ໄກ່ເດືອຍຫັກ!!ເຄນສໍ່ນັ່ງຍາວ 2 ເດືອນ

 

ເດິ ກາດ້ຽນ ສື່ດັງຂອງອັງກິດເຜີຍ ແຮຣີ້ ເຄນ ດາວຍິງຂອງ ທັອດແນມ ຮັອດສະເປີ ອາດຈະໝົດສິດລົງຊ່ວຍຕົ້ນສັງກັດເຖິງ 2 ເດືອນຈາກການບາດເຈັບຂໍ່ຂາເຊິ່ງໃນຊ່ວງນັ້ນ “ໄກ່ເດືອຍທອງ” ມີຄິວຕ້ອງຟາດແຂ່ງກັບ ແມນເຊສເຕີ ຊີຕີ, ເລສເຕີ ຊີຕີ ແລະ ອາເຊນອນ.

 

ແຮຣີ້ ເຄນ ກອງໜ້າຂອງ ທັອດແນມ ຮັອດສະເປີ ສະໂມສອນດັງຂອງ ພຣີເມຍລີກ ອາດຈະໝົດສິດລົງສະໜາມຊ່ວຍຕົ້ນສັງກັດເປັນເວລາປະມານ 2 ເດືອນຫຼັງຈາກທີ່ມີອາການບາດເຈັບບໍລິເວນຂໍ່ຂາ ຕາມການລາຍງານຂອງ ເດິ ກາດ້ຽນ ສື່ກິລາຊື່ດັງອັງກິດ.

 

ດາວຍິງທີມຊາດອັງກິດໄດ້ຮັບບາດເຈັບຈາກຈັງຫວະທີ່ປະທະກັບ ປາປີ ຢີໂລໂບຢີ ກອງຫຼັງຂອງ ຊັນເດີແລນ ໃນເກມລີກທີ່ຕົ້ນສັງກັດຊະນະ ແມວດຳ 1-0 ເມື່ອວັນອາທິດທີ່ຜ່ານມາຈົນຖືກຫາມເປ ເຊິ່ງບໍ່ດົນມານີ້ ເມົາຣິຊິໂອ ໂອເຊັດຕິໂນ້ ຜູ້ຈັດການທີມ “ໄກ່ເດືອຍທອງ” ກໍຢືນຢັນວ່າ ເອັນຂໍ່ຂາຂອງ ເຄນ ມີອາການບໍ່ດີປານໃດແຕ່ບໍ່ໄດ້ບອກວ່າເຂົາຕ້ອງພັກດົນປານໃດ.

 

ທັງນີ້ຖ້າວ່າຕ້ອງຍາວຮອດ 2 ເດືອນຕາມການລາຍງານແທ້ກໍໝາຍຄວາມວ່າເຂົາຈະອົດລົງຊ່ວຍທີມໃນເກມສຳຄັນຫຼາຍນັດເຊັ່ນເກມລີກກັບ ແມນເຊສເຕີ ຊີຕີ, ເລສເຕີ ຊີຕີ ແລະ ອາເຊນອນ ເປັນຕົ້ນ.