ໂນເລ້ສອກດ້ຽງຖອນໂຕໄຊນ້າໂອເພັ້ນ

 

ໂນວັກ ໂຢໂຄວິກ ນັກເທັນນິດມືໜຶ່ງຂອງໂລກຖອນໂຕຈາກລາຍການ ໄຊນ້າ ໂອເພັ້ນ ທີ່ຈະມີຄິວລົງຕີອາທິດໜ້າຮຽບຮ້ອຍເພາະວ່າມີອາການເຈັບສອກ ຂະນະທີ່ ແອນດີ້ ມາຣີ້ ຍັງບໍ່ແນ່ນອນເຊັ່ນກັນ.

 

ໂນວັກ ໂຢໂຄວິກ ຍອດນັກເທັນນິດເຊີເບຍມືໜຶ່ງຂອງໂລກຂໍຖອນໂຕອອກຈາກການແຂ່ງຂັນລາຍການ ໄຊນ້າ ໂອເພັ້ນ ທີ່ນະຄອນປັກກິ່ງປະເທດຈີນ ເຊິ່ງມີກຳນົດເລີ່ມຕົ້ນຂຶ້ນໃນວັນຈັນທີ 3 ຕຸລານີ້ຮຽບຮ້ອຍ ເນື່ອງຈາກວ່າມີການບາດເຈັບທີ່ຂໍ່ສອກ.

 

ນັກຫວດອາຍຸ 29 ປີມີບັນຫາທັງເລື່ອງຟອມການຫຼິ້ນ ແລະ ສຸຂະພາບມາຕະຫຼອດຊ່ວງຊຳເມີ ຫຼັງຈາກທີ່ຕົກຮອບຕັ້ງແຕ່ເວັນທັງໃນ ວິມເບີດັ້ນ ແລະ ໂອລິມປິກ ກ່ອນທີ່ຈະມາຖອນໂຕອອກຈາກການແຂ່ງຂັນລາຍການ ເວສເທິນ ແອນ ເຊົາເທິນ ໂອເພັ້ນ ທີ່ເມືອງຊິນຊິນເນຕິ ລັດໂອໄຮໂອ້ ປະເທດອາເມລິກາ.

 

ເຖິງວ່າ ໂຢໂຄວິກ ສາມາດຜ່ານເຂົ້າຮອດຮອບຊິງລາຍການ ແກຣນສະແລມ ຢູເອສ ໂອເພັ້ນ ເມື່ອປະມານສອງອາທິດກ່ອນແຕ່ຫຼ້າສຸດຝ່າຍຈັດການແຂ່ງຂັນລາຍການ ໄຊນ້າ ໂອເພັ້ນ ຢືນຢັນວ່າ ໂຢໂຄວິກ ໄດ້ຂໍຖອນໂຕອອກຈາກການແຂ່ງຂັນຮຽບຮ້ອຍແລ້ວ.

 

ນອກຈາກນີ້ ແອນດີ້ ມາຣີ້ ນັກເທັນນິດມື 2 ຂອງໂລກກໍອາດຈະຂໍຖອນໂຕເຊັ່ນກັນຫຼັງຈາກມີອາການເຈັບຕົ້ນຂາມາຈາກການຊ່ວຍທີມຊາດສູ້ເສິກ ເດວິສ ຄັບ ກຸ່ມ ເວິນ ກຣຸບ ຮອບຮອງຊະນະເລີດທີ່ສະຫະລາຊາອານາຈັກເສຍໃຫ້ກັບອາເຈັນຕິນາ 2-3 ເມື່ອ 10 ມື້ກ່ອນ.