21ຄຳຖາມ ຈາກຄິດອອກ ຖາມ ຜາສຸກ

1.ພາສຸກ ເອງ ເປັນຄົນທຳມະດາ, ຖິ່ນຖານບ້ານເກີດມາຈາກ ເມືອງວຽງໄຊ, ແຂວງ ຫົວພັນ. ມີຊື່ແທ້ວ່າ: ພາສຸກ ທຸມມະລີ, ສ່ວນຊື່ຫຼິ້ນ ຫຼາຍຄົນກໍເອີ້ນຫຼາຍຢ່າງ ບາງຄົນກໍເອີ້ນວ່າ ພາ, ບາງຄົນກໍເອີ້ນສຸກ, ປີ 2015 ໄດ້ຮ່ວມສະແດງໜັງ "ຄວາມຮັກຫລຸຍ-ໃບຕອງ" ນຳຄ້າຍທີເຄ ຮັບບົດບາດເປັນນາງແມວໂພງ, ເລີຍໄດ້ຊື່ຫຼິ້ນມາໃໝ່ວ່າ ແມວ.

2. ນິໄສສ່ວນຕົວເປັນຄົນເວົ້າຫຼາຍຕະຫຼົກເຮຮາພາມ່ວນ, ເວລາຢູ່ນຳໝູ່ຄູ່ ເພື່ອນຮ່ວມງານ ຍາດພີ່ນ້ອງ ເຂົາຈະມັກໄດ້ຫົວນຳເຮົາ. ບາງທີຕົວເອງກໍງົງວ່າ ຕົວເອງເວົ້າຫຍັງ ຫຼື ເຮັດຫຍັງລົງໄປຈິ່ງເຮັດໃຫ້ຄົນຫົວ ຄົນມ່ວນໄດ້, ແຕ່ຄົນສ່ວນຫຼາຍບອກວ່າ: ພາສຸກເປັນຄົນມີບຸກຄະລິກ ແລະ ການເວົ້າຈາຕະຫຼົກເຮຮາ ບາງຄົນພຽງແຕ່ແນມເບິ່ງຊື່ໆກໍຫົວໄດ້ວ່າຊັ້ນ.

3. ປະຫວັດການສຶກສາແມ່ນ: ຫຼັງຈາກຮຽນຈົບມາແຕ່ຫົວພັນ ກໍມາຮຽນຕໍ່ທີ່ນະຄອນຫຼວງວຽງຈັນ, ມາທຳອິດກໍບໍ່ຮູ້ວ່າຈະເລືອກຮຽນສາຍຫຍັງ ເພາະຍັງບໍ່ຮູ້ຈັກເລືອກສາຍຕາມຄວາມມັກຕົວເອງ, ເລີຍໄດ້ເຂົ້າຮຽນບໍ່ແຮ່ຊັ້ນສູງ ທີ່ວິທະຍາໄລ ສັບພະວິຊາ 2004-2007, ຄອບຄົວພໍ່ແມ່ກໍຍ້າຍມາຢູ່ນະຄອນຫຼວງວຽງຈັນເລີຍໃນຊ່ວງນັ້ນ. ຫຼັງຈາກຈົບບໍ່ແຮ່ ກໍເຂົ້າເປັນພະນັກງານ ໄປປະຈຳການຢູ່ ບໍ່ຄຳນາກະດົກ ຢູ່ຫຼັກ 20, ເມືອງຄຳເກີດ, ແຂວງບໍລິຄຳໄຊ ແຕ່ປີ 2008-2010.

4. ພາສຸກຄິດວ່າ: ຍັງບໍ່ທັນໄດ້ເຮັດຫຍັງໃຫ້ເປັນໄປຕາມຄວາມຝັນທຸກຢ່າງເທື່ອ. ພາສຸກເລີຍຂໍມາຮຽນຕໍ່ພາສາອັງກິດປະລິນຍາຕີ ຈົບປີ 2015 ທີ່ ວິທະຍາໄລສຸກສະຫວັດ, ນະຄອນຫຼວງວຽງຈັນ


5. ຊ່ວງນີ້ພາສຸກຄິດວ່າ: ພາສຸກມີຄວາມໄຝ່ຝັນຫຼາຍຢ່າງເບື້ອງວົງການບັນເທິງ ແລະ ມີຄວາມຄິດວ່າຈະເລີ່ມເຮັດລອງເບິ່ງໄປເທື່ອລະເລັກລະນ້ອຍ ເຊັ່ນ: ເຂົ້າຮ່ວມແຄັດຕິ້ງນັກສະແດງນຳຄ້າຍທີເຄ ໄດ້ຖືກຄັດເລືອກໃຫ້ສະແດງເປັນນາງແມວໂພງ ໃນໜັງ "ຄວາມຮັກຫລຸຍ-ໃບຕອງ" ໃນປີ 2016 ເຊິ່ງໜັງນີ້ໄດ້ສາຍໃນໂຮງໜັງໃນນະຄອນຫຼວງວຽງຈັນ, ສະຫວັນນະເຂດ, ປາກເຊ, ສາຍໃນງານສາຍໜັງຕ່າງໆພາຍໃນປະເທດ ແລະ ຕ່າງປະເທດ.

6. ພາສຸກວ່າຊິລອງເຮັດໃຫ້ຕົວເອງດັງເບິ່ງກ່ອນບໍ ຊິດັງໄດ້ບໍ?

ກໍເລີຍເລີມຊອກກາຕູ່ນຕະຫຼົກ ແລະ ຄລິບຕະຫຼົກມາພາກເປັນສຳນຽງໄຕແດງຫົວພັນ ໃສ່ສຽງຕະຫຼົກເຢີ້ນໆເຂົ້າໄປ ເຮັດໃຫ້ຄົນຢາກຫົວ, ປະກົດວ່າ ພຽງແຕ່ໂພສລົງຄລິບທຳອິດ ກໍດັງແທ້ ມີຄົນດັງ ແລະ ເພຈດັງ ເອົາໄປແຊຕໍ່ໆກັນ ແລະ ກໍພາກມາເລື້ອຍໆ ແຕ່ວ່າກໍຢ້ານຖືກອັນທີ່ເຂົາສະຫງວນລິຂະສິດແດ່ ກໍເລີຍວ່າຜ່ອນໆລົງ (ອັນນີ້ແມ່ນພາກໃຫ້ຄົນໄດ້ມ່ວນຊື່ນເຮຮານຳຊື່ໆ ຍັງບໍ່ທັນມີລາຍໄດ້ຈາກດ້ານນີ້).

7. ປີ 2018 ເລີ່ມມີແນວຄິດຢ່າງອອກຜົນງານເພງເປັນຂອງຕົວເອງ ເລີຍເລີ່ມປຶກສາ ອາຈານ ບຸນຖົມ ພັນທະມາລີ ນັກປະພັນເພງດັງຫຼາຍເພງ ຈາກຄ້າຍທີເຄ ແລະ ປຶກສາ ອ້າຍ ຕົ້ນ ທະວີສັກ ທຳມະວົງສາ ເຈົ້າຂອງຄ້າຍທີເຄ ແລະ ພ້ອມທັງເປັນຜູ້ກຳກັບ, ເຂົາເຈົ້າກໍເຫັນດີໃຫ້ອອກ1ຜົນງານເພງ ຊື່ເພງ: "ຄັນບໍ່ແມ່ນຊິແລ່ນໜີ" ແຕ່ງໂດຍ: ອາຈານ ບຸນຖົມ ພັນທະມາລີ, ກຳກັບມິວສິກໂດຍ: ອ້າຍ ຕົ້ນ ທະວີສັກ ທຳມະວົງສາ.

8. ຕໍ່ມາ ພາສຸກ ກໍເລີ່ມຢາກມີຜົນງານເພງທີ່ຕົນເອງຮຽນແຕ່ງເອງ ກໍເລີຍອອກຜົນງານເພງໃໝ່ ທີ່ແຕ່ງດ້ວຍຕົວເອງມາເລື້ອຍໆ ເພື່ອນພັດທະນາຕົນເອງເຊັ່ນ: ເພງ ປານໃດຊິລວຍ, ບາດແຜໃຈ, ຂຶ້ນຄານແລ້ວເດີ, ວຽງໄຊທີ່ຮັກ, ຄືນບ້ານສາຫຼ້າ, ແລະ ເພງໃໝ່ລ່າສຸດແມ່ນ ເພງ ອີ່ເສືອເລົາ.

9. ນອກຈາກນີ້ພາສຸກເອງກໍມັກເລື່ອງການກຳກັບ ກໍເລີຍຮຽນກຳກັບດ້ວຍໂຕເອງ ໂດຍປະກາດເອົານັກສະແດງອາສາສະໝັກຈາກແຟນຄລັບຕົວເອງ ມາສະແດງໃຫ້ ໂດຍໃສ່ຊື່ເລື່ອງວ່າ: "ຄວາມຮັກສີເມກ" ເປັນການຮຽນກຳກັບ ແລະ ຮຽນສະແດງ ເປັນຄລິບໜັງສັ້ນໆ ໂພສລົງຊ່ອງ Youtube ຂອງພາສຸກເອງ (ເຊິ່ງແມ່ນໃຊ້ມືຖືຖ່າຍ ແລະ ຕັດຕໍ່) ຝາກຕິດຕາມຊົມແດ່ເດີ 


10. ພາສຸກໄດ້ຮ່ວມສະແດງໜັງ ແລະ ລະຄອນຜ່ານມາມີ: ຄວາມຮັກຫລຸຍໃບຕອງ, ແຟນເກົ່າ, ເຂົ້າຫຼາມປີ້ງໄກ່, ຮັກນີ້ມີເຄລຍ, ວົງວຽນກຳ,ຕຸກກະຕາໃນເມືອງໜາວ

11. ຮ່ວມສະແດງມິວສິກເພງເຊັ່ນ: ຈຸດຈົບສາຍແຂງ, ຖືພາໃຫ້ອ້າຍແດ່, ຮັກແທ້ແພ້ນິດສັນ, ໄຮໂຊບ້ານນາ, 14ກຸມພາມາຮັກກັນບໍ, ຄືວ່າເດະ, ຮັກສາວລຸ້ນແກ່... ນອກນີ້ກໍສະແດງເພງຕົວເອງນຳ

12. ຮ່ວມລາຍການ: ສ່ອງຟ້າຫາດາວ, ຮ່ວມສຳພາດໃນລາຍການຕ່າງໆ

13. ເປັນພິທີກອນລາຍການ: "ຫັນສາພາສຸກ" ໃນຊ່ອງມາລິມ່າ

14. ຖ້າຖາມວ່າ: ສະພາບແວດລ້ອມອ້ອມຂ້າງມີຜົນຕໍ່ຄວາມມັກຮັກດ້ານການບັນເທິງບໍ?
- ຕອບ: ພາສຸກຕອບວ່າມີຜົນ, ແຕ່ຖ້າໃຈເຮົາມັກຮັກດ້ານການບັນເທິງແທ້ ຢູ່ໃສເຮົາກໍສາມາດສ້າງຄວາມບັນເທິງໄດ້ ເພາະວ່າຍຸກນີ້ ທຸກຄົນສາມາດໃຊ້ມືຖື ແລະ ອິນເຕີເນັດໄດ້ ເພື່ອສ້າງຄວາມບັນເທິງໃຫ້ທ່ານຜູ້ຊົມໄດ້ ບໍ່ວ່າຈະລົງທາງ facebook ຫຼື Youtube ກໍໄດ້. ແຕ່ແນະນຳວ່າໃຫ້ສ້າງຄວາມບັນເທິງດ້ານບວກ ຫຼື ດ້ານດີນັ້ນເອງ ສ່ວນດ້ານລົບ ຫຼື ດ້ານບໍ່ດີນັ້ນ ບໍ່ແນະນຳໃຫ້ສ້າງ

15.ຢາກບອກຜູ້ທີ່ຮັກມັກແລະຕິດຕາມ ພາາສຸກຢູ່ ພາສຸກຢາກບອກຫຍັງທີ່ສຸດ

- ຕອບ:  ຢາກຝາກຂອບອົກຂອບໃຈຜູ້ທີ່ຕິດຕາມພາສຸກຢູ່ເນາະ ເພາະວ່ານັ້ນກໍເປັນກຳລັງໃຈສຳຄັນ ທີ່ເຮັດໃຫ້ສືບຕໍ່ໃນການສ້າງຄວາມມ່ວນຊື່ນສູ່ທ່ານຜູ້ຊົມ. ຜ່ານມາໄປທສງໃດທີ່ມີຄົນທັກທ້ວງວ່າຮູ້ຈັກພາສຸກ ພາສຸກກໍດີໃຈຫຼາຍ ແລະ ກໍມີຄົນມາຂໍຖ່າຍຮູບນຳພາສຸກກໍດີໃຈຫຼາຍ. ພາສຸກບໍ່ໄດ້ຂີ້ຄຸຍເດີ ເຫັນຢູ່ໃສກໍທັກທາຍໄດ້

16. ຄຳຖາມ PM 2.5 ມີຜົນຕໍ່ຄວາມໜ້າຮັກຂອງພາສຸກບໍ?
- ຕອບ: ໂອ້ໂຫ ຂອບໃຈສຳຫຼັບຄຳຖາມ, ພາສຸກໜ້າຮັກຢູ່ບໍນີ້? ຮາຮາ ປົກກະຕິຕະຫຼົກເຮຮາເກີນໄປຈົນບໍ່ເຫຼືອຄວາມໜ້າຮັກຢູ່ແລ້ວ , ສະແດງວ່າຜູ້ຖາມຕ້ອງຄິດວ່າພາສຸກໜ້າຮັກ ຂອບໃຈເດີ

17.  ການກ້າສະແດງອອກ ສຳຄັນຫລາຍເທົ່າໃດໃນມຸມມອງການໃຊ້ຊີວິດຂອງຄົນລາວປັດຈຸບັນ?
- ຕອບ:  ການກ້າສະແດງອອກສຳຄັນຫຼາຍ ແຕ່ເຮົາຕ້ອງພະຍາຍາມສະແດງດ້ານທີ່ດີ ແລະ ບໍ່ສ້າງຄວາມເດືອດຮ້ອນໃຫ້ຜູ້ອື່ນ, ການເຮັດໃຫ້ຄົນຮັກມັກ ຖືວ່າເປັນສິ່ງທີ່ດີ ແຕ່ການເຮັດໃຫ້ຄົນຊັງ ຖືວ່າບໍ່ຄ່ອຍດີ. ສັງຄົມເຮົາຄວນສົ່ງເສີມໃຫ້ກ້າສະແດງອອກໃນດ້ານການພັດທະນາຕ່າງໆໃນສັງຄົມ ທີ່ບໍ່ຂັດແຍ່ງກັນ ເພື່ອການພັດທະນາທາງດ້ານການບັນເທິງໃຫ້ທຽບເທົ່າຕ່າງປະເທດກໍຄືສາກົນ, ເພື່ອການພັດທະນາເສດຖະກິດ, ສັງຄົມ, ການສຶກສາ, ສະພາບຊີວິດການເປັນຢູ່ ແລະ ສຸຂະພາບ... ເວົ້າລວມແລ້ວກໍຄືການພັດທະນາປະເທດຊາດລາວເຮົາໃຫ້ຈະເລີນຂຶ້ນເລື້ອຍໆ ທຽບເທົ່າສາກົນ.
18. ຍຸກ4.0ໃນມຸມມອງຂອງພາສຸກ ມີຜົນຕໍ່ຊີວິດຄົນລາວ ຫລື ຍັງ?
- ຕອບ: ແນ່ນອນວ່າຍຸກ 4.0 ມີຜົນຕໍ່ຊີວິດຂອງຄົນລາວ ໂດຍສະເພາະຄົນທີ່ໃຊ້ອິນເຕີເນັດ-ມືຖື ແຕ່ເວົ້າລວມກໍມີຜົນຕໍ່ກັບເກືອບທຸກຄົນ ທັງໃນເມືອງ ແລະ ຊົນນະບົດ, ຕົວຢ່າງດ້ານດີ: ແມ່ນການກະຈາຍຂ່າວດີ ແລະ ຊ່ວຍເຫຼືອຈາກຄົນໃນເມືອງ ໄປສູ່ຄົນຊົນນະບົດ ໂດຍອາໄສອິນເຕີເນັດຕິດຕໍ່ສືາສານກັນ ແມ່ນເປັນສິ່ງທີ່ດີ, ຕົວຢ່າງດ້ານລົບ: ດານເຜີຍແຜ່ຂ່າວປອມ-ຕວະຍວະຕົ້ມຕຸນຫຼອກລວງກະຈາຍໄປທົ່ວ, ສະນັ້ນການໃຊ້ອິນເຕີເນັດສືບຂ່າວສານຕ້ອງມີສະຕິພິຈາລະນາໄຕ່ຕອງຖີ່ຖ້ວນກ່ອນເຊື່ອ ແຊ ຫຼື ບອກຕໍ່ໆກັນ.

19. : ຖ້າມີຄົນຍັງບໍ່ຄົ້ນພົບຕົນເອງ ພາສຸກຈະແນະນຳແນວໃດຕໍ່ເຂົາແບບສັ້ນໆ?
- ຕອບ: ສຳລັບຜູ້ທີ່ຍັງບໍ່ທັນຄົ້ນພົບຕົວເອງ: ໃຫ້ຖາມໃຈຕົວເອງເບິ່ງວ່າ: ຕົວເອງມັກຫຍັງ? ຜ່ານມາເຄີຍເຮັດໄດ້ບໍ? ເຮັດໄດ້ອອກມາດີບໍ? ຜົນຕອບຮັບຈາກຄົນອ້ອມຂ້າງມີຄວາມເຫັນວ່າແນວໃດ? ເຂົາທັກທ້ວງແນວໃດແດ່? ຖາມໃຈຕົວເອງວ່າຈະລົງມືເຮັດສິ່ງນີ້ໄດ້ບໍ? (ສິ່ງທີ່ຈະເຮັດຕ້ອງບໍ່ສ້າງຄວາມເດືອດຮ້ອນໃຫ້ໃຜ ບໍ່ສ້າງສັດຕູໃຫ້ຕົວເອງ), ພາສຸກເຊື່ອວ່າຄົນເຮົາແຕ່ລະຄົນມີຄວາມສາມາດທີ່ດີ ປະມານຜູ້ລະບໍ່ຫຼຸດ 2-3 ຢ່າງຂຶ້ນໄປ ຖ້າກ້າຈະລົງມືເຮັດສິ່ງທີ່ຕົວເອງຮັກມັກ, ໂອກາດຄວາມສຳເລັດຈະມາຫາແມ່ນມີແນ່ນອນ . ຖາມໃຈຕົວເອງແລ້ວບໍວ່າ: ຈະລົງມືເຮັດຕອນໃດມື້ໃດ? ຕັ້ງເປົ້າໝາຍໄວ້ຄັກໆ ແລ້ວລອງລົງມືເບິ່ງຈັກຄັ້ງ, ຖ້າເຮົາມີຄວາມຕັ້ງໃຈແລ້ວ ບໍ່ມື້ໃດມື້ໜຶ່ງຕ້ອງເປັນຈິງ, ບໍ່ທາງໃດກໍທາງໜຶ່ງ

20. : ຄວາມເສຍໃຈເປັນສິ່ງທີ່ປາສະຈາກບໍ່ໄດ້ ແຕ່ ພາສຸກ ມີວິທີຮັບມືກັບຄວາມເສຍໃຈແນວໃດ?
- ຕອບ: ແນ່ນອນຄົນເຮົາທຸກູນເກີດມາ ຕ້ອງພົບປະກັບຄວາມເສຍໃຈ-ຜິດຫວັງ ເປັນສິ່ງທີ່ຫຼີກລຽງບໍ່ໄດ້. ສຳຫຼັບພາສຸກຄິດວ່າ: ເສັ້ນທາງຂອງຊີວິດຄືກັບໄຍແມງມຸມ, ມັນມີຫຼາຍທາງໃຫ້ໄຕ່ໄປ, ໄປທາງໃດກໍໄດ້, ຜິດຫວັງທາງທາງໜຶ່ງກໍປ່ຽນໄປທາງໜຶ່ງ ເຖິງຈະເສຍເວລາແດ່ກໍເອົາເປັນປະສົບການຊີວິດ. ອາດີດເອົາຫຍັວກັບຄືນມາບໍ່ໄດ້ ແຕ່ເຮົາມີສິດຈະເລີ່ມໃໝ່ໄດ້ທຸກວິນາທີ ຂໍພຽງມີໃຈສູ້ ຢ່າທໍ້ແທ້ສິ້ນຫວັງ ຢ່າໂທດໃຜແມ່ນກະທັ້ງຕົວເອງ, ຍາມເສຍໃຈແຮງຫ້າມທຳຮ້າຍຕົວເອງ ໃຫ້ຄິດເຖິງຄວາມຄອບ ແລະ ຜູ້ກຳເນີດມາ. ພາສຸກຄິດວ່າ ຍາມທີ່ເຮົາຕົກຕໍ່າສຸດ ຄືມື້ທີ່ຊີວິດເຮົາກຳລັງຈະພຸ່ງຂຶ້ນສູງທີ່ສຸດ(ດັ່ງເສັ້ນຊະຕາຊີວິດ), ຂໍພຽງຢ່າລືມເບິ່ງໂອກາດ, ຖ້າໂອກາດດີມາຮີບຄວ້າໄວ້ ເພາະໂອກາດດີບໍ່ໄດ້ມີມາຕະຫຼອດ. ແຕ່ຖ້າເຮົາພາດ ກໍຢ່າລືມໃຫ້ໂອກາດຕົວເອງ ເພາະມື້ໃດມື້ໜຶ່ງ ໂອກາດ ຈະມາຫາຄົນທີ່ຊອກຫາໂອກາດ.

21.: ຄວາມເປັນສາທາລະນະຂອງໂຕຕົນ ທີ່ພາສຸກເປັນ ກໍ່ປັນຫາໃຫ້ຜາສຸກ ບໍ່?
- ຕອບ: ຄວາມຈິງຄວາມເປັນສາທາລະນະ ບໍ່ໄດ້ກໍ່ບັນຫາຫຍັງໃຫ້ເຮົາ ຖ້າເຮົາຫາກບໍ່ສ້າງບັນຫາໃຫ້ຕົວເຮົາເອງ, ເຮົາຕ້ອງເບິ່ງວ່າເຮົາຢູ່ຈຸດໃດ? ຄົນເບິ່ງເຮົາແນວໃດ? ເຮົາຕ້ອງຮູ້ຕົວເອງ, ແຕ່ບໍ່ໃຫ້ຫຼົງຕົວເອງ ຫຼື ຫຼອກຕົວເອງ, ຖ້າເຮັດຜິດຕ້ອງຍອມຮັບຄວາມຈິງ, ຂໍໂທດຮູ້ຈັກປ່ຽນແປງ, ສັງຄົມໃຫ້ອະໄພແນ່ນອນ, ແຕ່ຖ້າເຮັດຜິດແລ້ວບໍ່ຍອມຮັບ ບໍ່ປ່ຽນແປງ ຫຼົງຕົວເອງວ່າບໍ່ຜິດ ບໍ່ສົນ ບໍ່ແຄໃຜ ຊີວິດໃຜມັນ ຖ້າຄິດແນວນີ້ ຄິດວ່າຈະເປັນຄົນສາທາລະນະບໍ່ໄດ້ ເພາະຄົນຈະໂຈມຕີ ຫຼື ເອີ້ນວ່າຄົນຊັງ ຫຼື ດ່າເອົາຫຼາຍ