ໄຊຍະບູລີ ສຸມໃສ່ພັດທະນາພື້ນຖານໂຄງລ່າງເພື່ອແກ້ໄຂຄວາມທຸກຍາກ

            ພະແນກໂຍທາທິການ ແລະ ຂົນສົ່ງ ແຂວງໄຊຍະບູລີ ເຊິ່ງມີພາລະບົດບາດເປັນເສນາທິການໃຫ້ແກ່ກະຊວງ ແລະ ອົງການປົກຄອງແຂວງ ໃນການຄົ້ນຄວ້າ ຄຸ້ມຄອງ ວາງແຜນ ແລະ ຈັດຕັ້ງວຽກງານໂຍທາທິການ ແລະ ຂົນສົ່ງ ຢູ່ໃນຂອບເຂດທົ່ວແຂວງ ເປັນຕົ້ນແມ່ນການປັບປຸງ ແລະ ພັດທະນາພື້ນຖານໂຄງລ່າງດ້ານເສັ້ນທາງຄົມມະນາຄົມ-ການຂົນສົ່ງ ແລະ ການພັດທະນາຜັງເມືອງ ລະບົບນ້ຳປະປາ ສຸຂາພິບານ ສິ່ງດັ່ງກ່າວແມ່ນເອື້ອອຳນວຍໃຫ້ການຂົນສົ່ງໄປມາ ແລກປ່ຽນສິນຄ້າໃຫ້ມີຄວາມສະດວກ ວ່ອງໄວ ລະຫວ່າງເມືອງຕໍ່ເມືອງ ແລະ ແຂວງຕໍ່ແຂວງ ຈົນເຖິງອອກຕ່າງປະເທດ ທັງໝົດນັ້ນກໍເພື່ອເປັນການກະຈາຍລາຍໄດ້ໃຫ້ແກ່ນັກທຸລະກິດ ພໍ່ຄ້າຊາວຂາຍ ຕະຫລອດຮອດພໍ່ແມ່ປະຊາຊົນ ໃຫ້ມີລາຍຮັບ ກາຍເປັນຄອບຄົວທີ່ພົ້ນທຸກຍາກເທື່ອລະກ້າວ.
          ອີງຕາມການເປີດເຜີຍຕໍ່ຜູ້ສື່ຂ່າວທ້ອງຖິ່ນໃນວັນທີ 01 ທັນວາ 2016 ຜ່ານມາຂອງທ່ານ ແພງຊ້ອຍ ແພງເມືອງ ຫົວໜ້າພະແນກໂຍທາທິການ ແລະ ຂົນສົ່ງແຂວງໄຊຍະບູລີ ໄດ້ໃຫ້ຮູ້ວ່າ ໃນສົກປີ 2015-2016 ແຂວງໄຊຍະບູລີ ໄດ້ຮັບໂຄງການທັງໝົດ 107 ໂຄງການ ມີມູນຄ່າ 1.956,05 ຕື້ກີບ ມີທຶນພາຍໃນ 1.162,66 ຕື້ກີບ ທຶນຕ່າງປະເທດ 793,39 ຕື້ກີບ ເມື່ອທຽບໃສ່ແຜນການປີປະຕິບັດໄດ້ 70,68% ໃນນັ້ນ ໂຄງການກໍ່ສ້າງທຶນສາກົນຈັດຕັ້ງປະຕິບັດຢູ່ພາຍໃນແຂວງທີ່ກະຊວງໂຍທາທິການ ແລະ ຂົນສົ່ງ ຄຸ້ມຄອງໂດຍກົງມີ 6 ໂຄງການ ມູນຄ່າ 960,26 ຕື້ກີບ ທຶນພາຍໃນ 180,23 ຕື້ກີບ ທຶນຕ່າງປະເທດ 780,03 ຕື້ກີບ ໂຄງການທີ່ກະຊວງມອບໃຫ້ແຂວງຄຸ້ມຄອງມີ 15 ໂຄງການ ມູນຄ່າ 477,22 ຕື້ກີບ ໂຄງການກໍ່ສ້າງທີ່ລັດຖະບານມອບໃຫ້ແຂວງຄຸ້ມຄອງ 27 ໂຄງການ ມູນຄ່າ 364,92 ຕື້ກີບ ຜ່ານການຈັດຕັ້ງປະຕິບັດມາເຫັນວ່າບັນດາໂຄງການກໍ່ສ້າງໄດ້ສຳເລັດຈຳນວນໜື່ງເຊັ່ນ ໂຄງການກໍ່ສ້າງຂົວຂວ້າມນ້ຳຂອງເມືອງເງິນ ປາກແບງ ໂຄງການກໍ່ສ້າງຕ້ານ ກັນເຈື່ອນນ້ຳເຫືອງ ຈຸດບ້ານເໝືອງແຜ່ ເມືອງບໍ່ແຕນ ໂຄງການກໍ່ສ້າງນ້ຳປະປາ ກຸ່ມບ້ານນ້ຳຕວນ-ນາລວມ ເມືອງໄຊຍະບູລີ ໂຄງການປັບປຸງຜັງເທສະບານເມືອງໄຊຍະບູລີ ດ້ວຍລະບົບທີ່ທັນສະໄໝ ໂຄງການປັບປຸງ ອອກແບບຜັງເມືອງເທສະບານເມືອງປາກລາຍ ແລະ ເມືອງຄອບ ນອກນີ້ຍັງມີບັນດາໂຄງການທີ່ສຳຄັນພວມສືບຕໍ່ຈັດຕັ້ງປະຕິບັດ ເຊັ່ນ ໂຄງການກໍ່ສ້າງເສັ້ນທາງປູຢາງບ້ານຣວກ (ພະເຍົາ) ຫາເມືອງຄອບ ຫາບ້ານກ້ອນຕື້ນ ເມືອງປາກທາ ແຂວງບໍ່ແກ້ວ ມີຄວາມຍາວ 53,90 ກິໂລແມັດ ທຶນຂອງອົງການນິດາສຳເລັດແລ້ວ 94,64% ໂຄງການກໍ່ສ້າງທາງປູຢາງເມືອງຊຽງຮ່ອນ ຫາ ເມືອງຄອບ ມີລວງຍາວ 56 ກິໂລແມັດ ສຳເລັດແລ້ວ 91,64% ໂຄງການກໍ່ສ້າງຂົວຂວ້າມນ້ຳຂອງຈຸດບ້ານນາສັກ ເມືອງປາກລາຍ ຫາ ຄົກເຂົ້າດໍ ເມືອງຊະນະຄາມ ສຳເລັດແລ້ວ 94,36% ໂຄງການກໍ່ສ້າງຕ້ານ ກັນເຈື່ອນນ້ຳເຫືອງ ຈຸດບ້ານນາຂ່າໃຕ້ ເມືອງບໍ່ແຕນ ສຳເລັດ 27% ໂຄງການກໍ່ສ້າງຕ້ານ ກັນເຈື່ອນຈຸດນ້ຳເຫືອງ ບ້ານຈອມແກ້ວ ເມືອງແກ່ນທ້າວ ສຳເລັດ 45% ນອກຈາກການພັດທະນາພື້ນຖານໂຄງລ່າງດ້ານການບໍລິການ ຄຸ້ມຄອງພາຫະນະ ແລະ ການຂັບຂີ່ ພວກເຮົາໄດ້ຫັນເຂົ້າສູ່ການບໍລິການຜ່ານປະຕູດຽວ ເຫັນວ່າມີຄວາມສະດວກວ່ອງໄວຂຶ້ນ ໄດ້ປັບປຸງລະບົບການຄຸ້ມຄອງການຂຶ້ນທະບຽນພາຫະນະ ແລະ ການຂັບຂີ່ ດ້ວຍລະບົບໄອທີ ເຊື່ອມຕໍ່ຂໍ້ມູນກັບສູນກາງ ແລະ ສາມາດເພີ່ມໃບທະບຽນຖາວອນຂັ້ນແຂວງສຳເລັດ 3.300 ສະບັບ ແລະ ໃບຂັບຂີ່ໄດ້ 2.750 ສະບັບ.

ແຫຼ່ງຂ່າວ: ສໍານັກຂ່າວສານປະເທດລາວ.