ໂຮງພິມຫນັງສືພິມປະຊາຊົນເປີດສາຂາທີ 2 ຢູ່ພາກໃຕ້ຄາດຈະກວມເອົາລູກຄ້າ 5 ແຂວງ

ໂຮງພິມຫນັງສືພິມປະຊາຊົນເປີດນໍາໃຊ້ສາຂາແຫ່ງທີ 2 ຢູ່ແຂວງຈໍາປາສັກ ຫວັງດຶງດູດລູກຄ້າໃນ 4 ພາກໃຕ້ (ຈໍາປາສັກ, ສາລະວັນ, ເຊກອງ, ອັດຕະປື) ແລະ 1 ແຂວງພາກກາງ (ສະຫວັນນະເຂດ) ລວມທັງປະຫຍັດເວລາ ແລະ ຫລຸດຜ່ອນຕົ້ນທຶນການຜະລິດ.
ພິທີເປີດນໍາໃຊ້ໂຮງພິມຫນັງສືພິມປະຊາຊົນຢ່າງເປັນກາງການໄດ້ຈັດຂຶ້ນໃນທີ 20 ກຸມພາ 2016 ນີ້ ຢູ່ບ້ານບົວ, ເມືອງໂພນທອງ, ແຂວງຈໍາປາສັກ ໂດຍເປັນກຽດເຂົ້າຂອງ ທ່ານ ສຈ.ດຣ.ບໍ່ແສງຄໍາ ວົງດາລາ ລັດຖະມົນຕີວ່າການກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວ, ມີ ທ່ານ ດຣ. ບຸນຖອງ ດີວິໄຊ ເຈົ້າແຂວງຈໍາປາສັກ, ບັນດາລັດຖະມົນຕີຊ່ວຍວ່າການ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ໃນໂອກາດດັ່ງກ່າວນີ້, ທ່ານ ສຈ. ດຣ. ບໍ່ແສງຄໍາ ວົງດາລາ ລັດຖະມົນຕີວ່າການກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວໄດ້ກ່າວວ່າ: ຈຸດປະສົງຂອງການກໍ່ສ້າງໂຮງພິມຫນັງສືພິມແຫ່ງທີ 2 ນີ້ເພື່ອປະຕິບັດຕາມແນວທາງນະໂຍບາຍຂອງພັກ ທັງແມ່ນເປົ້າຫມາຍລວມຂອງລັດຖະບານລາວເພື່ອເປັນການເສີມຂະຫຍາຍກໍາລັງແຮງຂອງພາຫະນະຂອງສື່ມວນຊົນຕ່າງໆ ໂດຍສະເພາະຫນັງສືພິມປະຊາຊົນ ເປັນສຽງຂອງສູງກາງພັກ ເພື່ອເຮັດໃຫ້ຂໍ້ມູນຂ່າວສານໄດ້ລົງສູ່ທົ່ວທຸກທ້ອງຖິ່ນນັບມື້ນັບກວ້າງຂວາງ.

ທ່ານ ທອງລິດ ຫລ່ຽມໄຊຍະຈັກ ຮອງຫົວໜ້າບັນນາທິການໜັງສືພິມປະຊາຊົນກ່າວວ່າ: ໂຮງພິມຫນັງສືພິມແຫ່ງທໍາອິດແມ່ນຕັ້ງຢູ່ນະຄອນຫລວງວຽງຈັນໂດຍຜ່ານມາ ພວກເຮົາເພີ່ງພາອາໃສໂຮງພິມແຫ່ງດັ່ງກ່າວບວກໃສ່ກັບສະຕິປັນບາແບບມີຫົວຄິດປະດິດສ້າງຮູ້ໝູນໃຊ້ເຂົ້າການເຄື່ອນໄຫວບໍລິການຈັດພິມໜັງສືິພິມປະຊາຊົນ, ໜັງສືພິມປະເທດລາວ, ວາລະສານ, ບັນດາສື່ສິ່ງພິມ ແລະ ອື່ນໆໃນຂອບເຂດທົ່ວປະເທດເພື່ອຮັບໃຊ້ໜ້າທີ່ການເມືອງ, ໂຄສະນາເຜີຍແຜ່ ແລະ ນໍາສະເໜີແນວທາງນະໂຍບາຍຂອງພັກ-ລັດ, ລະບຽບກົດໝາຍ, ລັດຖະທໍາມະນູນ, ແຜນພັດທະນາເສດຖະກິດ-ສັງຄົມຢ່າງຖືກຕ້ອງ ແລະ ສອດຄ່ອງກັບເງື່ອນໄຂການປ່ຽນແປງແຕ່ລະໄລຍະເຮັດໃຫ້ແຂກພາຍໃນ-ຕ່າງປະເທດ ແລະ ປະຊາຊົນລາວບັນດາເຜົ່າສາມາດເຂົ້າເຖິງຂໍ້ມູນຂ່າວສານທີ່ເປັນປະໂຫຍດເລົ່ານັ້ນ. ສະນັ້ນການຂະຫຍາຍມາຕັ້ງຢູ່ແຂວງຈໍາປາສັກກໍເພື່ອຂະຫຍາຍຖານການຜະລິດທີ່ສາມາດສະໜອງລູກຄ້າ, ຜູ້ອ່ານໃຫ້ມີຄວາມສະດວກວ່ອງໄວທັນເຫດການຂຶ້ນກວ່າເກົ່າ ແລະ ປະຫຍັດເວລາ.
ທ່ານ ຮອງຫົວໜ້າບັນນາທິການໜັງສືພິມປະຊາຊົນກ່າວຕື່ມອີກວ່າ: ການທີ່ປະເທດຂອງພວກເຮົາໄດ້ເຂົ້າຮ່ວມປະຊາຊົນອາຊຽນຢ່າງເປັນທາງການໃນທ້າຍປີຜ່ານມາຍິ່ງເຮັດໃຫ້ພວກເຮົາຕ້ອງເຮັດວຽກໝັກຂຶ້ນກວ່າເກົ່າເພື່ອມຸ່ງເນັ້ນໃສ່ຄຸນນະພາບ ແລະ ການບໍລິການທີ່ດີກວ່າ ເນື່ອງຈາກວ່າຕະຫລາດບໍລິການສື່ສິ່ງພິມຈະຫຍາຍຕົວແບບກ້າວກະໂດດທີ່ມີການແຂ່ງຂັນສູງໃນສ່ວນແບ່ງການຕະຫລາດ. ພາບ-ຂ່າວ: ປ໋ອງ

Pathedlao Lao