“ດາວດິນ ຖິ່ນຈຳພອນ” ເລັ່ງຖ່າຍທໍາ MV ເພື່ອເອົາໃຈແຟນເພງ

ພາຍຫຼັງທີ່ນັກຮ້ອງເພງບ້ານນາສຽງພິນ “ດາວດິນ ຖິ່ນຈຳພອນ” ເຈົ້າຂອງເພງທີ່ໄດ້ຍິນກັນຢູ່ທົ່ວບ້ານທົ່ວເມືອງ ເມື່ອບໍ່ດົນມານີ້ຄື “ໝໍ້ໜຶ້ງຮ້ອງ ຄືນ້ອງເອີ້ນຫາ” ເຊິ່ງເປັນເພງຮ້ອງແກ້ ຫຼື ຮ້ອງຕອບບົດເພງ “ເອີ້ນອ້າຍໃສ່ໝໍ້ໜຶ້ງ” ຂອງ “ມຸກດາວັນ ສັນຕິພອນ” ນັ້ນໄດ້ອອກຜົນງານເພງໃໝ່ ແລະ ປ່ອຍເພງຕາມຄື້ນວິທະຍຸໄປແລ້ວຄືເພງ “ບ່າວສໍ່ານ້ອຍຖືກອ່ອຍກິນ” ກໍເລີ່ມມີກະແສຕອບຮັບດີຂຶ້ນ ພ້ອມໆກັນນັ້ນ ກໍໄດ້ວາງຂາຍໃນແບບ “ແຜ່ນສຽງບໍ່ມີພາບ” (Audio CD)ໄປແລ້ວນັ້ນ ເລີຍເກີດກະແສຮຽກຮ້ອງ ແຜ່ນພາບທີ່ເປັນຄາຣາໂອເກະ ເຮັດໃຫ້ນັກຮ້ອງໜຸ່ມລູກພຣະທາດອິງຮັງຄົນນີ້ ເລັ່ງຖ່າຍທຳວີດີໂອທັນທີເພື່ອໃຫ້ທັນໃຈແຟນເພງ. “ບ່າວສໍ່ານ້ອຍຖືກອ່ອຍກິນ” ຖືເປັນ “ອັລບັ້ມ” ໃໝ່ຫຼ້າສຸດທີ່ຈະອອກສູ່ຕະຫຼາດໃນຮູບແບບແຜ່ນພາບຄາຣາໂອເກະໃນເວລາອັນໃກ້ນີ້ ຜົນງານເພງຊຸດນີ້ ຍັງແມ່ນທີມງານເກົ່າຈາກຊຸດກ່ອນ ກໍຄືທີມງານທີ່ເຄີຍສ້າງໃຫ້ “ມຸກດາວັນ ສັນຕິພອນ” ໂດ່ງດັງນັ້ນລະ ເຊິ່ງສ້າງສັນດົນຕຣີ ແລະ ບັນທຶກສຽງໂດຍອາຈານ ວາດ ວາທະສິນ ແລະ ແຕ່ງເພງກໍມີ ອາຈານ ອຸໄກ ລູກລາດອິງຮັງ ອາຈານ ວາດ ວາທະສິນ ແລະ ເສີມດ້ວຍ ໝອນນ້ອຍ ເພັດດົງເຫັນ ເພງເດັດໆທີ່ຄາດວ່າຈະສ້າງກະແສໄດ້ ກໍມີເພງ “ບ່າວສ່ຳນ້ອຍຖືກອ່ອຍກິນ” ເພງ “ດອກຍາງຫ່າງຕົ້ນ” “ປີໃໝ່ທີ່ນ້ຳຄານ” “ສຽງຂຽດຮ້ອງຟ້ອງໃຈ” “ເປັນຄົນສຸດທ້າຍອ້າຍບໍ” ແລະ ເພງ ອື່ນໆທີ່ຄັດສັນມາເຕັມ “ອັລບັ້ມ” ຄຶດວ່າ ນີ້ໜ້າຈະເປັນເພງຊູດທີ່ສົມບູນເຕີບຂອງສິລະປິນສຽງພິນ “ດາວດິນຖິ່ນຈຳພອນ” ຄົນນີ້ ປັດຈຸບັນການຖ່າຍທຳສຳເລັດແລ້ວ ແລະຍັງຢູ່ໃນຂັ້ນຕອນການຕັດຕໍ່ພາບເພື່ອໃຫ້ໄດ້ພາບງາມໆມາສູ່ສາຍຕາແຟນເພງທຸກທົ່ວໜ້າລໍຖ້າອີກຈັກໜ່ອຍເພິ່ນວ່າຊັ້ນເດ.

...........................................................................................................................................................................................

ທີ່ມາ: Vientiane today