ໄປທີມໃດດີ!! ໝາປ່າ ເປີດເສີກໃຫຍ່ກັບສາມທີມລີກຜູ້ດີຍາດ ວິດເຊວ

 

ສື່ອ້າງ ໂຣມາ ກຽມເປີດເສິກກັບ ທັອດແນັມ ຮັອດສະເປີ, ເຊວຊີ ແລະ ແມນເຊສເຕີ ຊີຕີ ເພື່ອດຶງ ອັກເຊວ ວິດເຊວ ມິດຟິວທີມຊາດແບນຊິກຂອງ ເຊນິດ ເຊນ ປີເຕີສະເບີກ ມາຮ່ວມທີມຕອນຈົບລະດູການນີ້ ຫຼັງນັກເຕະຈະເຫຼືອສັນຍາອີກປີດຽວ.

 

“ຈັນໂລຣອສຊີ” ໂຣມາ ສະໂມສອນດັງຈາກ ກັນໂຊ ຊີຣີ ອາ ຕົກເປັນຂ່າວວ່າຕັ້ງເປົ້າດຶງ ອັກເຊວ ວິດເຊວ ກອງກາງຂອງ ເຊນິດ ເຊນ ປີເຕີສະເບີກ ທີມດັງຈາກເວທີລີກລັດເຊຍມາເສີມທັບໃນແດນກາງຊ່ວງຕະຫຼາດຊື້-ຂາຍນັກເຕະໜ້າຮ້ອນ.

ກອງກາງທີມຊາດແບນຊິກຍ້າຍມາຈາກ ເບັນຟິກາ ມາຮັບໃຊ້ ເຊນິດ ດ້ວຍຄ່າໂຕຫຼາຍກວ່າ 30 ລ້ານປອນເມື່ອປີ 2012 ແລະ ລົງສະໜາມໄປແລ້ວ 148 ນັດລວມທຸກລາຍການແຕ່ເຂົາຈະເຫຼືອສັນຍາກັບທີມອີກປີດຽວ ແລະ ທີມແດນໝີຂາວຫວັງຈະຂາຍນັກເຕະເພື່ອນຳເມັດເງິນເຂົ້າສູ່ທີມ ຂະນະທີ່ ວິດເຊວ ກໍເລັງຈະຍ້າຍທີມເພື່ອຄວາມທ້າທາຍໃໝ່ໆ ແລະ ໂຣມາ ຖືກຍົກເປັນໜຶ່ງໃນທີມເຕັງເພາະ ລູຊາໂນ ສະປັນເລັດຕິ ອະດີດນາຍໃຫຍ່ ເຊນິດ ຄຸມທັບຢູ່ ອີກທັງຍັງມີລຸ້ນໄດ້ໂຄຕາ ແຊມປຽນລີກ ໃນຖານະທີມອັນດັບສາມອີກດ້ວຍ.

 

ເຊວຊີ ເຄີຍສະແດງຄວາມສົນໃຈຢາກດຶງໂຕນັກເຕະຕອນເປີດລະດູການກ່ອນແຕ່ຕ້ອງລົ້ມເລີກແຜນເພາະ ເຊນິດ ຕັ້ງຄ່າໂຕນັກເຕະໄວ້ທີ່ 32 ລ້ານປອນ ຂະນະທີ່ ແມນເຊສເຕີ ຊີຕີ ກໍເປັນທີມທີ່ຈັບຕາເບິ່ງສະຖານະການຢູ່ເຊັ່ນກັນ ກ່ອນທີ່ຈະຫຼຸດຄວາມສົນໃຈລົງໃນຫຼາຍເດືອນຜ່ານມາ ນອກຈາກນີ້ຍັງມີ ທັອດແນັມສະເປີ ທີ່ຢາກໄດ້ໂຕນັກເຕະເຊັ່ນກັນ.