ໝໍນິແຫຼ!!ຟໍຈູນເຊຍຜີໃຫ້ດຶງໂອບາເມຢອງເສີມທັບ

 

ຄວິນຕັນ ຟໍຈູນ ອະດີດປີກ ແມນເຊສເຕີ ຢູໄນເຕັດ ເຊຍໃຫ້ “ຜີສາດແດງ” ຮີບຊື້ ປິແອ-ເອເມີຣິກ ໂອບາເມຢອງ ດາວຍິງຂອງ ໂບຣຸສເຊຍ ດອດມຸນ ມາເສີມທັບເຊິ່ງເຊື່ອວ່າແຄ່ງຊາວກາບອງສາມາດສ້າງຄວາມແຕກຕ່າງໄດ້ແນ່ນອນ.

 

ຄວິນຕັນ ຟໍຈູນ ອະດີດປີກຄົນອາຟຣິກາໃຕ້ອອກມາສະໜັບສະໜູນໃຫ້ ແມນເຊສເຕີ ຢູໄນເຕັດ ໜຶ່ງໃນອະດີດຕົ້ນສັງກັດຂອງຕົນໃຫ້ເດີນໜ້າດຶງໂຕ ປິແອ-ເອເມີຣິກ ໂອບາເມຢອງ ກອງໜ້າຂອງ ໂບຣຸສເຊຍ ດອດມຸນ ສະໂມສອນຍັກໃຫຍ່ຂອງ ບຸນເດສລີກາ ເຢຍລະມັນມາຮ່ວມທັບ.

 

ດາວເຕະທີມຊາດກາບອງເຮັດຜົນງານໄດ້ດີນັບຕັ້ງແຕ່ຍ້າຍມາຈາກ ແຊັງ-ເອຕຽນ ເມື່ອປີ 2013 ຫຼັງຈາກທີ່ຍິງໄດ້ເຖິງ 94 ລູກຈາກການລົງຫຼິ້ນໃຫ້ ດອດມຸນ ລວມທຸກລາຍການ 156 ນັດໂດຍລະດູການນີ້ເຂົາກໍຍັງຟອມລະເບີດ ເມື່ອຍິງໄດ້ແລ້ວ 14 ປະຕູຈາກການລົງສະໜາມລວມທຸກລາຍການ.

 

ຢ່າງໃດກໍຕາມ ອະນາຄົດຂອງ ໂອບາເມຢອງ ເກີດຄວາມບໍ່ແນ່ນອນຂຶ້ນມາທັນທີຫຼັງຈາກທີ່ເຂົາຫາກໍຖືກຈັບນັ່ງໃນເກມ ຢູຟາ ແຊມປຽນ ລີກ ຮອບແບ່ງກຸ່ມຂອງກຸ່ມເອຟນັດທີ່ ດອດມຸນ ເປີດບ້ານເອົາຊະນະ ສະປອດຕິງ ລິສບອນ 1-0 ເມື່ອວັນພຸດທີ 2 ພະຈິກທີ່ຜ່ານມາ ກັບລາຍງານທີ່ວ່າເຂົາເຮັດຜິດກົດຂອງສະໂມສອນໂດຍການໄປທ່ຽວທີ່ອີຕາລີເມື່ອບໍ່ເທົ່າໃດມື້ກ່ອນໜ້ານັ້ນ ເຊິ່ງນີ້ເຮັດໃຫ້ ຟໍຈູນ ເຊຍໃຫ້ ແມນຢູ ຮີບຊື້ນັກເຕະມາຮ່ວມທີມໂດຍໄວ.

 

“ຂ້ອຍມັກ ໂອບາເມຢອງ ຂອງ ດອດມຸນ ເຂົາທັງໄວ ແລະ ຍິງປະຕູໄດ້ ນັ້ນເປັນສິ່ງທີ່ເຮົາຕ້ອງການແຕ່ກໍແນ່ນອນວ່າເຮົາກໍມີບັກນ້ອຍໆ ມາຄັສ ແຣສຝອດ ທີ່ມີຄຸນສົມບັດແບບນັ້ນຄືກັນ ຖ້າເຮົາຈະດຶງໃຜທີ່ສ້າງຄວາມແຕກຕ່າງໄດ້ມາຮ່ວມທີມແລ້ວນັ້ນມັນກໍຕ້ອງເປັນເຂົາ ເພາະເຂົາສ້າງຄວາມແຕກຕ່າງໄດ້” ຟໍຈູນ ລະບຸ.