ໃຈເຢັນໆແນ່ກະໄດ້ບ່າວ ດຽວສິເຈັບອີກ

ໃຈເຢັນໆແນ່ບ່າວ!! ແດນນຽວ ສະເຕີຣິດ ຫົວຫອກເລືອດຜູ້ດີ ຢືນຢັນພ້ອມກັບມາລົງຊ່ວຍທີມຫຼັງຈາກເຊົາຈາກອາການບາດເຈັບ ແລະ ສົມບູນເຕັມທີ່ ຍອມຮັບວ່າຕື່ນເຕັ້ນໃນການໄດ້ຮ່ວມງານກັບ ເຈີເກັນ ຄັອບ ນາຍໃຫຍ່ຄົນໃໝ່ເລືອດເຢຍລະມັນ ໝັ້ນໃຈວ່າຈະມີຊ່ວງເວລາທີ່ດີຮ່ວມກັນ.

ແດນນຽວ ສະເຕີຣິດ ກອງໜ້າຂອງ ລີເວີພູ ສະໂມສອນຊັ້ນນຳຈາກ ພຣີເມຍລີກ ອັງກິດ ຢືນຢັນວ່າ ຕົນເອງກັບມາຟິດເຕັມທີ່ແລ້ວ ແລະ ພ້ອມລົງສະໜາມໃນເກມທີ່ທີມບຸກໄປຟາດແຄ່ງກັບ “ເຮືອໃບສີຟ້າ” ແມນ ຊິຕີ້ ວັນເສົາທີ 21 ພະຈິກນີ້ ຫຼັງຈາກທີ່ລົງຊ້ອມໄດ້ເຕັມຮູບແບບແລ້ວ.

ສະເຕີຣິດ ຕ້ອງນັ່ງພັກອີກຮອບຫຼັງຈາກເຈັບຫົວເຂົ່າກ່ອນໜ້າເກມລີກນັດບຸກໄປສະເໝີ ສະເປີ 0-0 ທີ່ສະໜາມ ໄວ ຮາດເລນ ເມື່ອເດືອນຕຸລາທີ່ຜ່ານມາ ເຊິ່ງເປັນເກມທຳອິດທີ່ ເຈີເກັນ ຄັອບ ນາຍໃຫຍ່ເຢຍລະມັນ ລົງຄຸມທີມຢ່າງເປັນທາງການ ແລະ ເຮັດໃຫ້ຫົວຫອກເລືອດຜູ້ດີ ລົງຫຼິ້ນເປັນຕົວຈິງໃນ ພຣີເມຍລີກ ໄປພຽງ 10 ນັດ ນັບຕັ້ງແຕ່ເລີ່ມເປີດລະດູການທີ່ແລ້ວ.

ຢ່າງໃດກໍຕາມ ດາວຍິງເຜີຍຜ່ານໜັງສືພິມ “ລີເວີພູ ເອັກໂຄ” ວ່າ “ຂ້ອຍສົມບູນ ແລະ ພ້ອມທີ່ຈະລົງແລ້ວ ມັນກຳລັງເປັນໄລຍະເວລາທີ່ດີສຳລັບໂຕຂ້ອຍ ມັນດີພາຍໃຕ້ການເຮັດວຽກກັບນາຍຄົນໃໝ່ ຂ້ອຍກັບມາຊ້ອມໄດ້ 2 ມື້ແລ້ວ ແລະ ຊ້ອມຕັ້ງແຕ່ເຂົາມາຄຸມທີມມື້ທຳອິດ”.

“ມັນເປັນເວລາທີ່ໜ້າຕື່ນເຕັ້ນ ແລະ ຂ້ອຍກໍມ່ວນໃນການຮ່ວມງານກັບເຂົາ ລວມທັງວິທີການສ້າງທີມຂອງເຂົາ ມັນສຳຄັນທີ່ພວກເຂົາຈະຕ້ອງເຂົ້າໃຈວ່າ ເຂົາຕ້ອງການໃຫ້ພວກເຮົາເຮັດຫຍັງແນ່” ສະເຕີຣິດ ຖິ້ມທ້າຍ.

.....................................................................................................................................................