“ປູ ວາດສະໜາ” ນັກຮ້ອງສາວ ທີ່ພວມມາແຮງ

 

   ນັ່ງເບິ່ງນັ່ງສັງເກດວົງການເພງບ້ານເຮົາສູ່ມື້ນີ້ ..ຍອມຮັບວ່າ ເພງປະເພດບ້ານນາ ມີສີສັນຫຼາຍ ຖ້າຂາດການຕິດຕາມພຽງອາທິດສອງອາທິດ ຖືວ່ານຳບໍ່ທັນໂລດວ່າຊັ້ນສາ.. ອັນນີ້ແມ່ນອີ່ຫຼີ ໃນເດືອນນຶ່ງໆຈະມີສິລະປິນທັງໜ້າເກົ່າ ແລະ ໜ້າໃໝ່ ປ່ອຍຜົນງານອອກມາຫຼາຍຊຸດ ດັ່ງເຊັ່ນນັກຮ້ອງສາວຄົນນີ້ “ປູ ວາດສະໜາ” ຜູ້ຂ້າເລີ່ມຮູ້ຈັກ ແລະ ຕິດຕາມຜົນງານຂອງນາງມາຕັ້ງແຕ່ທ້າຍໆປີ 2014 ກັບເພງຊຸດທຳອິດໃນຊີວິດ “ສາວບໍ່ແກ້ວແອ່ວບ່າວ” ເພງຊຸດນັ້ນແຈ້ງເກີດນາງເຕັມໂຕໃນວົງການເພງລາວໃນຖານະສິລະປິນໃໝ່…

   “ປູ ວາດສະໜາ” ເລົ່າສູ່ຟັງວ່າ ຊີວິດນີ້ບໍ່ຄາດຫວັງວ່າຈະໄດ້ມີຜົນງານເພງນໍາເພິ່ນ ເພາະເປັນຄົນຕ່າງແຂວງ ບໍ່ເຄີຍເຫັນສີແສງຂອງເມືອງໃຫຍ່ດັ່ງນະຄອນຫຼວງວຽງຈັນນີ້ຈັກເທື່ອ ..ເປັນຄົນມັກຮັກໃນການຮ້ອງເພງມາຕັ້ງແຕ່ນ້ອຍ ຊີວິດການເປັນນັກຮ້ອງກໍສືບມາຈາກຜູ້ເປັນພໍ່ທີ່ເປັນນັກຮ້ອງຂອງວົງດົນຕຣີ “ໜຸ່ມດາວເໜືອ” ທີ່ເມືອງຫ້ວຍຊາຍ ແຂວງບໍ່ແກ້ວ ຈາກການໄດ້ຊຶມຊັບກັບສຽງເພງສຽງດົນຕີ ຈິ່ງຢາກຮ້ອງເພງ ໂດຍຂຶ້ນຮ້ອງເພງຄັ້ງທຳອິດໃນຊີວິດແມ່ນໃນບຸນວັດ ຕອນນັ້ນອາຍຸໄດ້ 17 ປີ ຍັງຮຽນຢູ່ ມ.ປາຍ ຈາກນັ້ນ ກໍຮ້ອງມາເລື້ອຍໆກັບວົງດົນຕີ “ໜຸ່ມດາວເໜືອ” ເຊິ່ງຖືວ່າໄດ້ຮັບຄວາມນິຍົມພໍສົມຄວນໃນແຂວງບໍ່ແກ້ວ ຈົນມີອາຈານນັກແຕ່ງຫຼາຍຄົນຊວນມາອັດແຜ່ນ ແຕ່ກໍບໍ່ກ້າເດີນທາງມາວຽງເພາະບໍ່ຮູ້ໃຜ…ຈົນເວລາຜ່ານໄປຫຼາຍປີ ມີໂອກາດໄດ້ຮູ້ຈັກກັບ “ອາຈານ ພົນ ຮຸ່ງເພັດ” ມືອາເຣັນດົນຕີອັນດັບນຶ່ງຂອງບ້ານເຮົາ ການຮູ້ຈັກຄັ້ງນີ້ ກໍແມ່ນການຮູ້ຈັກຜ່ານທາງ “ເຟສບຸກ” ຜ່ານການໂອ້ລົມດົນເຕີບ ອາຈານ ພົນ ເກີດຄວາມສົນໃຈ ແລະ ໃນທີ່ສຸດເພິ່ນກໍຊັກຊວນເຂົ້າສູ່ການເປັນນັກຮ້ອງອາຊີບອັດແຜ່ນສຽງ.

   ຈາກມື້ນັ້ນຮອດມື້ນີ້ “ປູ ວາດສະໜາ” ມີຊື່ສຽງພົ້ນເດັ່ນຂຶ້ນຫຼາຍໃນວົງການເພງບ້ານນາລາວ ຈາກຜົນງານເພງຊຸດທຳອິດທີ່ແຈ້ງເກີດດ້ວຍເພງ “ສາວບໍ່ແກ້ວແອ່ວບ່າວ” ແລະ “ເຂົ້າຊອຍນ້ຳເກິ່ງ” ຈາກນັ້ນນາງກໍມີຜົນງານຊຸດໃໝ່ໆຕິດຕາມອອກມາຫຼາຍຊຸດຫຼາຍຮູບແບບ ເຊິ່ງຫຼັງໆມານີ້ ຈະເນັ້ນໄປໃນທາງການເອົາເພງເກົ່າມາຮ້ອງໃໝ່ ແລະ ກໍມີຄົບທຸກລົດຊາດ ທັງແນວບ້ານນາ ບ້ານນາລາວສະໄໝ ແລະ ແນວຊຶ້ງຊວນອອນຊອນ ຫຼື ແນວລຸກກຸງ ເພງແຕ່ລະເພງລ້ວນເປັນເພງດັງຄຸ້ນຫູ ສະນັ້ນ ແນ່ນອນເມື່ອບວກກັບນ້ຳສຽງທີ່ເສາະໃສມີສະເໜ່ ບວກໃສ່ໜ້າຕາຂອງນັກຮ້ອງເຂົ້າຕື່ມ ບໍ່ດັງຈະໄປໃສໄດ້ ຢາກໃຫ້ທ່ານທີ່ມັກຟັງເພງຫາຊື້ຜົນງານຂອງນາງມາຟັງລອງເບິ່ງ ນັກຮ້ອງຄົນນີ້ ຢາກຂໍແນະນຳອີ່ຫຼີ ຮັບຮອງບໍ່ຜິດຫວັງ .

 

------------------------------------------------------------------------------------------------------------------------------------------------

ທີ່ມາ:www.vtetoday.la