10 ໂລກຮ້າຍ ທີ່ຈະຫລຸດຄວາມສ່ຽງໄດ້ ພຽງແຕ່ດື່ມນໍ້າໃຫ້ຫຼາຍຂຶ້ນ

 

ປະໂຫຍດຂອງການດື່ມນໍ້າ ມີຫຼາກຫຼາຍຈົນນັບບໍ່ຖ້ວນ ແລະນີ້ແມ່ນອີກ 10 ຄວາມສ່ຽງໂລກທີ່ຈະຫລຸດລົງແຕ່ພຽງເຮົາດື່ມນໍ້າໃຫ້ຫຼາຍຂຶ້ນ

 

     ນໍ້າລ້າໆ ເປັນເຄື່ອງດື່ມທີ່ຮຽກໄດ້ວ່າດີທີ່ສຸດໃນໂລກຫາກດື່ມເຂົ້າໄປແບບພຽງພໍກໍ່ຈະຊ່ວຍໃຫ້ເຮົາມີສຸຂະພາບທີ່ດີໄດ້ ນອກຈາກນີ້ຍັງຊ່ວຍຫລຸດຄວາມສ່ຽງໂລກໄພໄຂ້ເຈັບໄດ້ອີກຫຼາຍຢ່າງ ແບບທີ່ເຮົານໍາມາບອກກັນໃຫ້ຮູ້ກັນໃນມື້ນີ້ວ່າ ພຽງເຮົາດື່ມນໍ້າລ້າໆເປັນປະຈໍາ ແລະພຽງພໍ ມື້ລະ 6-8 ຈອກ ກໍ່ສາມາດບອກລາໂລກເຫຼົ່ານີ້ໄດ້

ໂລກຫົວໃຈ

     ຈາກການສຶກສາ Johns Hopkins Bloomberg School of Public Health  ພົບວ່າ ວາລະສານຕິພິມໃນວິຊາການ American Journal of Epidemiology ໃນປີ 2002 ເຫັນວ່າ ຜູ້ທີ່ມັກດື່ມນໍ້າມື້ລະ 5 ຈອກຂຶ້ນໄປຈະມີຄວາມສ່ຽງໂລກຫຼອດເລືອດຫົວໃຈຕໍ່າກວ່າຜູ້ທີ່ດື່ມນໍ້າໜ້ອຍມື້ລະ ຈອກ ອີກທັງຍັງເຮັດໃຫ້ຄວາມສ່ຽງໂລກຫົວໃຈວາຍ ແລະການເສຍຊີວິດຈາກໂລກຫົວໃຈຫລຸດລົງໄດ້ເຖິງ 50ຊື່ງເມື່ອທຽບກັບວິທີສ້າງເສີມສຸຂະພາບເພື່ອຫລຸດຄວາມສ່ຽງໂລກຫົວໃຈວິທີອື່ນໆ ການອອກກໍາລັງກາຍ ຫຼືການຫລຸດນໍ້າໜັກແລ້ວ ການດື່ມນໍ້າຫຼາຍໆ ຖືເປັນວິທີທີ່ມີປະສິດທິພາບຫຼາຍ ແຕ່ກໍ່ຢ່າລືມວ່ານໍ້າທີ່ດື່ມກໍ່ຕ້ອງເປັນນໍ້າລ້າໆທໍາມະດາເທົ່ານັ້ນ ເພາະຖ້າເປັນນໍ້າຊະນິດອື່ນກໍ່ບໍ່ໄດ້ຊ່ວຍອັນໃດໄດ້ຄືກັນ ບາງເທື່ອຈະໄດ້ຄວາມສ່ຽງສຸຂະພາບອື່ນໆ ນໍາມາອີກແບບບໍ່ຮູ້ຕົວ

ໂລກມະເຮັງ

          ອາດຈະເຄີຍໄດ້ຍິນກັນມາແລ້ວວ່າ ການທີ່ດື່ມນໍ້າສາມາດຕ້ານໂລກມະເຮັງບາງຊະນິດໄດ້ ໂດຍການສຶກສາຊື່ງຕິພິມໃນ Journal of Clinical Oncology ເຫັນວ່າການດື່ມນໍ້າຫຼາຍໆ ສາມາດຊ່ວຍຫລຸດຄວາມສ່ຽງໃນການກໍ່ຕົວຂອງເຊວມະເຮັງໄດ້ ໂດຍສະເພາະມະເຮັງໃນພົກຢ່ຽວທີ່ຄວາມສ່ຽງຈະຫລຸດລົງ 49% ນອກຈາກນີ້ການດື່ມນໍ້າກໍ່ຍັງຊ່ວຍຫລຸດຄວາມສ່ຽງໂລກມະເຮັງລໍາໄສ້ໃຫຍ່ໃນຄົນໄວກາງຄົນໄດ້ອີກດ້ວຍ ຊື່ງການວິໄຈເຜີຍໃຫ້ເຫັນວ່າຫາກດື່ມນໍ້າຢ່າງນ້ອຍມື້ລະ 5 ຈອກຂຶ້ນໄປຈະຊ່ວຍຊະລ້າງສານກໍ່ມະເຮັງໃນຮ່າງກາຍໄດ້ເປັນຢ່າງດີ

ເຈັບຫົວ

     ອາການເຈັບຫົວຊໍ້ເຮື້ອແບບໂລກໄມເກຣນນີ້ກໍ່ສາມາດບັນເທົາລົງໄດ້ໂດຍດື່ມນໍ້າຄືກັນ ໂດຍຈາກການສຶກສາທີ່ຕິພິມໃນວາລະສານວິຊາການ ເຫັນວ່າເມື່ອນໍາຜູ້ເຈັບດ້ວຍໂລກໄມເກຣນມາແບ່ງອອກເປັນ 2 ກຸ່ມ ກຸ່ມທໍາອິດໃຫ້ຮັບປະທານຢາຫຼອກ ແລ້ວອີກກຸ່ມໃຫ້ດື່ມນໍ້າມື້ລະ 1,5 ລິດ ທຸກມື້ຕະຫຼອດ 2ອາທິດ ຜົນທີ່ໄດ້ຮັບຄື ກຸ່ມທີ່ດື່ມນໍ້າມີໄລຍະເວລາໃນການປວດຫລຸດລົງ 21 ຊົ່ວໂມງ ແລະປວດຫລຸດນ້ອຍລົງກວ່າກຸ່ມທໍາອິດອີກດ້ວຍ ນອກຈາກນີ້ການດື່ມນໍ້າຢ່າງພຽງພໍຍັງສາມາດບັນເທົາອາການເຈັບຫົວທໍາມະດາໄດ້ອີກດ້ວຍ

ໂລກອ້ວນ

     ການດື່ມນໍ້າຕະຫຼອດ ຊ່ວຍຫລຸດຄວາມຢາກອາຫານ ແລະເຮັດໃຫ້ອີ່ມໄວ ສົ່ງຜົນໃຫ້ເຮົາກິນໄດ້ໜ້ອຍລົງ ແລະຫລຸດນໍ້າໜັກໄດ້ຜົນຫຼາຍຂຶ້ນ ອີກທັງການດື່ມນໍ້າກໍ່ຍັງຊ່ວຍໃຫ້ຮ່າງກາຍເກີດການເຜົາໄໝ້ພະລັງງານຢູ່ຕະຫຼອດເວລາ ໄຂມັນສະສົມທີ່ຢູ່ໃນຮ່າງກາຍກໍ່ຈະຄ່ອຍໆ ຫລຸດລົງ ຫ່າງໄກຈາກຄວາມສ່ຽງໂລກອ້ວນ ແລະບັນດາໂລກອື່ນໆ ອີກຫຼາກຫຼາຍທີ່ມີໂລກອ້ວນເປັນຕົ້ນເຫດ

ໂລກຄວາມດັນເລືອດສູງ

     ເລືອດຂອງເຮົາປະກອບດ້ວຍນໍ້າກວ່າ 92 % ການດື່ມນໍ້າໜ້ອຍລົງຈະເຮັດໃຫ້ເລືອດເຂັ້ມຂຶ້ນ ສົ່ງຜົນໃຫ້ລະບົບໄຫຼວຽນເລືອດເຮັດວຽກຜິດປົກກະຕິ ເຮັດໃຫ້ເກີດຄວາມດັນໃນເລືອດຫຼາຍຂຶ້ນ ແລະສ່ຽງຕໍ່ການເປັນໂລກຄວາມດັນເລືອດສູງ ຖ້າບໍ່ຢາກພົບກັບໂລກເຫຼົ່ານີ້ ຕ້ອງດື່ມນໍ້າໃຫ້ພຽງພໍ ເມື່ອຮ່າງກາຍໄດ້ຮັບນໍ້າພຽງພໍ ເລືອດກໍ່ຈະຢູ່ໃນພາວະປົກກະຕິ ສາມາດໄຫຼວຽນລະບົບໄດ້ດີ ຫລຸດຄວາມສ່ຽງໂລກຄວາມດັນເລືອດສູງໄປໄດ້ຫຼາຍ

ໂລກຜິວໜັງ

     ການດື່ມນໍ້າບໍ່ໄດ້ພຽງພໍແຕ່ເຮັດໃຫ້ລະບົບພາຍໃນຂອງເຮົາເຮັດວຽກໄດ້ດີຂຶ້ນ ແຕ່ຍັງສົ່ງຜົນຕໍ່ຜິວໜັງຂອງເຮົາອີກດ້ວຍ ການທີ່ເຮົາດື່ມນໍ້າແບບພຽງພໍຈະເຮັດໃຫ້ຜິວພັນເຮົາບໍ່ແຫ້ງ ແລະຄວາມສ່ຽງໂລກຜິວໜັງອັກເສບລວມທັງໂລກສະເກັດເງິນຫລຸດລົງອີກດ້ວຍ ແຖມຍັງສົ່ງຜົນໃຫ້ຜິວພັນສົດໃສເບິ່ງອ່ອນກວ່າໄວໄດ້ແບບບໍ່ຕ້ອງອາໄສຄຣີມບໍາລຸງໃຫ້ເສຍເງິນ

ໂລກໄຕ

     ການດື່ມນໍ້າໜ້ອຍສົ່ງຜົນໂດຍກົງຕໍ່ໄຕຂອງເຮົາ ເພາະໄຕຂອງເຮົາເຮັດໜ້າທີ່ຮອງຮັບຂອງເສຍ ແລະສານຜິດຕ່າງໆ ອອກຈາກຮ່າງກາຍ ການດື່ມນໍ້າຫຼາຍໆ ຈະເຮັດໃຫ້ຮ່າງກາຍກໍາຈັດສານຜິດອອກຈາກຮ່າງກາຍໄດ້ດີຂຶ້ນ ບໍ່ມີສານຜິດໃດໆ ຕົກຄ້າງຢູ່ໃນໄຕ ຫລຸດຄວາມສ່ຽງໂລກໄຕວາຍ ແລະຫນິ້ວໃນໄຕ ແຖມຍັງກະຕຸ້ນການເຮັດວຽກຂອງໄຕໃຫ້ດີຂຶ້ນອີກດ້ວຍ

ໂລກເບົາຫວານ

     ຫຼາຍຄົນອາດເຄີຍໄດ້ຍິນມາແລ້ວວ່າການດື່ມນໍ້າຊ່ວຍຫລຸດນໍ້າຕານໃນເລືອດໄດ້ ເປັນວິທີຫລຸດເບົາຫວານທີ່ດີທີ່ສຸດໆ ແຕ່ບໍ່ວ່າຈະສົ່ງຜົນດີແຕ່ກັບຜູ້ເປັນໂລກເບົາຫວານເທົ່ານັ້ນ ຄົນທີ່ຍັງບໍ່ເປັນໂລກເບົາຫວານ ການດື່ມນໍ້າຫຼາຍໆ ກໍ່ຊ່ວຍຫລຸດຄວາມສ່ຽງໄດ້ເຊັ່ນກັນ ຖ້າຫາກທ່ານເປັນຄົນທີ່ມັກຮັບປະທານຂອງຫວານ ການດື່ມນໍ້າຈະເຮັດໃຫ້ນໍ້າຕານໃນເລືອດຫລຸດລົງໄດ້ຄືກັນ ແຖມຍັງຊ່ວຍຫລຸດຄວາມສ່ຽງສຸຂະພາບອື່ນໆ ທີ່ອາດເປັນສາເຫດໃຫ້ເກີດໂລກເບົາຫວານໄດ້ອີກ ໂລກອ້ວນເປັນຕົ້ນ

ໂລກພູມແພ້

     ເມື່ອເກີດອາການພູມແພ້ ສານຮີສຕາມີນຈະຫຼັ່ງອອກມາເພື່ອຕອບສະໜອງຕໍ່ການແພ້ ແລະຈະເຂົ້າໄປສັ່ງການໃຫ້ຮ່າງກາຍຈໍາກັດການເຮັດວຽກຂອງລະບົບທາງເດີນຫາຍໃຈ ຊື່ງເປັນວິທີທີ່ຮ່າງກາຍໃຊ້ເພື່ອຮັກສາລະດັບຂອງແຫຼວພາຍໃນ ແລະຖ້າຫາກຜູ້ເຈັບເປັນຄົນນັ້ນດື່ມນໍ້າໜ້ອຍ ຫຼືເປັນໂລກຫອບຫືດ ອາການຈະຍິ່ງຮຸນແຮງເພາະຮ່າງກາຍຕ້ອງຫຼັ່ງສານຮີສຕາມີນອອກມາຈໍານວນຫຼາຍກວ່າປົກກະຕິ ຊື່ງການດື່ມນໍ້າຫຼາຍໆ ຕິດຕໍ່ກັນເປັນປະຈໍາທຸກມື້ເຮັດໃຫ້ສານຮີສຕາມີນຫຼັ່ງອອກມາໜ້ອຍລົງໄດ້ ເຮັດໃຫ້ລະບົບທາງເດີນຫາຍໃຈເຮັດວຽກໄດ້ເປັນປົກກະຕິເຖິງວ່າຈະເກີດອາການພູມແພ້ ອີກທັງຍັງຊ່ວຍຫລຸດອາການແພ້ ຫຼືຄວາມຮຸນແຮງຂອງອາການຫອບຫືດໄດ້ອີກດ້ວຍ

ໂລກປວດຂໍ້

     ນໍ້າມີຄວາມຈໍາເປັນຕໍ່ເນື້ອເຍື່ອໃນຮ່າງກາຍຂອງຄົນເຮົາ ເພາະເນື້ອເຍື່ອເປັນສ່ວນທີ່ຕ້ອງການຄວາມຊຸ່ມຊືນຕະຫຼອດເວລາ ຊື່ງຫາກເຮົາດື່ມນໍ້າໃນປະລິມານທີ່ພຽງພໍຕໍ່ຄວາມຕ້ອງການຂອງຮ່າງກາຍ ກໍ່ຈະເຮັດໃຫ້ເນື້ອເຍື່ອສ່ວນຕ່າງໆ ບໍ່ເກີດການອັກເສບ ໂດຍສະເພາະທີ່ບໍລິເວນຂໍ້ຕ່າງໆ ເຮັດໃຫ້ຄວາມສ່ຽງທີ່ເກີດການອັກເສບທີ່ຂໍ້ຕໍ່ ຫຼືໂລກປວດຂໍ້ຫລຸດລົງ

     ບໍ່ວ່າແນວໃດກໍ່ຕາມ ການດື່ມນໍ້າກໍ່ຖືເປັນສິ່ງທີ່ດີທີ່ສຸດທີ່ເຮົາຄວນຈະເຮັດ ເພາະຮ່າງກາຍຂອງເຮົາຕ້ອງການນໍ້າ ມາເລີ່ມສ້າງສຸຂະພາບດີກັນຕັ້ງແຕ່ຕອນນີ້ດ້ວຍການດື່ມນໍ້າໃຫ້ຫຼາຍຂຶ້ນ ແລ້ວທ່ານຈະພົບວ່າສຸຂະພາບຂອງທ່ານດີຂຶ້ນແບບຜິດຕາແນ່ນອນເລີຍ

 

ທີ່ມາ: www.sedthakid.la