ໃຫ້ມັນແລ້ວ!!ໂຄຣເອັນເກກຽມເຈລະຈາເລື່ອງເວນເກີ


ຟຸດບອນລອນດອນ ສື່ລາຍໜຶ່ງເຜີຍວ່າ ສະແຕນ ໂຄຣເອັນເກ ຜູ້ຖືຮຸ້ນລາຍໃຫຍ່ຂອງ ອາເຊນອນ ຈະມາລົມເລື່ອງອະນາຄົດກັບ ອາແຊນ ເວນເກີ ນາຍໃຫຍ່ຂອງທີມໃນອີກ 2 ອາທິດຫຼັງຈາກນີ້ໂດຍເຊື່ອກັນວ່າ ເວນເກີ ຈະໄດ້ສັນຍາອອກໄປອີກ 1 ປີ.

 

ສະແຕນ ໂຄຣເອັນເກ ຜູ້ຖືຮຸ້ນລາຍໃຫຍ່ຂອງ ອາເຊນອນ ສະໂມສອນຍັກໃຫຍ່ຂອງ ພຣີເມຍລີກ ຈະເດີນທາງໄປທີ່ປະເທດອັງກິດໃນອີກ 2 ອາທິດຫຼັງຈາກນີ້ເພື່ອທີ່ຈະເຈລະຈາເລື່ອງອະນາຄົດຂອງ ອາແຊນ ເວນເກີ ຜູ້ຈັດການທີມ ຕາມການລາຍຂອງ ຟຸດບອນລອນດອນ ສື່ວົງການລູກໜັງລາຍໜຶ່ງ.

 

ຈົນຮອດຕອນນີ້ ເວນເກີ ຍັງບໍ່ໄດ້ຕັດສິນໃຈເລີຍວ່າຈະຢູ່ກັບທີມຕໍ່ໄປ ຫຼື ບໍ່ຫຼັງຈາກທີ່ເຂົາຈະໝົດສັນຍາກັບທີມທັນທີທີ່ສິ້ນສຸດລະດູການນີ້ເຊິ່ງ ໂຄຣເອັນເກ ມີຄິວເຂົ້າມາເບິ່ງເກມ ເອຟເອ ຄັບ ນັດຊິງຊະນະເລີດທີ່ ອາເຊນອນ ຈະດວນກັບ ເຊວຊີ ວັນເສົາທີ 25 ພໍດີ ແລະ ເຂົາກໍກຳນົດໃຫ້ການເຈລະຈາກັນເປັນພາລະກິດສຳຄັນ.

 

ເປັນທີ່ເຊື່ອກັນວ່າຜົນລັບຂອງການເຈລະຈາກໍຄື ເວນເກີ ຈະຕໍ່ສັນຍາກັບທີມ 1 ປີເພື່ອທີ່ເຂົາຈະໄດ້ມີໂອກາດອຳລາທີມແບບສວຍງາມ ຫຼັງຈາກທີ່ “ປືນໃຫຍ່” ມີຜົນງານຕົກຕຳ່ຫຼາຍປີ ແຕ່ຖ້າວ່າເປັນແບບນັ້ນມັນກໍອາດຈະເຮັດໃຫ້ແຟນບານຂອງທີມບໍ່ພໍໃຈເຊັ່ນກັນ ເພາະໄລຍະຫຼັງໆມີແຟນບານ ອາເຊນອນ ທີ່ຢາກໃຫ້ກຸນຊືຄົນດັງລົງຈາກຕຳແໜ່ງຫຼາຍຂຶ້ນ.

ບົດຄວາມໃຫມ່ໆ