ໂອເຄ..ຜີຂະຫຍາຍສັນຍາລິນກາດອີກ 4 ປີ

 

“ເດິ ຊັນ” ຕີຂ່າວ ໂຊເຊ້ ມູຣິນໂຢ້ ນາຍໃຫຍ່ ແມນເຊສເຕີ້ ຢູໄນເຕັດ ສາມາດຕົກລົງກ່ຽວກັບການຂະຫຍາຍສັນຍາອີກ 4 ປີ ແລະ ປະເຄນຄ່າເມື່ອເພີ່ມເປັນ 2 ເທົ່າກັບ ເຈັດຊີ້ ລິນກາດ ປີກເລືອດຜູ້ດີແລ້ວ ຫຼັງຈາກທີ່ນາຍໜ້ານັກເຕະກັບ ຜີສາດແດງ ມີການເຈລະຈາກັນຕະຫຼອດໄລຍະ 3 ອາທິດທີ່ຜ່ານມາ.

 

ໂຊເຊ້ ມູຣິນໂຢ້ ຜູ້ຈັດການທີມ ແມນເຊສເຕີ້ ຢູໄນເຕັດ ສະໂມສອນຍັກໃຫຍ່ຈາກ ພຣີເມຍລີກ ຕົກເປັນຂ່າວວ່າໄດ້ບັນລຸຂໍ້ຕົກລົງເລື່ອງການຕໍ່ສັນຍາສະບັບໃໝ່ກັບ ເຈັດຊີ້ ລິນກາດ ອອກໄປຈົນຮອດປີ 2020 ພ້ອມກັບໃຫ້ຄ່າເມື່ອຍເພີ່ມເປັນ 2 ເທົ່າຈຳນວນ 50,000 ປອນຕໍ່ອາທິດ.

 

ລິນກາດ ອະດີດກອງກາງທີມຊາດອັງກິດຊຸດອາຍຸບໍ່ຕຳ່ກວ່າ 21 ປີ ຍັງເຫຼືອສັນຍາໃນຖິ່ນ ໂອນ ທຣາຟເຟິດ ອີກ 2 ປີ ແລະ ຕ້ອງການຢູ່ຮັບໃຊ້ທີມຕໍ່ໄປອີກດົນ ຫຼັງຈາກກ້າວຂຶ້ນມາຈາກທີມເຍົາວະຊົນຂອງສະໂມສອນ.

 

ຫຼ້າສຸດ “ເດິ ຊັນ” ສື່ຂອງອັງກິດຕີຂ່າວວ່າ ລິນກາດ ຕົກລົງຂະຫຍາຍສັນຍາໃໝ່ອີກ 4 ປີແລ້ວເຊິ່ງຈະໄດ້ຮັບຄ່າເມື່ອຍເພີ່ມເປັນ 2 ເທົ່າຢູ່ທີ່ປະມານອາທິດລະ 50,000 ປອນຫຼັງຈາກທີ່ ແມນຢູ ກັບນາຍໜ້າຂອງນັກເຕະໄດ້ສົນທະນາກັນຕະຫຼອດ 3 ອາທິດທີ່ຜ່ານມາ ແລະ ມູຣິນໂຢ້ ກໍໄດ້ໄຟຂຽວໃຫ້ຕໍ່ສັນຍານັກເຕະໄດ້ໃນຊ່ວງ 2 ອາທິດທີ່ຜ່ານມາ.

 

ດ້ານແຫຼ່ງຂ່າວຂອງ ແມນຢູ ໄດ້ອ້າງວ່າ “ມັນມີການສົນທະນາກັນລະຫວ່າງສະໂມສອນ ແລະ ນາຍໜ້າຂອງນັກເຕະໃນຊ່ວງບໍ່ເທົ່າໃດອາທິດມານີ້ ມັນບໍ່ມີບັນຫາ ແລະ ທາງຝ່າຍກົດໝາຍຂອງສະໂມສອນກໍພຽງແຕ່ຈັດການເລື່ອງເອກະສານທັງໝົດໃຫ້ແລ້ວ”.