22 ເມນູອາຫານຄີນງ່າຍໆ ເຮັດງ່າຍກິນງ່າຍໄດ້ສຸຂະພາບ

ນັກ​ກິນ​ອາຫານ​ຄີນ​ມື​ໃໝ່​ຄົງ​ກຳ​ລັງ​ມອງ​ຫາ​ເມ​ນູຄີນເປັນຕາ​ກິນເຮັດ​ງ່າຍ​ໆ​ ແລະ ​ກິນ​ບໍ່​ຍາກ​ ຕ້ອງ​ພົບ​ກັບ​ເມ​ນູ​ອາຫານ​ຄີນ​ກວ່າ​ 20 ເມ​ນູ​ນີ້​ ຮັບຮອງ​ເດັດ​ໂດນ​ໃຈ​.
ສຳລັບ​ ຄົົນທີ່​ຫາກໍ່​ຫັນ​ມາສົນ​ໃຈ​ການ​ກິນ​ອາຫານ​ສຸຂະພາບ​ຄື​ອາຫານ​ຄີນ​ຫລື​ຄີນ​ຟູ້ດ​(Clean Food)ກໍ​ຄົງ​ກຳ​ລັງ​ມອງ​ຫາ​ອາຫານ​ຄີນ​ເປັນຕາກິນ ແຕ່​ເມ​ນູຄີນ​ບາງ​ເມ​ນູ​ກໍ​ກິນ​ຍາກເກີນ​ເຮັດ​ໃຈ​ກິນ​ກໍ​ລຳ​ບາກ​ສຸດ​ໆ​ ມື້​ນີ້ທາງຄິດອອກເຮົາເລີຍ​ລວບລວມ​ເມ​ນູ​ອາຫານ​ຄີນ​ຟູ້ດ​ກວ່າ​ 20 ເມ​ນູ​ທີ່​ທັງ​ເຮັດ​ງ່າຍ​ໆ​ ລົດ​ຊາດ​ຖືກ​ປາກ​​ເຮັດໃຫ້​ການ​ກິນ​ອາ ຫານ​ຄີນ​ເປັນ​ເລື່ອງ​ທີ່​ງ່າຍ​ຂຶ້ນ​ຖ້າພ້ອມ​ແລ້ວຈະ​ເລີ່ມ​ກິນ​ຄີນ​ກັນ​ແລ້ວ​ກໍ​ຕາມ​ມາ​​.

1. ຄີນ​ຟູ້ດ​ອິນ​ເຕີ​​
1. ແຊວມ​ອນ​​​ນ້ຳ​ມັນ​ນ້ອຍ​ ໂຮຍ​ງາ​
2. ຜັກ​ລວກ​ຢ່າງ​ກະ​ຫຼ່ຳ​ດອກ​ ຫົວກາລົດ​ແລະ​ໜໍ່​ໄມ້​ຝ​ຮັ່ງ​
3. ເຂົ້າ​ຕົ້ມ​ນ້ຳ​ອັນຊັນ​
4. ນ້ຳ​ອັນ​ຊັນ​ປະສົມ​ນ້ຳ​ມະ​ນາວ​​

2. ອາຫານ​ເຊົ້າ​ຄີນ​ໆ​ ສຳລັບ​ຄອບຄົວ​
1. ຂະໜົມ​ປັງ​ໄຂ່​ດາວ​ : ນຳຂະໜົມ​ປັງ​​ມາ​ຕັດ​ສີ່​ຫຼ່ຽມໃຈ​ກາງເອົາ​ອອກ​ ຕັ້ງ​ກະ​ທະ​​ໃສ່​ນ້ຳ​ມັນ​ 1 ບ່ວງກາເຟ ພໍ​ຮ້ອນ​ໃສ່​ຂະໜົມ​ປັງ​ລົງ​ໄປ​ຕອກ​ໄຂ່​ໃສ່​ຕາມ​ລົງ​ໄປ​ບ່ອນທີ່ເຮົາ ຕັດອອກຄ່ອຍ​ໆ​ ຕັດ​ໄຂ່​ຂາວ​ທີ່​ເປັນສ່ວນເກີນ​ເອົາອອກໃຫ້ສວຍ​ງາມ​ພໍ​ສຸກ​ໄດ້​ທີ່​ຕັກ​ໃສ່​ຈານ​​ ໂຮຍ​ເກືອພິກ​ໄທ​ກ່ອນ​ຮັບປະທານ​.
2. ຂະໜົມ​ປັງ​ແຊນ​ວິດ​ທູ​ໜ້າ​ : ປີ້ງຂະໜົມ​ປັງ​​ກັບ​ກະ​ທະ​​ດ້ວຍ​ໄຟ​ອ່ອນໆ​ພໍມັນກອບປະ​ໄວ້​ ຈາກ​ນັ້ນ​ມາ​ເຮັດ​ສະ​ລັດ​ທູ​ໜ້າ​ໂດຍ​ໃຊ້​ທູ​ໜ້າ​ໃນ​ນ້ຳ​ແຮ່​ປະສົມ​ກັບຫົວກາລົດ​ແລະ ​ໝາກແຕ່ງ​ຍີ່​ປຸ່ນ​ຊອຍເປັນລູກ​ເຕົ໋າ​ນ້ອຍ​ໆ​ ບີບ​ໝາກ​ນາວ​ລົງ​ໄປ​​ໜ້ອຍໜຶ່ງ​ຄົນໃຫ້​ເຂົ້າ​ກັນ​ຈາກ​ນັ້ນ​ຕັກ​ໂຮຍ​​ເທິງ​ຂະໜົມ​ປັງ​ທີ່​ກຽມ​ໄວ້​.
3. ຂະ­ໜົມ​ປັງ​ໝາກເຂືອ​ເລັ່ນ+ແຊ​​ວມ​ອນ : ປີ້ງ​​ຂະ­ໜົມ​ປັງ​ກັບ​​ກະ​ທະ​ດ້ວຍ​ໄຟ​ອ່ອນໆ​ພໍ​ມັນກອບ​ປະ​ໄວ້ ຈາກ​ນັ້ນ​ນຳ​ໝາກ​ເຂືອ​ເລັ່ນຊອຍ​ວົງແວ່ນ​ວາງ​ລົງ​ໄປ ​​ໂຮຍ​ໜ້າ ດ້ວຍ​ອັນ​ມອນ​ກິນ​ຄູ່​ກັນ ຄວາມ​ຫວານ​ຫອມ​ຈາກ​ໝາກ​ເຂືອ​ເລັ່ນ​ກັບ​ອັນ​ມອນ​​ສະໄລ​​ແລະ​ຂະ­ໜົມ​ປັງກອບໆເຂົ້າ­ກັນ​ໃຊ້​ໄດ້​ດີ.
4. ຂະໜົມ​ປັງ​​ຫມາກໄມ້​ສົດ​ : ​ປີ້ງຂະໜົມ​ປັງ​​ກັບ​ກະ​ທະດ້ວຍ​ໄຟ​ອ່ອນໆ​ພໍມັນກອບປະ​ໄວ້​ ນຳ​ແບັ​ກ​ເບີ​​ຣີ​, ກີ​ວີ​ແລະ​ໝາກກ້ຽງ​ວາງ​ລົງ​ໄປ​ ລາດ​ນ້ຳ​ເຜີ້ງ​ໜ້ອຍ​ໜຶ່ງຈະໄດ້ ເມນູແຊບ​ທີ່ສຸດ​.

3. ໄກ່​ມ້ວນໝາກແຕງແລະ​ຫົວກາລົດ​
ລົດ​ຊາດ​ຈະ​ຈືດ​ໜ້ອຍ​ໜຶ່ງ​ແຕ່​ຈະ​ຫອມ​ພິກ​ໄທ​ດຳ​ແລະ​ໄດ້​ກິ່ນ​ຫອມ​ໆ​ຂອງໝາກແຕງ,ຫົວກາລົດ,​ພາດ​ເລ​​ແລະ​ລົດ​ຊາດສົ້ມ​ຈາກ​ເລມ​ອນ​ເມ​ນູ​ນີ້​ເນັ້ນ​ໜ້າ​ຕາ​ດີ​ມີ​ສຸຂະ ພາບ​ບໍ່​ເນັ້ນ​ແຊບປານໃດ.
ສ່ວນ​ປະສົມ​
ຊີ້ນ​ເອິກ​ໄກ່​ສັບ​
ພິກໄທ​ດຳ​
ໝາກແຕງ​ຍີ່​ປຸ່ນ​
ຫົວກາລົດ
ເລມ​ອນ​ສ​ະໄລ​​
ພາດ​ເລ​
ອັນ​ມອນ​ສະ​ໄລ​​
ວິທີ​ເຮັດ​
1. ນຳ​ຊີ້ນເ​ອິກ​ໄກ່​ສັບ​ໄປ​ລົງ​ໃນ​ກະ​ທະ​ໃສ່​ນ້ຳ​ມັນ​ໝາກ​ກອກ​ພໍ​ເຄືອບ​ກະ​ທະ​ ຈາກ​ນັ້ນ​ໂຮຍ​ພິກ​ໄທ​ດຳ​ລົງ​ໄປ​ພຽງແຕ່​ຫອມ​ເທົ່າ​ນັ້ນ​.
2. ໃຊ້​ມີດ​ປອກ​ຫມາກໄມ້​ປອກມໝາກແຕງ​ຍີ່​ປຸ່ນ​ກັບ​ຫົວກາລົດ​ເປັນ​ເສັ້ນ​ຍາວໆ​ ແລ້ວ​ນຳ​ໄກ່​ທີ່​ເຮົາ​ຜັດ​ໄວ້​ມາ​ວາງ​ເທິງ​ເສັ້ນໝາກແຕງ​ແລະ​ຫົວກາລົດມ້ວນ​ແລ້ວ​ວາງ​ເທິງ​ເລມ​ອນ​ສະ​ໄລແຕ່ງ​ໜ້າດ້ວຍ​ພາດ​ເລ​​ແລະ​ອັນ​ມອນ​ສະໄລ​ຈະ​ໄດ້​ອາຫານ​ເຊົ້າ​ເບົາໆ​​.
ໝາຍ​ເຫດ​ : ຫົວກາລົດ​ຊີ້ນ​ຈະ​ແຂງ​ຕ້ອງ​ໃຊ້​ໄມ້​ເສບ​ເອົາ​ໄວ້​ຈະ​ໄດ້​ບໍ່​ຫຼຸດ​​

4. Clean Chicken Steak
ສ່ວນ​ປະສົມ​
ຊີ້ນ​ເອິກ​ໄກ່​
ເກືອ​ແລະ​ພິກ​ໄທ​ດຳ​
ໝາກ​ເຂືອ​ເລັ່ນ​ລາ​ຊິ​ນີ​
ເລມ​ອນ​ສ​ະໄລ​​
ໜໍ່​ໄມ້​ຝ​ຣັ່ງ​ລວກ​
ໝາກສາລີ​ຫວານ​ຕົ້ມ​
ອັນ​ມອນ​ສະໄລ​
ວິທີ​ເຮັດ​          
1. ເອິກ​ໄກ່​ຜ່າເຄີ່ງນຳ​ໄປ​ລົງໃນ​ກະ​ທະ​ໃສ່​ນ້ຳ​ມັນ​ໝາກກອກ​ພໍ​ຕິດ​ກະ​ທະ​ຈົນສຸກ​ເຫຼືອງ​ ຈາກ​ນັ້ນ​ໂຮຍ​ເກືອ​ແລະ​ພິກ​ໄທ​ດຳ​.
2. ນຳ​ໝາກ​ເຂືອ​ເລັ່ນ​ລາ​ຊິ​ນີ​, ເລມ​ອນ​ສະ​ໄລ​ແລະ​ໜໍ່​ໄມ້​ຝ​ຣັ່ງ​ລວກ​ໄປ​​ປີ້ງໃນ​ກະ​ທະ​ເພື່ອ​ຄວາມ​ຫອມ​ກຽມ​ໄວ້.​    
3. ໝາກສາລີຫວານ​ຕົ້ມ​ຝານ​ສະເພາະ​ເມັດ​ ກຽມ​ໄວ້​
4. ອັນ​ມອນ​ສະໄລ​​ ກຽມ​ໄວ້​        
5. ຈາກ​ນັ້ນ​ນຳ​ທຸກ​ຢ່າງ​ມາ​ຈັດ​ໃສ່​ຈານ​ຕາມ​ມັກ​ ພ້ອມ​ຮັບປະທານ​
ໝາຍ​ເຫດ​ : ເມ​ນູນີ້​​ໃສ່​ເກັດ​ຂະໜົມ​ປັງ​ຄົ່ວ​ສະ​ມຸນ​ໄພ​ໄປ​ດ້ວຍ​ ແຕ່​​ບໍ່​ໄດ້​ໃສ່​ໃນ​ສ່ວນ​ປະສົມ​ໃຫ້​(ເພາະ​ບໍ່​ຄີນ​)ເພື່ອນ​ໆ​ເຮັດ​ກໍ​ໃສ່​ພຽງ​ສ່ວນ​ປະສົມ​ຄີນ​ໆ​.​

5. Clean Fruit Salad
ແອັບ​ເປີ້ນ,​ກີ​ວີ​ ກ້ວຍ​ຫອມ​ແລະ​ເຜືອກ​ຕົ້ມ​ ໂຮຍ​ດ້ວຍ​ອັນ​ມອນ​ສ​ະໄລ,​ ງາ​ຂາວ​ ແລະ​ພາດ​ເລ​​ສັບ​​ໜ້ອຍໜຶ່ງ​ເສີບພ້ອມກັບໝາກກ້ຽງ​ແຊບອິ່ມ​ບໍ່​ຕຸ້ຍນຳ​.

6. ຂະໜົມ​ປັງ​ປິ້ງ​ໜ້າ​ເຜືອກ​ບົດ​ກັບ​ຫມາກໄມ້​ສົດ​
ນຳ​ຂະໜົມ​ປັງ​ໂຮນ​ວີດ​ໄປ​ປິ້ງ​ແລ້ວ​ທາ​ດ້ວຍ​ເຜືອກ​ບົດ​ໂຣຍ​ງາ​ຂາວ​, ງາ​ດຳ​ ແລະ​ອັນ​ມອນ​ສະໄລ​​ເ​ສີບພ້ອມ​ສະ​ລັດ​ຫມາກໄມ້ເຊັ່ນ​ ກີ​ວີ,​ ແອັບ​ເປີ້ນ,​ ໝາກເຂືອເລັ່ນ​ລາ​ຊິ​ນີ​ ແລະ​ເລມ​ອນ.​

7. ​​ສະ​ເຕັກເ​ອິກ­ໄກ່​ກັບ​​ປ​າ​ກັບ​ເຜືອກ​ຕົ້ມ​ແລະ​​ສະ​ລັດ​ຜັກ
ສ່ວນ​ປະສົມ​
ຊີ້ນ​ເອິກ​ໄກ່​
ປາ​
ເກືອ​ແລະ​ພິກ​ໄທ​
ເຜືອກ​ຕົ້ມ​
ຜັກ​ສ​ະລັດ​
ໝາກເຂືອ​ເລັ່ນລາ​ຊິ​ນີ​
ວິທີ​ເຮັດ​
1. ນຳເ​ອິກ​ໄກ່​ແລະ​ປາ​ໄປ​ລົງໃນ​ກະ​ທະ​ທີ່​ໃສ່​ນ້ຳ​ມັນ​ປະ​ມານ​ 1 ບ່ວງກາເຟ​ ໂດຍ​ໃສ່​ເລມ​ອນ​ລົງ​ໄປ​​ດ້ວຍ​ເພື່ອ​ເພີ່ມ​ສະເໜ່ດ້ວຍ​ກິ່ນຫອມ​ໆ​ແລະ​ລົດ​ສົ້ມ​ຈາກ​ເລມ​ອນ​.
2. ພໍປາ​ແລະ​ໄກ່​ສຸກ​ ຈັດ​ໃສ່​ຈານ​ໂຮຍ​ເກືອ​ແລະ​ພິກ​ໄທ​ດຳ​ປົ່ນ​ນ້ອຍໆ​(ນ້ອຍ​ຫລາຍໆ​ເພາະ​ຈານ​ນີ້​ເຮົາ​ຈະ​ກິນ​ເນື້ອປາ​ແລະ​ໄກ່​ໂດຍ​ລົດ​ດັ່ງເດີມ​ໆ​ຂອງ​ມັນ​ຈະ​ຫວານ​ໜ້ອຍ ໜຶ່ງຢູ່​ແລ້ວ​ ເພີ່ມ​ລົດ​ຊາດ​ຫອມ​ຫວານ​ສົ້ມ​ໜ້ອຍໜຶ່ງຈາກ​ເລມ​ອນໂດຍ​ໃສ່​ເກືອ​ແລະ​ພິກ​ໄທ​ເພື່ອ​ເພີ່ມ​ລົດ​ຊາດ​ອີກ​ໜ້ອຍ​ໜຶ່ງ​)
3. ຈັດ​ເຜືອກ​ຕົ້ມ​, ຜັກ​ສະ​ລັດ​ ແລະ ​ໝາກ​ເຂືອ​ເລັ່ນລາ​ຊິ​ນີ​ໃສ່​ຈານຈະ​ໄດ້​ຄວາມ​ຫອມ​ຈາກ​ເຜືອກ​ຕົ້ມ​ຄວາມ​ຫວານ​ອົມ​ສົ້ມ​ຈາກ​ໝາກ​ເຂືອ​ເລັ່ນ​ລາ​ຊິ​ນີ​ແລະ​ຄວາມ​ກອບ​ຈາກ​ຜັກ​ສະ​ລັດ.​
ໝາຍ​ເຫດ​ : ອິ່ມ​ແຊບແປກ​ໄປ​ອີກ​ແບບ​ເພາະ​ລົດ​ຈະ​ບໍ່​ຈັດ​​ແຕ່​ໄດ້​ສານ​ອາຫານ​ຄົບ​ແຕ່​ເກືອບບໍ່​ມີ​ໄຂ​ມັນ​ເລີຍ​ລອງ​ເບິ່ງ.​
ວິທີ​ເຮັດປາ​ໃນ​ກະ​ທະ​ແບບ​ນ້ຳ​ມັນ​ນ້ອຍ​
1. ສັບ​ເນື້ອປ​າ​ໃຫ້​ພໍ​ແຫ້ງ​ (​ບໍ່ໃຫ້ມີນ້ຳ​)
2. ໃຊ້​ໄຟປານ​ກາງ​ໃສ່​ນ້ຳ​ມັນ​ນ້ອຍໆ​ ຕາມ​ດ້ວຍ​ເນື້ອປາລົ​ງ​ໄປ.​
3. ໃຈ​ເຢັນ​ໆ​ຢ່າ​ຟ້າວພິກກັບ​ດ້ານ​ ປາ​ຈະ​ຕິດ​ກະ​ທະ​.
4. ໃຫ້​ຖ້າ​ຈົນ​ປາ​ສຸກບໍລິເວນ​ຊີ້ນ​ອ້ອມ​ນອກ​ແຫ້ງ​ກອບ​ຄ່ອຍ​ພິກກັບ​ດ້ານ​ແລະ​ບໍ່​ຕ້ອງ​ກັບ​ຫຼາຍ​ເທື່ອ​.

8. ຊູ​ຊິ​ເອິກ​ໄກ່​
ສ່ວນ​ປະສົມ​          
ຊີ້ນ​ເອິກ​ໄກ່​
ໝາກແຕງ​ຍີ່​ປຸ່ນ​
ຫົວກາລົດ
ແບັກເ​ບີ​ຣີ​
ວິທີ​ເຮັດ​
1.ຊອຍເອິກ​ໄກ່​ແບ່ງ​ເຄີ່ງ​ແຕ່​ບໍ່​ໃຫ້​ຂາດ​ວາງຫົວກາລົດ​ແລະ​ໝາກແຕງ​ຍີ່​ປຸ່ນ​ຊອຍຍາວໆ​ ລົງ​ໄປ​ມ້ວນ​ໃຫ້​ຄື​ຊູ​ຊິ​ແລ້ວ​ເອົາ​ເຊືອກ​ຫລື​ດ້າຍ​ຫຍິບ​ຜ້າ​ພັນ​ໃຫ້​ອ້ອມ​.
2. ນຳ​ໄປ​ລົງໃນ​ກະ​ທະໂດຍ​ໃສ່​ນ້ຳ​ມັນ​ 1-2 ບ່ວງກາເຟ​ ຈົນມັນ​ສຸກ​.
3. ຕັດ​ດ້າຍ​ອອກ​ຊອຍ​ເປັນ​ຕ່ອນໆ​ໂຮຍ​ເກືອ​ແລະ​ພິກ​ໄທ,​ ບີບ​ໝາກ​ນາວ,​ ພ້ອມ​ຮັບປະທານ.​

9. Easy Salad
ເມ​ນູ​ນີ້​ບໍ່​ເອີ້ນ​ອາຫານ​ຄີນ​ເພາະ​ໃຊ້​ເກັດ​ຂະໜົມ​ປັງ​ມາ​ຮ່ວມ​ດ້ວຍສະເໜີ​ເປັນ​ໄອ​ເດຍ​ໃນ​ການເຮັດ​ອາຫານ​ແລ້ວ​ກັນ.
ສ່ວນ​ປະສົມ​
ໝາກອຶ​ຕົ້ມ​ແລ້ວ​ນຳໄປ​ອົບ​​ພໍ​ຫອມ​
ຖົ່ວ​ລັນ​ເຕົາ​ລວກ​
ເຜືອກ​ຕົ້ມ​
ກະທຽມ​ສັບ​
ເກັດ​ຂະໜົມ​ປັງ​
ພາດ​ເລ​ສັບ​
ອັນ​ມອນ​ສະໄລ​​
ງາ​ຂາວ​ຄົ່ວ​
ວິທີ​ເຮັດ​
1. ນຳ​ໝາກອຶ​ຕົ້ມ​, ຖົ່ວ​ລັນ​ເຕົາ​ລວກແລະ​ເຜືອກ​ຕົ້ມ​ໃສ່​ຈານ​ ກຽມ​ໄວ້​.
2. ນຳ​ກະ​ທະຂຶ້ນ​ຕັ້ງ​ໄຟ​ແລ້ວ​ໃສ່​ກະທຽມ​ສັບ​ລົງ​ຜັດ​ພໍ​ຫອມ​ຕາມ​ດ້ວຍ​ເກັດ​ຂະໜົມ​ປັງຄົ່ວ​ຈົນ​ເກັດ​ຂະໜົມ​ປັງ​ກອບ​ແລະ​ຫອມ​ໃສ່​ພາດ​ເລ​​ສັບ​, ອັນ​ມອນ​ສະໄລ​ແລະ​ງາ​ຂາວ​ຄົ່ວ​ລົງ​ໄປ​ຄົ່ວ​ຕໍ່​ອີກ​ໜ້ອຍແລ້ວປິດ​ໄຟ​(ໃຊ້​ໂຮຍ​ໜ້າສະລັດ​ຫລື​ອາຫານ​ຂອງ​ເຮົາ​ໄດ້​ທຸກ​ເມ​ນູ​ຕາມ​ມັກ​)ນຳ​ໄປ​ໂຮຍ​ເທິງ​ຜັກ​ຕົ້ມ​ທີ່​ກຽມ​ໄວ້​.

10. Clean Sandwich (ແຊນ​​ວິດ​ຫມາກໄມ້​ແລະ​ທັນຍາ​ພືດ​)
ເມ​ນູ​ນີ້​ບໍ່​ໃຊ້​ນ້ຳ​ມັນ​ເປັນ​ອາຫານ​ເຊົ້າ​ຫລື​ແລງກໍ​ໄດ້​
ສ່ວນ​ປະສົມ​
ຂະໜົມ​ປັງ​​ 2 ແຜ່ນ​
ໝາກນັດ(ຊອຍວົງແວ່ນ​ເອົາ​ແກນ​ອອກ​)
ກ້ວຍ​ຫອມ​ຊອຍວົງ​ແວ່ນ​
ອັນ​ມອນ​ສະໄລ​
ງາ​ຂາວ​-ງາດ​ຄົ່ວ​ສຸກ​
ກີ​ວີ​ຊອຍວົງ​ແວ່ນ​
ໝາກກ້ຽງ​ແກະ​ຊິ້ນ​ຜ່າເຄີ່ງ​
ວິທີ​ເຮັດ​
1. ປີ້ງ​ຂະໜົມ​ປັງ​​ໃນ​ກະ​ທະ​ພໍກອບຫລື​ໃສ່​ເຄື່ອງ​ປິ້ງ​ຂະໜົມ​ປັງ​ ກຽມ​ໄວ້​.
2. ເອົາໝາກນັດ​ລົງໃນ​ກະ​ທະ​ພໍ​ຫອມ​ ກຽມ​ໄວ້​.
3. ວາງ​ກ້ວຍ​ຫອມ​ລົງ​ເທິງ​ຂະໜົມ​ປັງ​ແຜ່ນ​ທີ່​ 1 ໂຮຍ​ດ້ວຍ​ອັນ​ມອນ​ສະໄລ​ແລະ​ງາ​ຄົ່ວ​.
4. ວາງໝາກນັດ,ກີ​ວີ​ແລະ​ໝາກກ້ຽງ​ລົງ​ເທິງ​ຂະໜົມ​ປັງ​ແຜ່ນ​ທີ່​ 2 ພ້ອມ​ຮັບປະທານ.​

11. ສ​ະລັດ​ທູ​ໜ້າ​ກັບ​ຂະໜົມ​ປັງໄຂ່​ດາວ​
ສ່ວນ​ປະສົມ​
ເນື້ອປາ​ທູ​ໜ້າ​
ໝາກ​ເຂືອ​ເລັ່ນ​
ໝາກແຕ່ງຍີ່​ປຸ່ນ​
ກີ​ວີ​
ເກືອ​ປົ່ນ​ແລະ​ພິກ​ໄທ​
ນ້ຳ​ມັນ​ໝາກ​ກອກ​ນ້ອຍໆ​
ຂະໜົມ​ປັງ​ໄຂ່​ດາວ​ໂຮຍ​ງາ​ຄົ່ວ​
ວິທີ​ເຮັດ​
ປະສົມ​ທຸກ​ຢ່າງ​ເຂົ້າ​ນຳກັນ​ກຽມ​ໄວ້​ເ​ສີບພ້ອມ​ຂະໜົມ​ປັງ​ໄຂ່​ດາວ​ໂຮຍ​ງາ​ຄົ່ວ​

12. ປາຊອດ​ໂຫລະ​ພາ​
ສ່ວນ​ປະສົມ​
ປາຊອຍ​ເປັຕ່ອນໆ​
ໃບ​ໂຫລະ​ພາ​ສັບ​
ນ້ຳ​ເຜີ້ງ​
ເປືອກ​ເລມ​ອນ​ດອງ​ສັບ​ເປັນລູກ​ເຕົ໋າ​ນ້ອຍໆ​
ຜັກ​ກາດ​ຫອມ​
ໝາກເຂືອ​ເລັ່ນຊອຍວົງ​ແວ່ນ​
ເລມ​ອນ
ວິທີ​ເຮັດ​
1. ນຳ​ປາ​ລົງໄປ​ໃນ​ກະ​ທະ​(ໃສ່​ນ້ຳ​ມັນ​ນ້ອຍ​ພຽງແຕ່​ຕິດ​ກະ​ທະ​)ຈົນ​ສຸກ​ເຫຼືອງ​ງາມ​ກຽມ​ໄວ້​.
2. ເຮັດ​ຊອດ​ໂດຍ​ນຳ​ໃບ​ໂຫລະ​ພາ​ສັບ​ໄປ​ປັ່ນ​ກັບ​ນ້ຳ​ຕົ້ມ​ສຸກ​ນຳ​ມາ​ປະສົມ​ກັບ​ນ້ຳເ​ຜີ້ງ​ແລະ​ເປືອກ​ເລມ​ອນ​ດອງ​ ຊິມ​ໃຫ້​ໄດ້​ລົດ​ສົ້ມ​-ຫວານ​ຕາມ​ມັກ​.
3. ຈັດ​ເ​ສິີບ​ໂດຍ​ວາງ​ຜັກ​ກາດ​ຫອມ​ຕາມ​ດ້ວຍ​ໝາກ​ເຂືອ​ເລັ່ນ​ແລະ​ປາ ເທ​ຊອດ​ໂຫລະ​ພາລົງເທີ່ງ​ເນື້ອປາ​ແຕ່ງ​ດ້ວຍ​ເປືອກ​ເລມ​ອນ​ຊອຍ​ຝອຍ.​
ໝາຍ​ເຫດ​ : ຫາກ​ກິນ​ເປັນ​ເມ​ນູປົກກະ​ຕິ​ຊອດ​ໂຫລະ​ພາ​ໃຫ້​ໃສ່​ພິກ​ຂີ້​ໜູ​ຂຽວ,ກະ​ທຽມ​ ແລະ​ຮາກ​ຜັກ​ຊີ​ຕື່ມ​ໝາກ​ນາວ​ແລະ​ນ້ຳ​ປາລົງ​ໄປ​ເປັນ​ນ້ຳ​ຈິ້ມ​ຊີ​ຟູ້ດ​ໄດ້​.

13. Sweet Salad Clean food
 ຈານ​ນີ້​ເປັນ​ອາຫານ​ຄີນ​ທີ່​ກິນ​ອິ່ມ​ຈົນ​ຈຸກ​ເກືອບ​ເຖິງ​ເເລງ​ເລີຍກະວ່າໄດ້.
ສ່ວນ​ປະສົມ​
ກ້ວຍ​ຫອມ​ 1 ໜ່ວຍ​
ໝາກກ້ຽງ 1 ໜ່ວຍ​
ແບັກ​​ເບີ​​ຣີ​ 50 ກຣາມ​
ເລມ​ອນ​ 2 ຊິ້ນ​
ນ້ຳເ​ຜີ້ງ​
ວິທີ​ເຮັດ​
ໃສ່​ທຸກ​ຢ່າ​ລົງ​ໃນ​ຈານ​ລາດ​ດ້ວຍ​ນ້ຳ​ເຜີ້ງພ້ອມຮັບປະທານ​

14. ສະ​ເຕັກ​ເອິກ​ໄກ່​ກັບ​ໝາກ​ມ່ວງ​
ເມ​ນູຄີນ​ນີ້​ເອີ້ນ​ຄວາມ​ສົດ​ຊື່ນ​ໃຫ້​ກັບ​ຮ່າງກາຍ​ໄດ້​ດີ​ຫລາຍໆ​ວິທີ​ເຮັດ​ກໍ່​ສຸດ​ງ່າຍມາ​ເບິ່ງ​ກັນ​
ສ່ວນ​ປະສົມ​
ຊີ້ນ​ເອິກ​ໄກ່​
ເກືອ​ປົ່ນ​ແລະ​ພິກ​ໄທ​ປົ່ນ​
ພາດ​ເລ​ສັບ​
ໝາກມ່ວງ​ສຸກ​ຊອຍ​ລູກເຕົ໋າ​
ຫອມ​ແດງ​ຊອຍ​ລູກເຕົ໋າ​
​ຫອມ​ຊອຍ​
ຜັກຫອມສາບ​
ນ້ຳ​ໝາກ​ນາວ​ສົດ​
ວິທີ​ເຮັດ​
1. ນຳ​ເອິກ​ໄກ່​ມາ​​ຜ່າເຄີ່ງ​ແລ້ວ​ນຳ​ລົງໄປໃນ​ກະ​ທະ​(ໂດຍ​ໃຊ້​ນ້ຳ​ມັນ​ພຽງຕິດ​​ກະ​ທະ​) ຈາກ​ນັ້ນ​ໂຮຍ​ເກືອ​, ພິກ​ໄທ​ດຳ​​ໜ້ອຍໜຶ່ງແລະ​ພາດ​ເລ​​ສັບ​ເອົາລົງໃນກະທະຈົນສຸກ​ຫອມ​ ກຽມ​ໄວ້​.
2. ເຮັດ​ຊັນ​ຊ່າ​ໝາກ​ມ່ວງ​ໂດຍ​ປະສົມ​ໝາກ​ມ່ວງ,​ ຫອມ​ແດງ​,​ຫອມ​ຊອຍ​,ຜັກຫອມລາບແລະ​ນ້ຳ​ໝາກ​ນາວ​ສົດ​ເຂົ້າ​ນຳກັນ​ ກຽມ​ໄວ້​.
3. ນຳ​ເອິກ​ໄກ່​ວາງ​ໃນ​ຈານ​ລາດ​ດ້ວຍ​ຊັນ​ຊ່າ​ໝາກ​ມ່ວງແຕ່ງ​ດ້ວຍ​ຜັກຫອມລາບແລະ​ໝາກ​ເຂືອ​ເລັ່ນ​ລາ​ຊີ​ນີ​.

15. Clean BBQ Chicken
ເມ​ນູ​ນີ້​ເປັນ​ອາຫານ​ສຸຂະພາບ​ບໍ່​ໄດ້​ປຸງ​ລົດ​ຫລາຍຫາກ​ເພື່ອນໆ​ເຮັດ​ເປັນ​ເມ​ນູ​ປົກກະຕິ​ໃຫ້​ໝັກ​ໄກ່​ດ້ວຍ​ຊອດ​ປຸງ​ລົດ​ແລະ​ກິນ​ຄູ່​ກັບ​ຊອດ​ບາ​ບີ​ຄິວ​.
ສ່ວນ​ປະສົມ​
ຊີ້ນ​ເອິກໄກ່ຊອຍລູກເຕົ໋າ​
ໝາກນັດຊອຍລູກເຕົ໋າ​
ໝາກ​ເຂືອເ​ລັ່ນຊອຍລູກ​ເຕົ໋າ​
ໝາກເຜັດ​ຊີ້​ຟ້າ​ຂຽວ​
ເກືອ​ປົ່ນ​ແລະ​ພິກ​ໄທ​ດຳ​
ພາດ​ເລ​​ສັບ​
ວິທີ​ເຮັດ​
ນຳ​ຊີ້ນເ​ອິກ​ໄກ່,​ ໝາກນັດ,​ ໝາກ​ເຂືອ​ເລັ່ນຊອຍ​ລູກເຕົ໋າ​ແລະ​ໝາກເຜັດ​ຊີ​ຟ້າ​ຂຽວ​ມາ​ສຽບ​ໄມ້​ ໂຮຍ​ເກືອ,​ ພິກ​ໄທ​ດຳ​ແລະ​ພາດ​ເລ​​ສັບ​ນ້ອຍໆ​ຈາກ​ນັ້ນ​ນຳ​ລົງໄປໃນ​ກະ​ທະ​(ໃສ່​ນ້ຳ​ມັນ​ພໍ​ໃຫ້​ບໍ່​ຕິດ​ກະ​ທະ​ 1-2 ບ່ວງກາເຟ​)ຈົນ​ສຸກ​ຈັດ​ໃສ່​ຈານພ້ອມຮັບປະທານ​.

16. ໝາກມ່ວງ​ສຸກ​ກັບ​ເຜືອກ​ຕົ້ມ​
ບາງ​ເວລາ​ຄິດ​ຫຍັງ​ບໍ່​ອອກ​ກໍ​ພຽງແຕ່ໝາກ​ມ່ວງ​ສຸກ​ກັບ​ເຜືອກ​ຕົ້ມ​ງ່າຍ​ສຸດໆ​ແຖມ​ວິທີ​ຫັ່ນ​ໝາກມ່ວງ​ໃຫ້​ດ້ວຍ​​.

ວິທີ​ຫັ່ນ​ມະ​ມ່ວງ​
1. ຫັ່ນເຄີ່ງ​ໝາກ​ມ່ວງ​ແນວຍາວຕາມເມັດ​ໂດຍ​ບໍ່​ຕ້ອງ​ປອກ​ເປືອກ.​
2. ໃຊ້​ມີດ​ປາດ​ດ້ານ​ເນື້ອໝາກ​ມ່ວງ​ເປັນ​ຕາ​ຕະລາງຂະໜາດ​ນ້ອຍ​-ໃຫຍ່​ຕາມ​ມັກ​ແຕ່​ຢ່າ​ໃຫ້ເຖີງເປືອກ​ໝາກ​ມ່ວງ​.
3. ໃຊ້​ມື​ທັງ​ສອງ​ຂ້າງ​ຈັບ​ແລະ​ໃຊ້​ນິ້ວ​ດັນ​ຈາກ​ເປືອກ​ດ້ານ​ລຸ່ມ​ໃຫ້​ນູນ​ຂຶ້ນ​ມາເຮັດໃຫ້​ເນື້ອ​ໝາກ​ມ່ວງ​ໂຄ້ງ​ແລະ​ເນື້ອ​ແຢກ​ອອກ​ເປັນ​ເນື້ອ​ເຮົາ​ກໍ​ຈະ​ໄດ້​ໝາກ​ມ່ວງ​ທີ່​ສວຍ​ງາມ​ເນື້ອບໍ່​ຊ້ຳ​ ສວຍ​ງາມ​​.

17. ເມ​ນູຄີນ​ງ່າຍ​ໆ​
ແບັກ​ເບີ​ຣີ ​ໝາກສາລີ​ຫວານ​ຕົ້ມ​, ອັນ​ມອນ​ສະ​ໄລ​, ກ້ວຍ​ຫອມ​ແລະ​ແປະ​ກ໊ວຍ​, ລາດ​ດ້ວຍ​ນ້ຳ​ເຜີ້ງ​ພຽງເທົ່າ​ນີ້​ກໍ​ອາລົມ​ດີ​ອິ່ມ​ແບບ​ຄີນໆ.​

18. ກ້ວຍ​ນ້ຳ​ວ້າຄຸກ​ໝາ​ພ້າວ​
ຖ້າວ່າຊື້ກ້ວຍມາແລ້ວກິນ​ບໍ່​ທັນແຖມມັນກະຊ້ຳອີກເລີຍຄິດ​ໄອ​ເດຍ​ຢາກ​ຊຸບ​ຊີວິດ​ກ້ວຍ​ຊ້ຳໆໃຫ້​ກັບ​ມາ​ໜ້າ​ຕາ​ດີ​ແລະ​ແຊບ​ຫລາຍກວ່າ​ເກົ່າ​ມາ​ເບິ່ງ​ວິທີ​ກັນ.​
ສ່ວນ​ປະສົມ​
ໝາກພ້າວຂູດ
ກ້ວຍ​ຫັ່ນ​ເປັນ​ຊິ້ນ​ພໍ​ດີຄຳ
ວິທີ​ເຮັດ​
1. ນຳ​ໝາກພ້າວຂູດ​ຂາວ​ມາ​ຄົ່ວ​ໃນ​ກະ​ທະ​ຈົນ​ເຫຼືອງ​ກອບ.​
2. ນຳ​ກ້ວຍ​ຫັ່ນ​ເປັນ​ຊິ້ນ​ພໍດີ​ຄຳ​ໄປ​ຄຸກ​ກັບ​ໝາກ​ພ້າວ​ຄົ່ວ​ໃຫ້​ທົ່ວໃຊ້​ໄມ້​​ຈິ້ມ​ສຳລັບ​ເ​ສີບ​ເປັນ​ຄຳ​ໆ​ແລະ​ແຊບ​ຢ່າ​ບອກ​ໃຜ​ທີ່​ສຳຄັນ​ເຮັດ​ງ່າຍ​ສຸດ​ໆ.​

19. ກາລະ​ເປົາ​ຜັກ​ໄສ້​ກຸ້​ງສັບ​
ຮູບ​ແລະ​ວິທີ​ເຮັດ​ຂໍ​ນຳ​ຮູບ​ເມ​ນູ​ກາລະ​ເປົາ​ໄສ້​ໝູ​ສັບ​ມາ​ໃຊ້ເພາະ​ວິທີ​ການ​ດຽວ​ກັນ.
ສ່ວນ​ປະສົມ​
ຜັກ​ກາດ​ຂາວ​ 1 ຫົວ​
ກຸ້ງ​ສັບ​ຫລື​ຊີ້ນ​ເອິກ​ໄກ່​ສັບ​ 150-200 ກຣາມ​
ກະ​ທຽມ​ສັບ​ 1 ບ່ວງກາເຟ
ຮາກ​ຜັກ​ຊີ​ສັບ​ 1 ບ່ວງກາເຟ​
ຊີ​ອິວ​ຂາວ​ຫລື​ນ້ຳ​ປາ​ແບບ​ໂຊ​ດຽມ​ຕ່ຳ​ (Low Sodium)

ວິທີ​ເຮັດ​
1. ນຳ​ຜັກ​ກາດ​ຂາວ​ຈີກ​ເປັນ​ໃບໆ​ ໄປ​ຕົ້ມ​ໃນ​ນ້ຳ​ເດືອດ​ໃຫ້​ໃບ​ອ່ອນ​ ກຽມ​ໄວ້.​
2. ນຳ​ກຸ້ງ​ສັບ​ມາ​ປະສົມ​ກັບ​ກະ​ທຽມ​ຮາກ​ຜັກ​ຊີ​ແລະ​ຊີ​ອິວ​ຂາວ​ຫລື​ນ້ຳ​ປາ​ນ້ອຍໆ​ປະ​ໄວ້.​
3. ນຳ​ຜັກ​ກາດ​ຂາວ​ປະ​ມານ​ 3 ໃບ​ ວາງ​ລຽງ​ໃສ່​ຈານ​ຫລື​ຖ້ວຍ​ລັກສະນະ​ເຄີ່ງ​ວົງກົມ​ ທັບ​ດ້ວຍ​ກຸ້ງ​ສັບ​ທີ່​ໝັກ​ໄວ້​ຈາກ​ນັ້ນ​ທັບ​ດ້ວຍ​ໃບ​ຜັກ​ກາດ​ຂາວ​ອີກ​ເທື່ອເຮັດ​ຊ້ຳ​ແບບ​ເດີມ​ປະ​ມານ​ 3-4 ຊັ້ນ​ ໂດຍ​ປິດ​ທັບ​ດ້ວຍ​ໃບ​ຜັກ​ກາດ​ຂາວ​ 2 ໃບ​ໃນ​ຊັ້ນ​ສຸດ​ທ້າຍ​ກົດ​ໃຫ້​ແໜ້ນ​ ນຳ​ໄປ​ໜຶ້ງ​ປະ​ມານ​ 20 ນາ​ທີ​ຫລື​ຈົນ​ສຸກ.​
4. ພໍ​ສຸກ​ແລ້ວ​ໃຊ້​ບ່ວງ​ກົດໆ​ຈະ​ມີ​ນ້ຳ​ຜັກ​ຢູ່​ພໍ​ສົມຄວນ​ໃຫ້​ຕັກ​ອອກ​ມາ​ປະ​ໄວ້​ໃຊ້​ເປັນ​ນ້ຳ​ຊຸບ​.
5. ປີ້ນ​ກາລະ​ເປົາ​ຜັກ​ໃສ່​ຈານ​ຜ່າ​ເປັນ​ 4 ສ່ວນ​ຫລື​ຊອຍເປັນ​ຊິ້ນ​ຕາມ​ມັກ​ໃສ່​ນ້ຳ​ຊຸບ​ລົງ​ໄປ​ໃນ​ຈານພ້ອມ​ຮັບປະທານ.​

20. ໝີ່​ຜັດ​ຜັກ​ກະ​ເສດ​ກຸ້ງ​
ໃຜ​ວ່າ​ເມ​ນູຄີນ​ຟູ້ດ​(Clean Food)ຈະ​ເຮັດ​ເມ​ນູ​ຜັດ​ໆ​ບໍ່​ໄດ້​ ມື້​ນີ້​ມີ​ວິທີ​ທີ່​ຈະ​ເຮັດໃຫ້​ການ​ຜັດ​ສາມາດ​ໃຊ້​ນ້ຳ​ມັນ​ນ້ອຍ​ໆ​ມາ​ສະເໜີ​ມາ​ເບິ່ງ​ວິທີ​ກັນ.
ສ່ວນ​ປະສົມ​
ເສັ້ນ​ໝີ່​ໄວ​ໄວ​ເຂົ້າ​ກ່ອງ​ແຊ່​ນ້ຳ​ຈົນ​ອ່ອນ(ຕັດ​ສັ້ນ​ປະ​ມານ​ 1 ຄືບ​)
ກຸ້ງ​
ຜັກ​ກະ​ເສດ​ເດັດ​ເປັນ​ທ່ອນ​
ກະ​ທຽມ​ສັບ​
ຊີ​ອິວ​ຫລື​ນ້ຳ​ປາ​ ແບບ​ໂຊ​ດຽມ​ຕ່ຳ​ (Low Sodium)
ນ້ຳ​ມັນ​ໝາກ​ກອກ​ສຳລັບ​ຜັດ​ 2-3 ບ່ວງກາເຟ​
ໝາຍ​ເຫດ​ : ສຳລັບ​ການ​ໃສ່​ນ້ຳ​ມັນປະ​ມານ​ 2-3 ບ່ວງຊາ​ ໃນ​ເມ​ນູ​ນີ້​ຈັງ​ຄືກັນ​​ວ່າ​ ຫາກ​ວ່າຄົນສາຍ​​ຄີນແທ້ໆ​ມາ​ອ່ານ​ຈະ​ວ່າເຮົາໄດ້ຂໍ​ນຸ​ຍາດ​ຊີ້​ແຈງ​ວ່າ​​ບໍ່​ມີ​ເຈດ​ຕະນາ​ພຽງ​ແຕ່​ຢາກ​ສະເໜີ​​ວິທີ​ທີ່​ຈະ​ສາມາດ​ກິນ​ຄີນ​ໃນ​ແບບ​ຄ່ອຍ​ເປັນ​ຄ່ອຍ​ໄປ​ໂດຍ​ທີ່​ສາມາດ​ຫຼຸດໂຊ​ດຽມ​ແລະ​ຫຼຸດ​ປະລິມານ​ການ​ໃຊ້​ນ້ຳ​ມັນ​ລົງ​ດ້ວຍ​ໂດຍ​ບໍ່​ໃສ່​ຫລາຍ​ຈົນເກີນໄປ​ແບບ​ເມ​ນູ​ຜັດ​ປົກ ກະຕິ.
ວິທີ​ເຮັດ​
1. ລວກ​ເສັ້ນ​ໝີ່​,ກຸ້ງ​ແລະ​ຜັກ​ກະ​ເສດ​ໃຫ້​ສຸກ​ ປະ​ໄວ້​.
2. ນຳ​ກະ​ທຽມ​ສັບ​ໄປ​ຈຽວ​ກັບ​ນ້ຳ​ມັນ​ໃຫ້​ຫອມ​ໃສ່​ກຸ້ງ​ລົງ​ໄປ​ປຸງລົດຊາດ​ດ້ວຍ​ຊີ​ອິວ​ຫລື​ນ້ຳ​ປາ​ຕື່ມ​ນ້ຳ​​ລົງ​ໄປ​ໜ້ອຍໜຶ່ງ​ໃຫ້ພໍມີ​ນ້ຳ​​ຄົນ​ໃຫ້​ເຂົ້າ​ກັນ​ຈົນ​ເດືອດ​ ຈາກ​ນັ້ນ​ປັບ​ໄຟ​ອ່ອນ​ສຸດ.​
3. ໃສ່​ເສັ້ນ​ໝີ່​ເຂົ້າ​ກ່ອງ​ແລະ​ຜັກ​ກະ​ເສດ​ລົງ​ລວກ​ສຸກ​ລົງ​ໄປ​ໃຫ້​ທຸກ​ຢ່າງ​ໃຫ້​ເຂົ້າ​ກັນ​ທົ່ວ​ ປິດ​ໄຟຕັກ​ໃສ່​ຈານຮັບປະທານໄດ້ເລີຍ.
ດ້ວຍ​ວິທີ​ນີ້​ຈະ​ເຮັດໃຫ້​ເຮົາ​ໃຊ້​ນ້ຳ​ມັນ​ນ້ອຍ​ລົງ​ຫລາຍ​ໆ​ ເປີດ​ໄຟ​ອ່ອນ​ແລ້ວ​ຄຸກ​ທຸກ​ຢ່າງ​ໃຫ້​ເຂົ້າ​ກັນ​ໃຫ້​ລົດ​ທົ່ວ​ເຖິງ​ບໍ່​ຕ້ອງ​ຫ່ວງ​ເລື່ອງ​ຜັກ​ເສັ້ນຈະ​ບໍ່​ສຸກ​ເພາະ​ເຮົາ​ລວກ​ສຸກ​ທັງ​ໝົດ​ແລ້ວ​ ລອງ​ເຮັດ​ກັນ​ເບິ່ງ.​

21. ວິທີ​ທອດ​ປາແບບ​ຄລີນ​ໆ(ນ້ຳ​ມັນ​ນ້ອຍ​)
ວິທີ​ເຮັດ​
1. ຫາກ​ໃຊ້​ເນື້ອປາ​ແຊ່​ແຂງ​ຫຼັງ​ເຮັດໃຫ້​ປາ​ລະ​ລາຍ​ແລ້ວ​ໃຫ້​ສະ​ເດັດ​ນ້ຳ​ອອກ​ໃຫ້​ຫລາຍ​ທີ່ສຸດ​ເທົ່າ​ທີ່​ຈະ​ເຮັດ​ໄດ້.​
2. ຕັ້ງ​ກະ​ທະ​ເປີດ​ໄຟ​ແຮງ​ໃສ່​ນ້ຳ​ມັນ​ລົງ​ໄປ​ພໍ​ເຄືອບ​ກະ​ທະ.​
3. ນຳ​ປາ​ວາງ​ລົງ​ໄປ​ໃນ​ກະ​ທະ​ເບົາ​ໆສັງເກດ​ຕອນ​ທຳອິດ​ຈະ​ເປັນ​ຟອງ​ນ້ຳ​ອ້ອມ​ຊິ້ນ​ປາ​ບໍ່​ຕ້ອງ​ຕົກ​ໃຈ​ທອດ​ຕໍ່ໄປ​ເບົາ​ໄຟ​​ໜ້ອຍ​ໜຶ່ງໄດ້​.​
4. ໃຫ້​ສັງເກດ​ທອດ​ໄປ​ຈັກໄລຍະ​ຟອງ​ຈະ​ຫາຍ​ໄປ​ແລະ​ຈະ​ຄ່ອຍ​ໆ​ແຫ້ງ​ລົງ​ໆ​ແລະ​ຜິວ​ຂອງ​ປາ​ກໍ​ຈະ​ເລີມສຸກ​ເຂົ້າ​ທີ່​ຢ່າ​ຟ້າວກັບດ້ານປາ​ເດັດ​ຂາດ(ໃຊ້​ເວລາ​ຫຼາຍ​ນາ​ທີ​ໃຈ​ເຢັນໆ​)
5. ໃຫ້​ສັງເກດ​ອ້ອມ​ໆ​ຊິ້ນ​ປາ​ບໍລິເວນ​ກະ​ທະ​ຈະ​ເກີດ​​ສີ​ນ້ຳ​ຕານ​ແຫ້ງ​ໆ​ໃຫ້​ໃຊ້​ທີ່​ຄີບ​ແກະ​ເບົາ​ໆ​ຊິ້ນ​ປາ​ເບິ່ງ​ວ່າເນື້ອປາ​ແຫ້ງ​ຫລື​ບໍ ຖ້າ​ແຫ້ງ​ດີ​ແລ້ວ​ໃຫ້​ກັບດ້ານຈະ​ໄດ້​ປາ​ຊິ້ນ​ສວຍ​ງາມ.​
ໝາຍ​ເຫດ​ : ຫາກ​ກັບ​ແລ້ວ​ເນື້ອປາ​ຫຼຸດ​ຂາດ​ສະແດງ​ວ່າພິກກັບດ້ານ​ປາ​ໄວ​ເກີນ​ໄປ​ໃຫ້​ຖ້າ​ອີກ​ໜ້ອຍໜຶ່ງຝຶກ​ໄປ​ເລື້ອຍໆຈະ​ຊຳ​ນານ​ຫລາຍ​ຂຶ້ນ​.​

22.​ ແຊວມ​ອນ​ແບບ​ນ້ຳ​ມັນ​ນ້ອຍ​ສຳລັບ​ຄີນ​ຟູ້ດ​
ວິທີ​ເຮັດ​
1. ນຳ​ກະ​ທະຂຶ້ນ​ຕັ້ງ​ໄຟໃສ່​ນ້ຳ​ມັນ​ລົງ​ໄປໃຫ້​ທົ່ວ​ບໍລິເວນ​ທີ່​ເຮົາ​ຕ້ອງການ ເປີດ​ໄຟ​ແຮງ​ໃຫ້​ກະ​ທະ​ຮ້ອນ.​
2. ນຳ​ແຊວມ​ອນ​ດ້ານ​ໜັງ​ລົງ​ໄປ​ກ່ອນ​ເບົາ​ໄຟ​ລົງ​ເປັນ​ໄຟປານ​ກາງບໍ່​ຕ້ອງ​ຟ້າວ​ແກະ​ຫລື​ພິກກັບ​ດ້ານ​ໃຫ້​ຖ້າ​ສັງເກດ​ຊີ້ນ​ແຊວມ​ອນ​ດ້ານ​ຂ້າງ​ຈະ​ຄ່ອຍ​ໆ​ຂາວ​ຈາກ​ດ້ານ​ທີ່ລົງທອດ​.
3. ພໍ​ຊີ້ນ​ແຊວ​ມອນ​ຂາວ​ໄດ້​ປະ​ມານເ​ຄີ່ງ​ໜຶ່ງ​ຂອງ​​ຊີ້ນ​ໃຫ້ພິກ​ກັບ​ດ້ານ​ແລ້ວ​​ຕໍ່​ດ້ວຍ​ໄຟ​ປານກາງ​ຈົນ​ສຸກ​ສວຍ​ງາມ​.

 

ໝາຍ​ເຫດ​ : ພໍ​ເຖິງ​ຂັ້ນ​ຕອນ​ທີ່​ 3 ຫາກ​ບໍ່​ໝັ້ນໃຈ​ວ່າເນື້ອປາ​ແຊວມ​ອນ​ສຸກ​ຫລື​ບໍ ໃຫ້​ພິກກັບ​ດ້ານ​​ຕໍ່​ອີກ​ໜ້ອຍໜຶ່ງ​ໄດ້​ລອງ​ໃຊ້​ບ່ວງ​ກົດ​ຊີ້ນ​ເບິ່ງ​ຖ້າ​ບໍ່​ອ່ອນ​ແປ​ວ່າ​ສຸກ​ແລ້ວ​​.

============================================================================================================================