ໂອແອມຕັ້ງເປົ້າດຶງເດປາຍເສີມທັບ

 

ສື່ຕີຂ່າວ ໂອລິມປິກ ມາກແຊ ຕັ້ງເປົ້າດຶງ ເມມຟິສ ເດປາຍ ມິດຟິວຂອງ ແມນເຊສເຕີ ຢູໄນເຕັດ ໄປເສີມທັບໃນເກມບຸກແຕ່ວ່າອາດຈະເປັນງານຍາກເນື່ອງຈາກວ່ານັກເຕະຢາກຢູ່ກັບ “ຜີສາດແດງ” ຕໍ່ໄປ.

 

ເມມຟິສ ເດປາຍ ປີກຂອງ ແມນເຊສເຕີ ຢູໄນເຕັດ ສະໂມສອນຍັກໃຫຍ່ຂອງ ພຣີເມຍລີກ ຕົກເປັນຂ່າວວ່າກຳລັງຕົກເປັນເປົ້າໝາຍການເສີມທັບໃນແດນກາງຂອງ ໂອລິມປິກ ມາກແຊ ທີມດັງຈາກເວທີ ລີກແອັງ ຝຣັ່ງ.

 

ກອງກາງທີມຊາດໂຮນລັງຍ້າຍມາຈາກ ພີເອສວີ ໄອໂຮເຟັນ ມາຮັບໃຊ້ “ຜີສາດແດງ” ເມື່ອປີ 2015 ແຕ່ວ່າເຮັດຜົນງານໄດ້ບໍ່ຄຸ້ມຄ່າຫົວ ຂະນະທີ່ລະດູການນີ້ໄດ້ລົງຫຼິ້ນພຽງ 126 ນາທີພາຍໃຕ້ການຄຸມທັບຂອງ ໂຊເຊ ມູຣິນໂຢ ແລະ ໄດ້ເປັນຕົວຈິງພຽງເກມດຽວໃນນັດທີ່ຊະນະ ນອດແຮມຕັນ ທາວ 3-1 ໃນລາຍການ ອີເອຟແອວ ຄັບ ຮອບ 3.

 

ຫຼ້າສຸດ “ເລີ 10 ສະປອດ” ສື່ກິລາຊື່ດັງຂອງເມືອງນໍ້າຫອມອ້າງວ່າ “ໂອແອມ” ສົນໃຈໃນໂຕ ເດປາຍ ແລະ ຍື່ນຂໍ້ສະເໜີຂໍຊື້ມາຮ່ວມທີມແລ້ວ ຫຼັງຈາກທີ່ທີມຖືກເທັກໂອເວີໂດຍ ແຟຣັງ ແມັກຄອດ ນັກທຸລະກິດຄົນອາເມລິກາ ແຕ່ວ່າການດຶງນັກເຕະອາດມີບັນຫາເນື່ອງຈາກວ່ານັກເຕະຢາກຢູ່ກັບ ແມນຢູ ຕໍ່ໄປ.