ໂປເຊັດຕິໂນລັອກເປົ້າສອຍອິສໂກເສີມທັບເດືອນມັງກອນນີ້

 

ສື່ປ່ອຍຂ່າວ ເມົາຣິຊິໂອ ໂປເຊັດຕິໂນ ນາຍໃຫຍ່ຂອງ ທັອດແນມ ຮັອດສະເປີ ລັອກເປົ້າລ່າໂຕ ອິສໂກ ເພເມກເກີຂອງ ເຣອັນ ມາດຣິດ ມາຮ່ວມທີມໃນເດືອນມັງກອນນີ້ເຖິງວ່າຕ້ອງທ້າດວນກັບ ບາເຢິນ ມິວນິກ ທີ່ມີຂ່າວກັບນັກເຕະເຊັ່ນກັນ ຫຼັງຈາກທີ່ນັກເຕະຍັງເປັນຕົວສຳຮອງເປັນສ່ວນໃຫຍ່ໃນລະດູການນີ້.

 

ທັອດແນມ ຮັອດສະເປີ ສະໂມສອນຍັກໃຫຍ່ຂອງ ພຣີເມຍລີກ ຕົກເປັນຂ່າວວ່າວາງແຜນໂນ້ມນ້າວໃຈໃຫ້ ອິສໂກ ກອງກາງໂຕບຸກຂອງ ເຣອັນ ມາດຣິດ ທີມດັງຂອງ ລາ ລີກາ ຍ້າຍມາຮ່ວມງານກັນໃນຖິ່ນ ໄວ ຮາດເລນ ຊ່ວງເປີດຕະຫຼາດຊື້ຂາຍຮອບສອງເດືອນມັງກອນນີ້.

 

ເມົາຣິຊິໂອ ໂປເຊັດຕິໂນ ຜູ້ຈັດການທີມ “ໄກ່ເດືອຍທອງ” ຕ້ອງການດຶງ ກອງກາງເລືອດກະທິງມາຮ່ວມທີມຕັ້ງແຕ່ຊ່ວງຊໍາເມີແຕ່ວ່າ ອິສໂກ ເລືອກຢູ່ກັບ “ລາຊາຊຸດຂາວ” ຕໍ່ໄປແຕ່ວ່າໃນເວລານີ້ ອິສໂກ ອາດຈະຢາກຍ້າຍອອກຈາກທີມແລ້ວ ຫຼັງຈາກທີ່ຕົກເປັນຕົວສໍາຮອງ ແລະ ໄດ້ລົງຫຼິ້ນໃຫ້ “ລາຊາຊຸດຂາວ” ພຽງແຕ່ 9 ເກມເທົ່ານັ້ນໃນລະດູການນີ້.

 

ຂະນະດຽວກັນ ບາເຢິນ ມິວນິກ ກໍເປັນອີກທີມໜຶ່ງທີ່ສະແດງຄວາມສົນໃຈຢາກຈະດຶງ ອິສໂກ ເພາະຍັງບໍ່ຕິດ ຄັບໄທ ຈາກ ຢູຟາ ແຊມປຽນລີກ ແລະ ຈະຫຼິ້ນໃນຮອບນັອກເອົ້າໄດ້ຖ້າວ່າ ຊີເນດີນ ຊີດານ ນາຍໃຫຍ່ຂອງ “ລາຊາຊຸດຂາວ” ບໍ່ສົ່ງລົງຫຼິ້ນໃນ 2 ນັດສຸດທ້າຍໃນຮອບແບ່ງກຸ່ມ ແຕ່ວ່າຫຼ້າສຸດ “ຊັນເດ ເອັກສ໌ເພຣສ” ສື່ຂອງອັງກິດອ້າງວ່າ ໂປເຊັດຕິໂນ ວາງ ອິສໂກ ເປັນເປົ້າໝາຍເສີມທັບລະດັບຕົ້ນໆໃນຊ່ວງຕະຫຼາດໜ້າໜາວນີ້.