“ຄິມ ຈອງ ອຶນ (Kim Jong Un)” ໄດ້ຮັບເລືອກຕັ້ງ ເປັນປະທານ ພັກແຮງງານ ສປປ ເກົາຫລີ !!

“ຄິມ ຈອງ ອຶນ (Kim Jong Un)” ໄດ້ຮັບເລືອກຕັ້ງ ເປັນປະທານ ພັກແຮງງານ ສປປ ເກົາຫລີ !!

ໃນວັນທີ 10 ພຶດສະພາ 2016 ນີ້ ທີ່ນະຄອນຫລວງພຽງຢາງ, ສປປ ເກົາຫລີ ໄດ້ປິດກອງປະຊຸມສະມັດຊາໃຫຍ່ ຄັ້ງທີ VII ຂອງພັກແຮງງານເກົາຫຼີເໜືອ ແລະ ໄດ້ແຕ່ງຕັ້ງໃຫ້ ທ່ານ ຄິມ ຈອງ ອຶນ (Kim Jong Un) ຜູ້ນຳສູງສຸດຄົນປັດຈຸບັນ ຂອງ ສປປ ເກົາຫລີ ເປັນປະທານພັກແຮງງານ ອີກໜຶ່ງຕຳແໜ່ງຢ່າງເປັນທາງການ.

 

ກອງປະຊຸມສະມັດຊາໃຫຍ່ ຄັ້ງທີ 7 ພັກແຮງງານຂອງ ສປປ ເກົາຫລີ ໄດ້ຈັດຂຶ້ນເປັນຄັ້ງທຳອິດ ໃນຮອບ 36 ປີ. ເຊິ່ງເປັນໂອກາດທີ່ສຳຄັນທີ່ ທ່ານ ຄິມ ຈອງ ອຶນ ຈະຮວບຮວມອຳນາດໃຫ້ເປັນປຶກແຜ່ນ ແລະ ສືບທອດຕຳແໜ່ງ ຂອງທ່ານ ຄິມ ອິນ ຊຸງ (Kim IL Sung )ເຊິ່ງເປັນຜູ້ກໍ່ຕັ້ງປະເທດ, ພ້ອມທັງເປັນປະທານາທິບໍດີ ແລະ ເປັນປະທານພັກແຮງງານ ສປປ ເກົາຫລີນຳອີກ.

 

ໃນກອງປະຊຸມດັ່ງກ່າວ, ຍັງໄດ້ໃຫ້ການຮັບຮອງຕໍ່ນະໂຍບາຍ ການເສີມສ້າງສັກກະຍະພາບດ້ານນີວເຄຼຍ ຄຽງຄູ່ໄປກັບການພັດທະນາເສດຖະກິດ ແລະ ທ່ານ ຄິມ ຈອງ ອຶນ ໄດ້ກ່າວໃນກອງປະຊຸມວ່າ:
“ລັດຖະບານພຽງຢາງ ມີຄວາມພ້ອມ ທີ່ຈະຟື້ນຟູຄວາມສຳພັນ ກັບປະເທດເພື່ອນບ້ານທາງພາກໃຕ້ ເພື່ອແກ້ໄຂຄວາມເຂົ້າໃຈຜິດ ແລະ ຄວາມບໍ່ໄວ້ວາງໃຈທີ່ເຄີຍມີຕໍ່ກັນ” ພ້ອມທັງເປີດເຜີຍແຜນພັດທະນາເສດຖະກິດຂອງປະເທດ ໃນອີກ 5 ປີຂ້າງໜ້າ.

Cr : Pathedlao Lao