ໝາກຂຽບ ຫມາກໄມ້ຂ້າງຮົ້ວ ກິນຊ່ວຍຫຼຸດຄວາມສ່ຽງຫອບຫືດ ເລືອດຈາງ ແລະ ຫຼຸດຄໍເລດເຕີຣອນ

ໝາກຂຽບ ເປັນແຫຼ່ງລວມຂອງວິຕາມິນ C, ວິຕາມິນບີ 6 ແລະ ແຮ່ທາດເຊັ່ນ: ໂພແທດຊຽມ ແລະ ແມກນີຊຽມ, ວິຕາມິນຊີ ຖືເປັນຕົວແທນໃນການຕ້ານອາການອັກເສບ ແລະ ຕ້ານອະນຸມູນອິດສະຫລະທີ່ມີຄຸນນະພາບຫລາຍຈະຊ່ວຍຫລຸດຄວາມສ່ຽງຂອງການເປັນພະຍາດຫອບຫືດ

ນອກຈາກນີ້ຍັງມີວິຕາມິນບີ 6 ຈະຊ່ວຍປ້ອງກັນການອັກເສບຂອງຫລອດລົມ ໂພແທດຊຽມ ແລະ ແມກນີຊຽມຍັງມີປະໂຫຍດຫລາຍ ແລະ ປ້ອງກັນປິ່ນປົວພະຍາດຫອບຫືດ ແມກນີຊຽມຊ່ວຍຜ່ອນຄາຍກ້າມຊີ້ນຫລອດລົມ ແລະ ຫຼອດອາຫານ ຜູ້ປ່ວຍພະຍາດຫອບຫືດຈະມີສານເຫຼົ່ານີ້ໃນລະດັບຕ່ຳ

ເບິ່ງແຍງຮັກສາຕ່ອມໄທຣອຍ
ແຮ່ທາດເຊັ່ນ ທອງແດງມີຄວາມສຳຄັນຫລາຍສຳລັບການຜະລິດຮໍໂມນໄທຣອຍ ທີ່ເອີ້ນວ່າ ໄທຣອກຊີນ ຮໍໂມນມີຫນ້າທີ່ເບິ່ງແຍງສຸຂະພາບຂອງຕ່ອມໄທຣອຍ ໝາກຂຽບມີແຮ່ທາດຊະນິດນີ້ເປັນຈຳນວນຫລາຍ

ຊ່ວຍສ້າງພະລັງງານໃຫ້ກັບຮ່າງກາຍ
ວິຕາມິນບີເປັນສານອາຫານທີ່ສາມາດຊ່ວຍປ່ຽນນ້ຳຕານໃຫ້ເປັນພະລັງງານ ການກິນໝາກຂຽບເມື່ອຮູ້ສຶກເມື່ອຍເປັນຄວາມຄິດທີ່ດີເພາະມັນເປັນແຫຼ່ງລວມຂອງວິຕາມິນບີ

ສ້າງຄວາມແຂງແຮງໃຫ້ກະດູກ
ໄດ້ຮັບການພິສູດແລ້ວວ່າເມື່ອແມກນີຊຽມມາຜະນຶກກຳລັງກັບແຄລຊຽມຈະມີປະສິດທິພາບຫລາຍໃນການເພີ່ມມວນກະດູກໃຫ້ຫນາແຫນ້ນ ແລະ ແຂງແຮງ ໝາກຂຽບມີແຮ່ທາດເຫຼົ່ານີ້ຢູ່ໃນປະລິມານທີ່ເໝາະສົມເຊິ່ງດີສຳລັບເບິ່ງແຍງສຸຂະພາບກະດູກຂອງເຮົາ

ຫລຸດລະດັບຄໍເລດເຕີຣອນ
ຫມາກໄມ້ຊະນິດນີ້ມີໄນອາຊິນ (ວິຕາມິນບີ) ເຊິ່ງມີຄວາມສາມາດໃນການປັບຫລຸດລະດັບຄໍເລດເຕີຣອນໄດ້ຢ່າງມີປະສິດທິພາບ

ປ້ອງກັນບັນຫາການຖືພາ
ກົດໂຟລິກ ຫລື ທີ່ເອີ້ນກັນວ່າ ວິຕາມິນ B9 ເປັນທີ່ຮູ້ກັນດີວ່າມີບົດບາດສຳຄັນໃນພາວະຖືພາ ມັນດີຫລາຍໂດຍສະເພາະມັນຈະຊ່ວຍປ້ອງກັນບັນຫາທໍ່ເສັ້ນປະສາດສຳລັບເດັກນ້ອຍ

ສຸຂະພາບຜົມ ແລະ ຜິວ
ໝາກຂຽບເປັນແຫຼ່ງລວມທີ່ດີຂອງວິຕາມິນ A ຈະຊ່ວຍເບິ່ງແຍງຮັກສາໃຫ້ຜົມນຸ່ມ ແລະ ມີຜິວອ່ອນເຍົາ ຄົນບູຮານນຳຊີ້ນຫມາກໄມ້ຊະນິດນີ້ມາເຮັດເປັນຄີມ ແລະ ໃຊ້ທາບໍລິເວນຜິວໜັງເພື່ອໃຊ້ຟື້ນຟູຮັກສາຜິວໜັງຂອງພວກເຂົາ

ບຳຣຸງສາຍຕາ
ວິຕາມິນເອມີຢູ່ໃນໝາກຂຽບສາມາດຊ່ວຍເບິ່ງແຍງຮັກສາສຸຂະພາບຕາ ເພາະມີຄຸນສົມບັດຂອງສານຕ້ານອະນຸມູນອິດສະຫລະ ສານຕ້ານອະນຸມູນອິດສະຫລະຈະຊ່ວຍປ້ອງກັນຈໍປະສາດຕາ ແລະ ແກ້ວຕາຈາກອະນຸມູນອິດສະຫລະທີ່ເປັນອັນຕະລາຍ

ຊ່ວຍປ້ອງກັນພະຍາດເລືອດຈາງ
ໝາກຂຽບອຸດົມໄປດ້ວຍທາດເຫຼັກ ເຊິ່ງເປັນແຮ່ທາດທີ່ມີຄວາມສຳຄັນສຳລັບການຜະລິດເຊວເມັດເລືອດແດງ ຫາກກິນໝາກຂຽບເປັນປະຈຳຈະຊ່ວຍປ້ອງກັນບໍ່ໃຫ້ເກີດພະຍາດເລືອດຈາງ