“ຄວາຍເຖິກໃຫຍ່” ເພງໃໝ່ຂອງໜຸ່ມສັນຕິ ຈະໃຫຍ່ຊໍ່າໃດລອງໄປຟັງເບິ່ງພ້ອມກັນ

       ຄວາຍເຖິກໃຫຍ່ ເພງລູກທົ່ງບ້ານນາຈັງຫວະເຮຮາມ່ວນຊື່ນ ເຊິ່ງເປັນຜົນງານໃໝ່ຫຼ້າສຸດຂອງໜຸ່ມສັນຕິກອນ ສີວິໄລ ຫຼືໜຸ່ມສັນຕິ ໂຄສົກ-ພິທີກອນ-ດີເຈຫຼາກຫຼາຍຄວາມສາມາດທີ່ໄດ້ຫັນມາຈັບໄມຮ້ອງເພງກັບຄ້າຍທີເຄຊາວລາວ ເຊິ່ງຜົນງານເພງດັ່ງກ່າວກໍເປັນຊິງເກິລທີສອງ ຕໍ່ຈາກຜົນງານເພງ ຜູ້ຊາຍເກືອບຫຼໍ່ ທີ່ໜຸ່ມສັນຕິໄດ້ຝາກໄວ້ເມື່ອປີທີ່ຜ່ານມາ.

         ໜຸ່ມສັນຕິໄດ້ກ່າວວ່າ ສຳລັບເພງຄວາຍເຖິກໃຫຍ່ນີ້ເປັນອີກຜົນງານໜຶ່ງທີ່ຕົນເອງຕັ້ງໃຈຢ່າງເຕັມທີ່ ໂດຍໄດ້ເຂົ້າຫ້ອງອັດ ແລະຖ່າຍທຳເອັມວີເມື່ອເດືອນທີ່ຜ່ານມາ ພ້ອມທັງມີການນຳເນື້ອຮ້ອງທຳນອງໄປສະເໜີແກ່ພະແນກຖະແຫຼງຂ່າວນະຄອນຫຼວງເພື່ອຮັບປະກັນວ່າຜົນງານເພງແມ່ນໄດ້ຜ່ານການພິຈາລະນາຈາກຂັ້ນເທິງຮຽບຮ້ອຍ ເຊິ່ງໄດ້ເລີ່ມປ່ອຍທາງຢູທູບ ແລະວິທະຍຸເມື່ອວັນທີ 14 ພະຈິກ ແລະເຜີຍແຜ່ທາງໂທລະພາບເມື່ອວັນທີ 21ພະຈິກທີ່ຜ່ານມາ.

         ປັດຈຸບັນໜຸ່ມສັນຕິເອງກໍພວມສຶກສາຢູ່ທີ່ວິທະຍາໄລຣັຕນະປີສຸດທ້າຍ, ເປັນພິທີກອນສັງກັດຢູ່ໂທລະພາບທີວີລາວ ພ້ອມທັງມີທຸລະກິດນ້ອຍໆເປັນຂອງຕົນເອງ ນັ້ນກໍຄືຮ້ານຂາຍເສື້ອຜ້າ ຮ້ານໄວລຸ້ນຊັອບ.

         ຖືເປັນອີກໜຶ່ງສິລະປິນທີ່ມີຄວາມສາມາດຫຼາກຫຼາຍເລີຍລະ! ແນວໃດກໍຂອງຝາກແຟນໆຕິດຕາມຜົນງານຂອງໜຸ່ມສັນຕິແດ່ເດີ ກັບເພງ ຄວາມເຖິກໃຫຍ່, youtube: ຄວາຍເຖິກໃຫຍ່,khauitheukyai.

ຮູບພາບຈາກ facebook: suntikone sivilay