ໂຣມາເຈັບເສັ້ນ!!ມາໂນລາສນັ່ງຕັ່ງ 2 ອາທິດ

 

ຄອສຕາສ ມາໂນລາສ ກອງຫຼັງຕົວຫຼັກຂອງ ອາແອສ ໂຣມາ ມີອັນຕ້ອງພັກຍາວປະມານ 2 ອາທິດເພາະວ່າກຳລັງຈະເຂົ້າຮັບການຜ່າຕັດດັງ ໂດຍທີ່ຈະອົດລົງຊ່ວຍທີມໃນ 2 ເກມຂ້າງໜ້ານີ້.

 

ຄອສຕາສ ມາໂນລາສ ເຊັນເຕີແບັກຂອງ ອາແອສ ໂຣມາ ສະໂມສອນດັງຂອງ ກັນໂຊ ຊີຣີ ອາ ອີຕາລີຈຳເປັນຕ້ອງນັ່ງຕັ່ງເປັນເວລາ 2 ອາທິດເນື່ອງຈາກວ່າກຽມຕົວທີ່ຈະເຂົ້າຮັບການຜ່າຕັດຮັກສາອາການບາດເຈັບທີ່ດັງ ຕາມການລາຍງານຂອງ ສະກາຍ ສະປອດ ອີຕາລຽນ ສື່ຊັ້ນນຳແດນກະໂລນີເມື່ອວັນຈັນທີ່ຜ່ານມາ.

 

ຫຼັງຈາກທີ່ມີການກວດອາການກໍມີການຢືນຢັນວ່າ ມາໂນລາສ ຈຳເປັນທີ່ຈະຕ້ອງເຂົ້າຮັບການຜ່າຕັດ ແລະ ຈະຕ້ອງໃຊ້ເວລາພັກຟື້ນປະມານ 2 ອາທິດເຊິ່ງນັ້ນເຮັດໃຫ້ກອງຫຼັງທີມຊາດເກຣັກອາຍຸ 25 ປີອົດລົງຊ່ວຍຕົ້ນສັງກັດໃນເກມ ຢູຟາ ຢູໂຣປາ ລີກ ນັດທີ່ຈະພົບກັບ ອອສເຕຣຍ ວຽນນາ ວັນພະຫັດນີ້ລວມເຖິງເກມລີກກັບ ໂບໂລນຢາ ວັນອາທິດທີ 6 ພະຈິກ.

 

ຖືວ່າເປັນຂ່າວທີ່ເຮັດໃຫ້ ລູຊາໂນ ສະເປົາເລັດຕິ ນາຍໃຫຍ່ຂອງ “ໝາປ່າເຫຼືອງ-ແດງ” ເຈັບເສັ້ນບໍ່ໜ້ອຍເພາະວ່າຕອນນີ້ ໂທມັສ ແຟມາເລັນ ກັບ ອະເລສຊານໂດຣ ຟໍເລັນຊີ ຕາງກໍພາກັນມີບັນຫາບາດເຈັບລົບກວນເຊັ່ນກັນ.