ໄຣໂອລາຢັນຊຸດຂາວເລີ່ມການເຈລະຈາດຶງປັອກບາແລ້ວ

 

ນາຍໜ້າຂອງ ພໍ ປັອກບາ ຫ້ອງເຄື່ອງໂຕເກັ່ງຂອງ ຢູເວັນຕຸດ ເຜີຍວ່າ ເຣອັນ ມາດຣິດ ໄດ້ເລີ່ມການເຈລະຈາເລື່ອງການດຶງນັກເຕະເລືອດນ້ຳຫອມແລ້ວ ຮັບວ່ານັກເຕະສຸດມັກ ຊີເນດີນ ຊີດານ ແລະ “ລາຊາຊຸດຂາວ” ຢ່າງຫຼາຍ.

 

ມິໂນ ໄຣໂອລາ ນາຍໜ້າຄົນດັງຂອງ ພໍ ປັອກບາ ກອງກາງຈອມເທັກນິກຂອງ ຢູເວັນຕຸດ ສະໂມສອນດັງຂອງ ກັນໂຊ ຊີຣີ ອາ ອອກມາຢືນຢັນວ່າ ເຣອັນ ມາດຣິດ ມະຫາອຳນາດລູກໜັງຂອງ ລາ ລີກາ ສະເປນ ໄດ້ເລີ່ມການເປີດສາກການເຈລະຈາກັບເລື່ອງການດຶງໂຕນັກເຕະໄປຮ່ວມທັບ.

 

ກ່ອນໜ້ານີ້ກອງກາງທີມຊາດຝຣັ່ງຕົກເປັນຂ່າວວ່າໄດ້ຮັບຄວາມສົນໃຈຈາກ ບາເຊໂລນາ, ເຊວຊີ ແລະ ແມນເຊສເຕີ ຊີຕີ ຫຼັງຈາກທີ່ເຮັດຜົນງານໄດ້ໜ້າປະທັບໃຈໃຫ້ກັບຕົ້ນສັງກັດ.

ຫຼ້າສຸດ ໄຣໂອລາ ກ່າວກັບ “ມາກາ” ໜັງສືພິມຊື່ດັງຂອງແດນກະທິງວ່າ “ເຮົາກຳລັງຢູ່ໃນຂັ້ນຕອນທຳອິດຂອງການເຈລະຈາ ປັອກບາ ມັກ ເຣອັນ ມາດຣິດ ກັບ ຊີດານ ແລະ ເຫັນໄດ້ວ່າຈະເປັນສິ່ງສຳຄັນໃນການຕັດສິນໃຈຂອງເຂົາ 120 ລ້ານເອີໂຣ, 140 ລ້ານເອີໂຣ? ບໍ່ວ່າ ປັອກບາ ຈະມີຄ່າໂຕເທົ່າໃດກໍຕາມ ສະໂມສອນຈະຈ່າຍເພື່ອດຶງໂຕເຂົາ”.