ໄອຍະການປະຊາຊົນ ຄຳມ່ວນ ປະຕິບັດໜ້າທີ່ຢ່າງມີຄຸນນະພາບ

ຂປລ.ໜ່ວຍ​ພັກອົງການ​ໄອ​ຍະ​ການ​ປະຊາຊົນ ​ແຂວງ​ຄຳ​ມ່ວນ ​​ໄດ້ຮັບຮອງ​ເປັນໜ່ວຍພັກ ເຂັ້ມແຂງ-ຮູ້ນຳພາ ຮອບດ້ານ​ແລ້ວ​ໃນ​ວັນ​ທີ 17​ ​ເດືອນກໍລະກົດນີ້ ຫລັງ​ປະຕິ​ບັດສຳ​ເລັດ​ການ​ກໍ່ສ້າງ ໜ່ວຍ​ພັກ​ຂອງ​ຕົນ​ໃນ​ປີຜ່ານມາ​.

ສະຫາຍ ​ຄຳປະກອນ ແສງດວງດີ ຫົວໜ້າຫ້ອງການບໍລິຫານ-ຈັດຕັ້ງ ອົງການ​ໄອ​ຍະ​ການ​ປະຊາຊົນ ​ແຂວງ​ຄຳ​ມ່ວນ ກ່າວ​ວ່າ: 1 ປີຜ່ານມາ,ຄະນະ​ໜ່ວຍ ​ແລະ ສະມາຊິ​ກພັກ ​ຮູ້​ນຳພາ​ພະນັກງານ​ວິຊາ​ການ​ ດຳ​ເນີນການແກ້ໄຂ ຄະດີອາຍາຂັ້ນຕົ້ນ​ໄດ້ 320 ເລືອງ, ແກ້ໄຂຄະດີອາຍາອຸທອນໄດ້ 100%, ແກ້ໄຂຄະດີແພ່ງອຸທອນ 27 ເລື່ອງ,​ ໄດ້ເຂົ້າຮ່ວມປະຊຸມສານ ​ແລະ ອື່ນໆ​ລວມທັງ ໄດ້ຮັບບັນຫາອາຊະຍາກຳ ທົ່ວແຂວງ 443 ກໍລະນີ,ຄົ້ນຄວ້າຄຳຮ້ອງ 4 ສະບັບ, ກວດກາການຈັດຕັ້ງປະຕິບັດ ຄໍາຕັດສິນ ຂອງສານເປັນປະຈຳ ແລະ ກວດ ກາຄ້າຍຄຸ້ມຂັງ-ດັດສ້າງ 12 ​ເທື່ອ. ຂະນະ​ດຽວ​ກັນ ​ກໍ​ຮູ້ນໍາພາປັບປຸງ ​ແລະ ສ້າງ​ໄດ້ບັນດາອົງການຈັດຕັ້ງແມ່ຍິງ 3 ດີ, ຊາວໜຸ່ມ 4 ບຸກ ແລະ 2 ດີ 5 ເປັນເຈົ້າຂອງກຳມະບານ, ຮູ້ນໍາພາ ປ້ອງກັນຊາດ-ປ້ອງກັນຄວາມສະຫງົບ ສາມາດຮັບປະກັນ ໄດ້ຄວາມເປັນລະບຽບຮຽບຮ້ອຍ ແລະ ຮູ້ນຳພາການປັບປຸງກໍ່ສ້າງພັກ ແລະ ພະນັກງານນຳພາ ເຊິ່ງກໍ​ສາມາດ ໄດ້ສ້າງຄວາມເປັນເອກະພາບ ແລະ ຄວາມສາມັກຄີແໜ້ນ​ແຟ້ນ.

ສະຫາຍ ໂອໄດ ສຸດາພອນ ເລຂາພັກແຂວງຄຳມ່ວນ ກ່າວ​ຫລັງມອບໃບຢັ້ງຢືນ ໜ່ວຍພັກເຂັ້ມແຂງຮູ້ນຳ ພາຮອບດ້ານເຊິ່ງ ນອກຈາກ​ໄດ້ຊົມ​ເຊີຍ ​ຜົນສຳ​ເລັດ​ການ​ ປະຕິບັດ​ໜ້າ​ທີ່​ຂອງຄະນະພັກ ແລະ ສະມາຊິກພັກ ​ແລ້ວ,ຍັງຮຽກຮ້ອງໃຫ້ຮັກສາມູນເຊຶື້ອ ແລະ ນາມມະຍົດ ນີ້ໄວ້ຕະຫລອດໄປ. ຂອບໃຈທີ່ມາ http://kpl.gov.la/detail.aspx?id=4969​