ໂມດຣິດ ຢືນຢັນ ຕົ້ນສັງກັດບໍ່ສົນໃຈກັບຜົນການແຂ່ງຂັນຂອງ ບາເຊໂລນາ

ລູກ້າ ໂມດຣິດ ເພເມກເກີ້ “ລາຊາຊຸດຂາວ” ຢືນຢັນຕົ້ນສັງກັດບໍ່ສົນໃຈຜົນງານຂອງ ບາເຊໂລນາ ທີ່ພິກລັອກເສຍໄຊໃຫ້ກັບ ເຊວຕ້າ ບີໂກ້ ກໍຕາມ “ລາຊາຊຸດຂາວ” ຕ້ອງມີສະມາທິກັບຕົນເອງເທົ່ານັ້ນ ພ້ອມກັບຍົກຍ້ອງ ຄາຣິມ ເບັນເຊມາ ຫົວຫອກຂອງທີມ ຟອມການຫຼິ້ນສຸດຍອດ ຫຼັງຈາກທີ່ເໝົາຍິງໃຫ້ຕົ້ນສັງກັດຊະນະ ແອັດເລຕິກ ບິບາວ ເມື່ອວັນພຸດທີ່ຜ່ານມາ.

ລູກ້າ ໂມດຣິດ ກອງກາງ “ລາຊາຊຸດຂາວ” ເຣອັນ ມາດຣິດ ສະໂມສອນຍັກໃຫຍ່ແຫ່ງ ລາ ລີກາ ສະເປນ ອອກມາຢືນຢັນເມື່ອວັນພະຫັດທີ 24 ກັນຍາວ່າ ຕົ້ນສັງກັດຂອງຕົນເອງບໍ່ສົນໃຈກັບຜົນການແຂ່ງຂັນຂອງ “ເຈົ້າບຸນທຸ່ມ” ບາເຊໂລນາ ຄູ່ປັບທີ່ສຳຄັນແຕ່ຢ່າງໃດ ເຖິງຈະຮູ້ສຶກວ່າເຊີໄພຣກໍຕາມທີ່ຍອດທີມກາຕາລັນປລາໄຊແບບພິກລັອກ.

 

ຄາຣິມ ເບັນເຊມາ ເໝົາຍິງ 2 ປະຕູຊ່ວຍໃຫ້ທີມເອົາຊະນະ ແອັດເລຕິກ ບິບາວ 2-1 ພ້ອມກັບຂຶ້ນໄປເປັນຈ່າຝູງ ລາ ລີກາ ຫຼັງຈາກທີ່ ບາເຊໂລນາ ເສຍແບບເໜືອຄວາມຄາດໝາຍໃຫ້ກັບ ເຊວຕ້າ ບີໂກ້ 1-4 ເມື່ອວັນພຸດທີ່ຜ່ານມາ ແລະ ພາຍຫຼັງການແຂ່ງຂັນ ໂມດຣິດ ອອກມາຊີ້ແຈງວ່າ ຜົນການແຂ່ງຂັນຂອງ “ເຈົ້າບຸນທຸ່ມ” ບໍ່ໄດ້ສຳຄັນຕໍ່ “ລາຊາຊຸດຂາວ” ແຕ່ຍອມຮັບວ່າຕົກໃຈກັບຜົນການແຂ່ງຂັນທີ່ອອກມາ.

“ເຮົາຕ້ອງເບິ່ງໂຕເອງ ແລະ ບໍ່ຕ້ອງໄປກົງວົນກັບທີມອື່ນໆ ແຕ່ເຮົາກໍຕົກໃຈຄືກັນກັບຄວາມໝົດສະພາບຂອງ ບາເຊໂລນາ” ໂມດຣິດ ກ່າວ.

ນັກເຕະທີມຊາດ ໂຄເອເຊຍ ຍັງໄດ້ອອກມາກ່າວຍົກຍ້ອງ ເບັນເຊມາ ທີ່ເຮັດຜົນງານໄດ້ດີໃນເກມນີ້ ຫຼັງຈາກທີ່ນັກເຕະເລືອດນ້ຳຫອມ ຍິງໄປ 5 ປະຕູ ຈາກ 4 ເກມໃນ ລາ ລີກາ ລະດູການນີ້.

“ຄາຣິມ ເປັນນັກຊັ້ນດີ ສຸດຍອດ ເຂົາຢູ່ໃນກຸ່ມ 2 ຫຼື 3 ນັກເຕະທີ່ດີທີ່ສຸດໃນໂລກ ເຮົາໂຊກດີຫຼາຍທີ່ມີເຂົາຢູ່ໃນທີມຂອງເຮົາ” ໂມດຣິດ ກ່າວ.

ນອກຈາກນີ້ ອະດີດນັກເຕະ ຂອງ ທັອດແນມຮັອດສະເປີ ຍັງໄດ້ກ່າວຊົມເຊີຍ ມາເຕໂອ ໂຄວາຊິດ ກອງກາງເພື່ອນຮ່ວມຊາດທີ່ລົງຫຼິ້ນໃຫ້ທີມເຖິງ 89 ນາທີໃນເກມນັ້ນເຊັ່ນດຽວກັນ.

“ໂຄວາຊິດ ເປັນນັກເຕະທີ່ເກັ່ງ ເຂົາມີຄວາມສຸກຫຼາຍ ແລະ ເຂົາພະຍາຍາມຢ່າງເຕັມທີ່” ເພເມກເກີ້ໂຕເກັ່ງກ່າວ.

......................................................................................................................................................