2 ຍັກອີຕາລີເລັງດຶງທາດິດເສີມທັບ

 

ດູຊານ ທາດິດ ມິດຟິວຂອງ ເຊົາແຮມຕັນ ກຳລັງເນື້ອຫອມເມື່ອຫຼ້າສຸດມີຂ່າວວ່າກຳລັງໄດ້ຮັບຄວາມສົນໃຈຈາກ ຢູເວັນຕຸດ ແລະ ນາໂປລີ ຫຼັງບໍ່ມີຄວາມສຸກກັບການຫຼິ້ນໃຫກັບຕົ້ນສັງກັດ.

 

ຢູເວັນຕຸດ ແລະ ນາໂປລີ ສອງສະໂມສອນຍັກໃຫຍ່ຂອງ ກັນໂຊ ຊີຣີ ອາ ອີຕາລີ ກຽມທີ່ຈະຍື່ນຂໍ້ສະເໜີຂໍຊື ດູຊານ ທາດິດ ກອງກາງຕົວບຸກຂອງ ເຊົາແຮມຕັນ ສະໂມສອນດັງຂອງ ພຣີເມຍລີກ ມາເສີມທັບຊ່ວງຊຳເມີນີ້ຕາມການລາຍງານຂອງ ເດລີ ສະຕາ ສື່ຊັ້ນນຳຂອງເມືອງຜູ້ດີເມື່ອວັນອັງຄານທີ່ຜ່ານມາ.

 

ເຊື່ອກັນວ່າດາວເຕະທີມຊາດເຊີເບຍອາຍຸ 28 ປີມີຄວາມສົນໃຈທີ່ຈະອຳລາຖິ່ນ ເຊນ ແມຣີ ສະເຕດຽມ ຊ່ວງຊຳເມີນີ້ຫຼັງຈາກທີ່ເປີດປາກວິຈານກຸນຊື ໂຄລດ ປູແອວ ທີ່ມັກປ່ຽນເຂົາອອກຈາກສະໜາມຫຼາຍໆເທື່ອ.

 

ດ້ວຍເຫດຜົນດັ່ງກ່າວເຮັດໃຫ້ ຢູເວັນຕຸດ ແລະ ນາໂປລີ ສະແດງຄວາມສົນໃຈທີ່ຈະດຶງ ທາດິດ ໄປຮ່ວມທັບ ຂະນະທີ່ ອາເຊນອນ ກໍມີຂ່າວວ່າຢາກໄດ້ຕົວເຊັ່ນກັນໂດຍເຊື່ອກັນວ່າອະດີດນັກເຕະ ທະເວັນເຕ ມີຄ່າຫົວຢູ່ທີ່ປະມານ 13 ລ້ານປອນ.

 

ສຳລັບລະດູການນີ້ ທາດິດ ລົງຫຼິ້ນກັບລີກໃຫ້ ເຊົາແຮມຕັນ ໄປແລ້ວ 22 ນັດຍິງໄດ້ 3 ປະຕູກັບ 4 ແອັດຊິດ.

 

ບົດຄວາມໃຫມ່ໆ