13 ກໍລະກົດ ວັນອະນຸຮັກສັດນ້ຳ-ສັດປາ

ໄລຍະ​ຜ່ານ​ມາ ລັດຖະບານ ​ແຫ່ງ ສປປ ລາວ ​​​ເຫັນ​ໄດ້​ຄວາມສຳຄັນ ຂອງ​ວຽກ​ງານ​ຄຸ້ມ​ຄອງ ປົກ​ປັກ​ຮັກສາ​ຊັບພະຍາກອນ​ ທຳ​ມະ​ຊາດ ​ແລະ ສິ່ງ​ແວດ​ລ້ອມ ​ໂດຍ​ສະເພາະ ວຽກ​ງານ​ປົກ​ປັກ​ຮັກສາ​ປ່າ​ໄມ້ ​ແລະ ອະນຸລັກ​ສັດ​ນ້ຳ–ສັດປ່າ ດ້ວຍ​ການ​ກຳນົດຖິ່ນ​ທີ່ຢູ່​ອາ​​ໄສ​ ຂອງ​ສັດ​ນ້ຳ ​ແລະ ສັດ​ປ່າ ລວ​ມຢູ່​ໃນ​ປ່າ​ປ້ອງ​ກັນ ​ແລະ ປ່າ​ສະຫງວນ​ແຫ່ງ​ຊາດ; ອອກ​ກົດໝາຍລະບຽບການ ​ແລະ ນິຕິ​ກຳ​ຕ່າງໆທີ່​ກ່ຽວຂ້ອງ​ ໃນ​ການ​ຄຸ້ມ​ຄອງ ​ແລະ ການຈັດ​ຕັ້ງ​ປະຕິບັດ​ຕົວ​ຈິງ​ເຊັ່ນ:ກົດໝາຍວ່າ​ດ້ວຍ​ປ່າ​ໄມ້, ກົດໝາຍວ່າ​ດ້ວຍ​ສັດ​ນ້ຳ ​ແລະ ສັດປ່າ, ກົດໝາຍວ່າ​ດ້ວຍ​ສິ່ງ​ແວດ​ລ້ອມ, ກົດໝາຍວ່າ​ດ້ວຍ​ນ້ຳ ​ແລະ ຊັບ​ພະ​ຍາກ​ອນນ້ຳ ​ແລະ ກົດໝາຍວ່າ​ດ້ວຍ​ການ​ປະມົງ. ພ້ອມ​ນັ້ນ​ ກໍ​ມີ​ແຜນ​ຍຸດ​ທະ​ສາດ​ປ່າ​ໄມ້ 2020 ​ແລະ ຍຸ​ດທະ​ສາດ ​ແລະ ​ແຜນ​ດຳ​ເນີນ​ງານ​ຊີວະ​ນາໆພັນ ​ແຫ່ງ​ຊາດ 2020 ​ເປົ້າໝາຍຫລັກ​ກໍ​ເພື່ອ​ຮັບປະກັນ​ ຄວາມ​ຍືນ​ຍົງ​ຄົງ​ຕົວ​ທາງ​ດ້ານ ຊັບພະຍາກອນ​ ທຳມະ​ຊາດ ​ແລະ ສິ່ງ​ແວດ​ລ້ອມ ​ເວົ້າ​ລວມ​, ເວົ້າ​ສະ​ເພາະຊັບພະຍາກອນ​ປ່າ​ໄມ້,ສັດ​ນ້ຳ–ສັດປ່າ ​ແລະ ຊີວະ​ນາໆພັນ ​ໃນ ​ສປປ ລາວ ​ໃຫ້​ມີ​ຄວາມ​ເຕີບ​ໃຫຍ່​ ຂະຫຍາຍຕົວ​ຢ່າງ​ບໍ່​ຢຸດ​ຢັ້ງ. ​ເນື່ອງ​ໃນ​ວັນ​ປ່ອຍ​ປາ ​ແລະ ອະນຸລັກ​ສັດນ້ຳ–ສັດປ່າ ​ແຫ່ງ​ຊາດ ວັນ​ທີ 13 ກໍ​ລະ​ກົດ 2015 ນີ້ ​ໃຫ້​ເປັນ​ຂະ​ບວນຟົດ​ຟື້ນ ​ໃນ​ຂອບເຂດທົ່ວ​ປະ​ເທດ, ລັດ​ຖະມົນຕີ​ວ່າການ​ ກະຊວງ​ຊັບພະຍາກອນ​ ທຳ​ມະ​ຊາ​ດ ​ແລະ ສິ່ງ​ແວດ​ລ້ອມ ອອກ​ແຈ້ງ​ການ​ ​ໃຫ້​ພະ​ແນ​ກຊັບພະຍາກອນ ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ປະຈຳ​ແຂວງ ​ແລະ ນະຄອນ​ຫລວງ ​ເປີດ​ບັ້ນ​ເຊື່ອມ​ຊຶມ ​ໂຄສະນາ​ເຜີ​ຍ​ແຜ່ ​ເນື້ອ​ໃນ​ຕົ້ນຕໍຂອງ​ກົດໝາຍ ວ່າ​ດ້ວຍ​ສັດ​ນ້ຳ ​ແລະ ສັດປ່າ ​ໃຫ້​ແກ່​ພະນັກງານ, ທະຫານ,ຕຳຫລວດ, ພໍ່ຄ້າ​ຊາວ​ຂາຍ, ຜູ້​ປະກອບ​ການ​ຕະຫລອດ​ຮອດ​ປະຊາຊົນ ບັນດາ​ເຜົ່າ​ຢູ່​ທ້ອງ​ຖິ່ນ​ໃຫ້​ຮັບ​ຮູ້ ​ແລະ ​ເຂົ້າ​ໃຈ ​ເຫັນ​ໄດ້​ຄວາມ​ສຳ​ຄັນ ຂອງ​ສັດ​ນ້ຳ ​ແລະ ສັດປ່າ ຕໍ່​ສິ່ງ​ແວດ​ລ້ອມ​ທຳ​ມະ​ຊາ​ດ, ຕໍ່​ຊີວິດ​ການ​ເປັນ​ຢູ່​ຂອງ​ປະຊາຊົນ ບັນດາ​ເຜົ່າ​ໃນ​ຊົນນະບົດ ​ແລະ ​ເຫັນ​ໄດ້​ເຖິງ​ສະພາບ​ການຫ​ລຸດໜ້ອຍ ຖອຍ​ລົງ​ຂອງ​ສັດ​ນ້ຳ ​ແລະ ສັດປ່າ ຂອງ​ປະ​ເທດ​ເຮົາ ທັງດ້ານ​ຈຳນວນ ​ແລະ ຊະນິດ​ພັນ ​ໂດຍ​ຜ່ານ​ສື​ຕ່າງໆຂອງ​ລັດ​. ສຳລັບ​ບັນດາ​ໂຮງຮຽນ​ຊັ້ນ​ປະຖົມ, ມັດທະຍົມ​ຕອນ​ຕົ້ນ,ມັດທະຍົມ​ຕອນປາຍ ​ແລະ ມະຫາວິ​ທະຍາ​ໄລ ບ່ອນ​ທີ່​ມີ​ເງື່ອນ​ໄຂ ກໍ​ຄວນ​ຈັດ​ຕັ້ງ​ຂະ​ບວນການ​ເຄື່ອນ​ໄຫວ ​ເພື່ອ​ສະ​ເຫລີ​ມສະຫລອງ​ວັນດັ່ງກ່າວ ດ້ວຍ​ຫລາຍ​ຮູບ​ການ​ເຊັ່ນ: ປາຖະກະຖາ​ກ່ຽວກັບ​ຄວາມ​ສຳຄັນ​ຂອງ​ວັນ​ທີ 13 ກໍລະກົດ, ການ​ແຂ່ງຂັນ​ປະ​ກວດ​ຮູບ​ແຕ້​ມ, ​ເປີດ​ກວ້າງ​ການ​ແຂ່ງຂັນ​ກິລາ, ປະ​ກວດ​ບົດ​ເພງ, ບົດ​ລຳ, ບົດ​ເລື່ອງ​ສັ້ນ, ຈັດ​ງານ​ວາງສະ​ແດງ​ຮູບ​ພາບ ທີ່​ຕິດ​ພັນ​ກັບ​ວຽກງານ ປົກ​ປັກ​ຮັກ​ສາ​ທຳ​ມະ​ຊາດ ​ແລະ ອະ​ນຸລັກ​ສັດ​ນ້ຳ ​ແລະ ສັດປ່າ (ວັງສະ​ຫງວນ ຫລື ປ່າ​ສັກ​ສິດ ຂອງ​ບ້ານ ) ຈະ​ໄດ້​ຮັບ​ການ​ຍ້ອງ​ຍໍ​ ​ແລະ ນະ​ໂຍບາຍ​ອື່ນໆຕາ​ມມາດ​ຕາ 66 ຂອງ​ກົດໝາຍ ວ່າ​ດ້ວນ​ສັດ​ນ້ຳ ​ແລະ ສັດປ່າ; ສົບ​ທົບ​ກັບ​ອຳນາດ​ການ​ປົກຄອງ​ທ້ອງ​ຖິ່ນ ປຸກ​ລະດົມ ​ແລະ ຈັດ​ຕັ້ງ​ປ່ອຍ​ປາ​ໃສ່ໜອງ, ບຶງ, ​ແມ່​ນ້ຳ​ລຳ​ເຊ, ອ່າງ​ເກັບ​ນ້ຳ​ເຊັ່ນ: ອ່າງ​​ເກັບ​ນ້ຳ​ຊົນລະປະທານ, ​ເຂື່ອນ​ໄຟຟ້າ​ນ້ຳ​ຕົກ ​ແລະ ປ່ອຍ​ສັດປ່າ​ປະ​ເພ​​ດຕ່າງໆ ທີ່​ໄດ້ມາ​ຈາກ​ການ​ເພາະ​ພັນ ຫລື ​ໄດ້​ມາ​ຈາກ​ການ​ຂະຫຍາຍ​ພັນ​ຄືນ​ສູ່​ທຳ​ມະ​ຊາດ ຕາມ​ເຂດ​ພື້ນ​ທີ່​ປ່າ​ສະຫງວນ, ປ່າ​ປ້ອງ​ກັນ ​ແລະ ຕາມ​ເຂ​ດຟື້ນ​ຟູ​ປ່າ ທີ່​ເຫັນ​ວ່າ​ມີ​ຄວາມ​ເໝາະສົມ, ປອດ​ໄພ ​ແລະ ສາມາ​ດອອກ​ໃຫ້​ແຜ່​ພັນ​ໄດ້. ​ ພ້ອມ​ກັນ​ນີ້, ໃຫ້​ຖື​ເອົາ​ການ​ສ້າງ​ຂະ​ບວນການ​ປ່ອຍ​ປາ ​ແລະ ອະນຸລັກ​ສັດ​ນ້ຳ ​ແລະ ສັດປ່າ ​ເປັນ​ວັນ​ສຳຄັນ​ປະ​ຈຳປີ ​ເຊິ່ງ​ເລີ່​ມ​ແຕ່​ວັນ​ທີ 1 ກໍລະ​ກົດ ​ໄປ​ເຖິງ ວັນ​ທີ31 ຕຸລາ ຂອງ​ແຕ່ລະ​ປີ ​ເພາະ​ໄລຍະ​ນີ້​ເປັນ​ລະດູ​ການ​ທີ່​ສັດ​ປະ​ເພ​ດ ຕ່າງໆ ກຳລັງ​ຖືພາ​ມານ ​ແລະ ອອກ​​ແມ່​ແຜ່​ລູກ ​ໃນ​ໄລຍະ​ນີ້ ​ແມ່ນ​ຫ້າມ​ເດັດ​ຂາດ​ບໍ່​ໃຫ້​ລ່າ​ສັດ​ນ້ຳ ​ແລະ ສັດປ່າ ທຸກ​ປະ​ເພດ. ​ໃນ​​ໄລຍະ​ນີ້ ​ເປັນ​​ໄລ​ຍະທີ່​ປາ​ຊະນິດ​ຕ່າງໆ ພວມ​ຂະຫຍາ​ຍພັນ ​ແລະ ວາງ​ໄຂ່​ຕາມ​ແມ່​ນ້ຳ​ລຳ​ເຊ, ຫ້ວຍ, ຄອງ, ບຶງ​ຕ່າງໆ ​ເຊິ່ງຢູ່​ບາງ​ທ້ອງ​ຖິ່ນ​ບາງ​ແຂວງ​ ແມ່ນ​ມີ​ຄວາມ​ແຕກ​ຕ່າງ​ກັນ​ໄປ ຕາ​ມພູມີ​ປະ​ເທດ, ດິນ​ຟ້າ​ອາກາດ ​ແລະ ສິ່ງ​ແວດ​ລ້ອມ ທີ່​ມີ​ອິດ​ທິພົນ​ຕໍ່​ການ​ວາງ​ໄຂ່ ​ແລະ ອອກ​ແມ່​ແຜ່ລູກ ກວມ​ອັດຕາ​ສູງ​ໃນ​ໄລ​ຍະ​ນີ້ ຫລື ​ເອີ້ນ​ກັນ​ວ່າ​ໄລຍະເຂົ້າ​ພັນ​ສາ. ສະ​ນັ້ນ​ໃນ​ໄລຍະ​ນີ້​ ແມ່ນ​ຫ້າມ​​ເດັດຂາດ ບໍ່​ໃຫ້​ລ່າ​ສັດ​ນ້ຳ ​ແລະ ສັດປ່າ ປະ​ເພດ​ຫວງ​ຫ້າມ ຫລື ບັນຊີ I ​ແລະ​ ສັດ​ນ້ຳ-ສັດປ່າ ປະ​ເພດ​ຄຸ້ມ​ຄອງ ຫລື ບັນຊີ II. ສຳລັບ​ສັດ​ນ້ຳ ​ແລະ ສັດປ່າ ປະ​ເພດ​ທົ່ວ​ໄປ ​ແມ່ນ​ສາມາດ​ລ່າ ຫລື ຫາມາ​ເປັນ​ອາຫານ​ໄດ້. ແຫລ່ງຂໍ້ມູນ: ສຳນັກຂ່າວສານປະເທດລາວ Cr.tonamca