ໄຊຍະບູລີ ກຽມຮື້ສວນກ້ວຍຫອມປ່ຽນແທນພືດໃໝ່ເພື່ອສິ່ງແວດລ້ອມ

 

   ແຂວງໄຊຍະບູລີ ເອກະພາບຢຸດເຊົາການປູກກ້ວຍຫອມພ້ອມຂຸດຮື້ສວນກວ່າ 300 ເຮັກຕາຫັນທີ່ດິນໄປປູກພືດຊະນິດໃໝ່ປອດສານເຄມີແທນເພື່ອສິ່ງແວດລ້ອມ ແລະ ສຸຂະພາບຂອງປະຊາຊົນ.

    ຕາມແຜນການແລ້ວການຂຸດຮື້ສວນກ້ວຍຢູ່ໄຊຍະບູລີຈະໃຫ້ດຳເນີນການຈັດຕັ້ງປະຕິບັດນັບແຕ່ວັນທີ 20-30 ມິຖຸນາ 2017 ໂດຍໃຫ້ແຕ່ລະບໍລິສັດຍຸບເລີກສວນປູກກ້ວຍ,

   ບໍ່ໃຫ້ຂະຫຍາຍສວນປູກກ້ວຍທັງໃຫ້ຂຸດທຳລາຍໜໍ່ກ້ວຍ ແລະ ເຫງົ້າກ້ວຍໃຫ້ໝົດເພື່ອສ້າງແຜນການປູກໄມ້ກິນໝາກທົດແທນ ຫຼື ພຶດເປັນສິນຄ້າທີ່ບໍ່ນຳໃຊ້ສານເຄມີ ແລະບໍ່ມີຜົນກະທົບຕໍ່ສິ່ງແວດລ້ອມໃນການດຳລົງຊີວິດຂອງປະຊາຊົນບັນດາເຜົ່າ.

   ເພື່ອປະຕິບັດຕາມທິດຊີ້ນຳຂອງພັກ-ລັດໃນການຕິດຕາມກວດກາສວນກ້ວຍຫອມໃນວັນທີ 24 ພຶດສະພາ 2017 ນິ້ຄະນະກຳມະການຂອງເມືອງ ແລະ ແຂວງ ໄຊຍະບູລີ ໄດ້ລົງກວດກາຢຸດຕິການປູກກ້ວຍຫອມຢູ່ເມືອງໄຊຍະບູລີທີ່ສົ່ງຜົນກະທົບຕໍ່ສິ່ງແວດລ້ອມທີ່ສວນກ້ວຍບໍລິ ສັດວັນຟົງ ແລະ ບໍລິສັດຢົງຟາ. ຊຶ່ງນຳ ໂດຍທ່ານ ບຸນເສັງ ວົງສະນິດ ຮອງເຈົ້າ ເມືອງໄຊຍະບູລີຜູ້ຊີ້ນຳວຽກງານເສດຖະກິດ, ໂດຍມີບັນດາຮອງຫົວໜ້າພະແນກການຂອງແຂວງ, ສະມາຊິກສະພາປະຊາຊົນແຂວງ, ກຳມະການພັກເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

    ໃນການລົງກວດກາຢຸດຕິການປູກກ້ວຍຄັ້ງນີ້ແມ່ນປະຕິບັດຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີສະບັບເລກທີ 483/ຫສນຍ. ກສສ, ລົງວັນທີ 27 ມີນາ 2017 ເລື່ອງສະພາບການປູກກ້ວຍຢູ່ 6 ແຂວງພາກເໜືອ ແລະ ແຂວງພາກກາງ, ອີງຕາມຄຳສັ່ງຂອງທ່ານເຈົ້າແຂວງໄຊຍະບູລີ ເລກທີ 077/ຈຂ.ຊຍ, ລົງວັນທີ 23 ພຶດສະພາ 2017 ກ່ຽວກັບການແກ້ໄຂສະພາບການປູກກ້ວຍຢູ່ເມືອງໄຊຍະບູລີ ແລະ ເມືອງພຽງ ແຂວງໄຊຍະບູລີ, ອີງຕາມກົດໝາຍວ່າດ້ວຍການປົກຄອງທ້ອງຖິ່ນແຫ່ງ ສປປ ລາວ ສະບັບປັບປຸງ ເລກທີ 68/ສພຊ, ລົງວັນທີ 14 ທັນວາ 2015, ໝວດທີ IV ມາດຕາ 20 ວ່າ ດ້ວຍສິດ ແລະ ໜ້າທີ່ຂອງເຈົ້າແຂວງ, ເຈົ້າຄອງນະຄອນຫຼວງ, ຊຶ່ງບໍລິສັດທີ່ມາ ປູກກ້ວຍຢູ່ເມືອງໄຊຍະບູລີໃນເນຶ້ອທີ່ທັງ ໝົດ 360 ກວ່າເຮັກຕາ, ໃນນີ້ມີບໍລິສັດວັນຟົງ 164   ກວ່າເຮັກຕາ, ບໍລິສັດຢົງ ຟາ 133 ກວ່າເຮັກຕາ ແລະ ບໍລິສັດບໍ່ ແກ້ວຢາງພາລາ 69 ກວ່າເຮັກຕາ.

Cr: http://sedthakid.la