການຊີນເຄີຍກັບການອອກແຮງງານ, ມອບໃຫ້ເມືອງຂຶ້ນແຜນສ້າງກິດຈະກຳໃຫ້ເຂົາເຈົ້າອອກແຮງງານເປັນປະຈຳເພື່ອໃຫ້ພວກເຂົາມີເຂົ້າກິນຕະຫຼອດເຊັ່ນ: ໃຫ້ພວກເຂົາພາກັນປຸກເຮືອນໃຫ້ຄອບຄົວທີ່ຍັງບໍ່ມີເຮືອນທີ່ແໜ້ນໜາ, ກໍ່ສ້າງວິດຖ່າຍ, ຂຸດນ້ຳສ້າງ, ກໍ່ຝາໂຮງງານ, ຂົນຝຸ່ນລົງໃສ່ນາ..., ລະດູນາແຊງຕົ້ນປີ 2016 ນີ້ຫາກທັງໝົດ 27 ຄອບໄດ້ທຳການຜິດລະລິດ ໃນເວລາໄດ້ຮັບຜົນຜະລິດແມ່ນໃຫ້ຄິດໄລ່ໃຫ້ກັບພວກເຂົາຕາມແຮງງານ ແລະແບ່ງໄວ້ຈຳນວນໜຶ່ງເພື່ອເປັນກອງທຶນບັນເທົາຄວາມທຸກຍາກຂາດເຂີນໃຫ້ກັບເຂົາເຈົ້າເອງ.
ໂອກາດນີ້ທ່ານ ດຣ ສຸພັນ ແກ້ວມີໄຊ ເຈົ້າແຂວງສະຫວັນນະເຂດ ໄດ້ຍ້ອງຍໍຊົມເຊີຍຕໍ່ເຈົ້າຂອງໂຮງງານຜະລິດນ້ຳດື່ມ ແລະນ້ຳກ້ອນປາໂລມາຄຳ ທີ່ໃຫ້ການຊ່ວຍເຫຼືອຄັ້ງນີ້, ໂຄງການນີ້ມີຜົນປະໂຫຍດຢ່າງມະຫາສານເວົ້າສະເພາະແມ່ນການຕັດສິນໃຈເສຍສະຫຼະໂດຍບໍ່ຫວັງສິ່ງຕອບແທນໃດໆ ຜ່ານມາອາດເວົ້າໄດ້ວ່າບໍ່ມີນັກທຸລະ ກິດຄົນໃດເຂົ້າມາຊ່ວຍເຫຼືອໂດຍຮູບການແບບນີ້; ນອກຈາກນັ້ນທາງອຳນາດການປົກຄອງເມືອງທີ່ໄດ້ຮັບການຊ່ວຍເຫຼືອຈະຕ້ອງໄດ້ກຽມແຜນການອັນລະອຽດເພື່ອເຮັດແນວໃດໃຫ້ໂຄງການດັ່ງກ່າວນີ້ໄດ້ຮັບຜົນປະໂຫຍດສູງສຸດກໍ່ຄືການເຮັດໃຫ້ຈຳນວນຄອບຄົວດ່ັງກ່າວສາມາດມີວຽກເຮັດງານທຳຄົງທີ່, ບໍ່ໄປຫາຂໍທານ ແລະກ້າວໄປເຖິງການລຶບລ້າງຄອບຄົວທຸກຍາກໄດ້ໃນຊຸມປີຕໍ່ໜ້ານີ້.
ຂ່າວ-ພາບ: ພຸດທະສິນ