18 ປີ!!ພຽດສ໌ກຽມຣີທາຍຫຼັງຈົບລະດູການນີ້

 

ພໍ ພຽດສ໌ ຟໍເວິດຕົວເກົ໋າຂອງ ລອສ ແອັງເຈີລິສ ຄລິບເປີ້ ປະກາດແລ້ວວ່າລະດູການທີ່ຈະຮອດນີ້ຈະເປັນລະດູການສຸດທ້າຍຂອງຕົນ ພ້ອມກັບບອກວ່າຈະພະຍາຍາມຊ່ວຍທີມເປັນແຊມ ເອັນບີເອ ສົ່ງທ້າຍໃຫ້ໄດ້.

 

ພໍ ພຽດສ໌ ຟໍເວິດປະສົບການສູງຂອງ ລອສ ແອັງເຈີລິສ ຄລິບເປີ້ ທີມດັງໃນກິລາບານບ້ວງ ເອັນບີເອ ອາເມລິກາປະກາດຢືນຢັນເມື່ອວັນຈັນທີ່ຜ່ານມາວ່າ ຕົນເອງມີແຜນທີ່ຈະຣີທາຍຫຼັງຈາກຈົບລະດູການ 2016-2017 ທີ່ກຳລັງຈະມາຮອດນີ້.

 

ຟໍເວິດດາວດັງອາຍຸ 38 ປີໂບຍບິນຢູ່ໃນລີກມາດົນນານແລ້ວເຖິງ 18 ລະດູການໂດຍຢູ່ກັບ ບອສຕັນ ເຊວຕິກ ເຖິງ 15 ລະດູການກ່ອນທີ່ຈະຍ້າຍໄປຫຼິ້ນໄລຍະສັ້ນໆກັບ ບລູກລິນ ເນັດ ແລະ ວໍຊິງຕັນ ວິຊາດ ແລະ ຫາກໍເຊັນສັນຍາຍ້າຍມາຮ່ວມທີມ ແອວເອ ຄລິບເປີ້ ເມື່ອປີ 2015.

 

“ນີ້ແມ່ນລະດູການສຸດທ້າຍຂອງຂ້ອຍ ມັນຮອດເວລາແລ້ວທີ່ຈະຕ້ອງກ້າວຂ້າມຈາກເກມບາສເກັດບອນ ມັນເປັນການຕັດສິນໃຈທີ່ຍາກຫຼາຍ ເຊິ່ງມັນກໍຄືກັບການຕັດສິນໃຈທີ່ຍາກໃນຄັ້ງອື່ນໆ ຂ້ອຍຄິດວ່າເຮົາຈຳເປັນຕ້ອງມີຄວາມສຸກກັບຕົນເອງ ແລະ ຂ້ອຍກໍມີຄວາມສຸກກັບການຣີທາຍຂອງຂ້ອຍ ແຕ່ຕອນນີ້ຂ້ອຍຍັງເຫຼືອອີກໜຶ່ງລະດູການ ອີກໜຶ່ງໂອກາດກັບ ຄລິບເປີ້ ທີມທີ່ຢູ່ໃນເມືອງບ້ານເກີດຂອງຂ້ອຍ ເຮົາມີຄວາມກະຫາຍເຮົາຕ້ອງການທີ່ຈະເປັນແຊ້ມ”.

 

“ຫຼັງຈາກທີ່ຢູ່ໃນ ເອັນບີເອ ມາດົນ 18 ປີມັນເຫຼືອເຊື່ອຫຼາຍທີ່ຕໍ່ໄປນີ້ຂ້ອຍຈະຕ້ອງແລ່ນໄປແຕ່ລະສະໜາມເປັນເກມສຸດທ້າຍ ເພາະສະນັ້ນຂ້ອຍຈະຕ້ອງມີຄວາມສຸກກັບທຸກໆການຊ້ອມ, ທຸກໆເທື່ອທີ່ນັ່ງລົດເມ, ທຸກໆມື້ທີ່ໄດ້ກິນເຂົ້າກັບເພື່ອນຮ່ວມທີມ, ທຸກໆການແລ່ນຜ່ານອູໂມງລົງສູ່ສະໜາມ ຂ້ອຍຈະເຮັດໃນສ່ວນຂອງຂ້ອຍໃຫ້ດີທີ່ສຸດເພື່ອຊ່ວຍທີມໄປສູ່ຈຸດໝາຍ” ພຽດສ໌ ເປີດໃຈລົນໃນ ເພລເຢີ ທຣິບູນ.

 

ທັງນີ້ ພຽດສ໌ ເຊິ່ງຕິດ ອໍສະຕາ 10 ເທື່ອເຄີຍໄດ້ແຊ້ມ ເອັນບີເອ 1 ກັບ ເຊວຕິກ ເມື່ອປີ 2008 ແລະ ມີສະຖິຕິລົງຫຼິ້ນຕະຫຼອດອາຊີບຢູ່ທີ່ 20.0 ແຕ້ມ, 5.7 ຣີບາວ, 3.6 ແອສຊິສ, ສະຕິວ ແລະ ປ້ອງກັນທີ່ 0.6 ໂດຍກ່ອນໜ້ານີ້ເມື່ອວັນສຸກທີ 23 ກັນຍາທີ່ຜ່ານມາ ເຄວິນ ກາເນັດ ອະດີດເພື່ອນຮ່ວມທີມຂອງ ພຽດສ໌ ທີ່ ເຊວຕິກ ແລະ ເນັດ ກໍຫາກໍປະກາດຣີທາຍຫຼັງຈາກທີ່ໂລດແລ່ນຢູ່ໃນ ເອັນບີເອ ມາດົນເຖິງ 21 ປີ.