ໄດ້ 1 ພັນລ້ານປອນ!!!ໂດ້ຕໍ່ສັນຍາກັບໄນກີ້

 

ເດິຊັນ ສື່ຂອງອັງກິດລະບຸ ຄຣິສຕຽນໂນ ໂຣເນົາໂດ ຊູເປີສະຕາຂອງ ເຣອັນ ມາດຣິດ ຕໍ່ສັນຍາກັບ ໄນກີ້ ແລ້ວໂດຍທີ່ຈະເຮັດໃຫ້ເຂົາໄດ້ເງິນໄປແລ້ວເບົາໆ 1 ພັນລ້ານປອນ ແຕ່ທາງ ໄນກີ້ ຍັງບໍ່ໄດ້ຢືນຢັນວ່າເປັນຄວາມຈິງ ຫຼື ບໍ່.

 

ຄຣິສຕຽນໂນ ໂຣເນົາໂດ ດາວຍິງຄົນດັງຂອງ ເຣອັນ ມາດຣິດ ສະໂມສອນຍັກໃຫຍ່ຂອງ ລາ ລີກາ ສະເປນຕົກລົງເຊັນສັນຍາສະບັບໃໝ່ກັບ ໄນກີ້ ບໍລິສັດກິລາຊື່ດັງແລ້ວໂດຍເປັນສັນຍາທີ່ຈະເຮັດໃຫ້ເຂົາເປັນສະປອນເຊີໃຫ້ບໍລິສັດດັ່ງກ່າວຕະຫຼອດຊີວີດ ແລະ ຈະສົ່ງຜົນໃຫ້ເຂົາໄດ້ເງິນເຖິງ 1 ພັນລ້ານປອນ ຕາມການລາຍງານຂອງ ເດິຊັນ ສື່ຊື່ດັງຂອງເມືອງຜູ້ດີ.

 

“ການຮ່ວມມືກັນລະຫວ່າງ ໄນກີ້ ກັບ ໂຣເນົາໂດ ເຊິ່ງເຕັມໄປດ້ວຍຄວາມສຳເລັດນັ້ນຈະຍັງຄົງດຳເນີນຕໍ່ໄປໃນອະນາຄົດດ້ວຍສັນຍາໄລຍະຍາວສະບັບໃໝ່ ໂຣເນົາໂດ ມີປີທີ່ດີອີກ 1 ປີທັງກັບສະໂມສອນ ແລະ ທີມຊາດ ບໍ່ຕ້ອງສົງໄສເລີຍວ່າເຂົາເປັນຄົນດັງຂອງວົງການນີ້ ເຂົາເປັນຫຼາຍກວ່າແຕ່ຄົນໃນວົງການເຕະບານ ເປັນນັກກິລາທີ່ໂດ່ງດັງທີ່ສຸດໃນໂລກໂຊຊຽວມີເດຍ ແລະ ຍັງເປັນນັກກິລາທີ່ດັງທີ່ສຸດໃນໂລກອີກດ້ວຍ” ໂຄສົກຂອງ ໄນກີ້ ລະບຸ.

 

ໄນກີ້ ຍັງບໍ່ໄດ້ຢືນຢັນຢ່າງເປັນທາງການວ່າຂ່າວໃນເທື່ອນີ້ເປັນເລື່ອງແທ້ ຫຼື ບໍ່ ແຕ່ຖ້າມັນເປັນຄວາມຈິງກໍຈະຖືໄດ້ວ່າ ໂຣເນົາໂດ ໄດ້ຮັບເງິນຈາກ ໄນກີ້ ເກືອບເທົ່າກັບ ເລບຣອນ ເຈມ ນັກບາສເກັດບອນຄັນດັງເລີຍ ໂດຍທີ່ສັນຍາຂອງ ເຈມ ມີມູນຄ່າເກີນ 1 ພັນລ້ານປອນ.

 

ນອກຈາກນີ້ມັນກໍຈະເຮັດໃຫ້ ໂຣເນົາໂດ ລວຍຍິ່ງຂຶ້ນໄປອີກຫຼັງຈາກທີ່ກ່ອນໜ້ານີ້ເຂົາຫາກໍຕໍ່ສັນຍາກັບ ມາດຣິດ ຈົນຮອດປີ 2021 ແລະ ຈະໄດ້ຮັບຄ່າເມື່ອຍຫຼັງຈາກທີ່ຫັກຄ່າພາສີແລ້ວເຖິງ 500,000 ປອນຕໍ່ອາທິດ.