ໂອຣິກີ ຕັ້ງເປົ້າກັບມາລົງສະໜາມໃຫ້ໄດ້ອີກໃນລະດູການນີ້

 

ດີວອກ ໂອຣິກີ ກອງໜ້າດາວລຸ້ງຂອງ ລີເວີພູ ຕັ້ງເປົ້າເຊົາເຈັບກັບມາລົງຫຼິ້ນກ່ອນຈົບລະດູການນີ້ ແລະ ມີຄວາມເປັນໄປໄດ້ທີ່ຈະເກີດຂຶ້ນ ຫຼັງຈາກທີ່ຕ້ອງພັກຍາວຈາກອາການບາດເຈັບຂໍ່ຂາຕັ້ງແຕ່ເກມທີ່ທະລົ່ມ ເອເວີຕັນ 4-0 ເມື່ອເດືອນເມສາທີ່ຜ່ານມາ.

 

ດີວອກ ໂອຣິກີ ດາວຍິງອະນາຄົດໄກຂອງ ລີເວີພູ ທີມດັງຈາກ ພຣີເມຍລີກ ອອກມາເປີດເຜີຍວ່າຕົນເອງຕັ້ງເປົ້າໝາຍທີ່ຈະເຊົາຈາກອາການບາດເຈັບກັບມາລົງສະໜາມກ່ອນຈົບລະດູການນີ້ໃຫ້ໄດ້.

 

ກອງໜ້າທີມຊາດແບນຊິກບາດເຈັບມາຈາກເກມທີ່ຊະນະ ເອເວີຕັນ ເມື່ອວັນທີ 20 ເມສາທີ່ຜ່ານມາ ແລະ ຄາດກັນວ່າເຂົາຈະຕ້ອງພັກຍາວ 6 ອາທິດເຊິ່ງຈະເຮັດໃຫ້ບໍ່ໄດ້ລົງຊ່ວຍທີມໃນເກມທີ່ເຫຼືອຂອງລະດູການ ຢ່າງໃດກໍຕາມຍັງເຫຼືອອີກແຕ່ 11 ມື້ເກມລີກກໍຈະຈົບລົງ.

 

ແຕ່ເຊື່ອກັນວ່າ ໂອຣິກີ ມີແວວໄດ້ລົງສະໜາມໃນເກມ ຢູຟາ ຢູໂຣປາ ລີກ ຮອບຊິງຊະນະເລີດຖ້າວ່າ “ຫົງແດງ” ສາມາດພິກສະຖານະການໄດ້ໃນເກມພົບກັບ ບີຢາເຣອັນ ນັດທີສອງທີ່ ແອນຟິວ ວັນພະຫັດນີ້.

 

ເມື່ອຖືກຖາມວ່າ ຈະໄດ້ກັບມາຫຼິ້ນອີກໃນລະດູການນີ້ ຫຼື ບໍ່ ອະດີດຫົວຫອກ ລີດ ກ່າວຜ່ານເວັບໄຊຢ່າງເປັນທາງການຂອງສະໂມສອນວ່າ “ແນ່ນອນ ຂ້ອຍເຊື່ອແບບນັ້ນ ເປົ້າໝາຍຂອງຂ້ອຍແມ່ນການກັບມາໃຫ້ໄວທີ່ສຸດເທົ່າທີ່ມັນຈະເປັນໄປໄດ້ ຂ້ອຍຢາກກັບມາລົງສະໜາມ ຂ້ອຍຄິດວ່າມັນເປັນໄປໄດ້”.

 

ທັງນີ້ ກ່ອນທີ່ອາການບາດເຈັບຈະເຮັດວຽກ ໂອຣິກີ ຂຶ້ນມາເປັນຕົວເລືອກໃນແດນໜ້າພາຍໃຕ້ການນຳທັບຂອງ ເຈີເກັນ ຄັອບ ແລະ ຍິງໄປແລ້ວ 5 ລູກຈາກການລົງຫຼິ້ນ 5 ນັດ.