ໂຕະແທງບານຖືກກົດໝາຍຍົກເອເວີຕັນເຕັງໄດ້ມາຕາ

 

ໂຕະພະນັນເມືອງຜູ້ດີຍົກ ເອເວີຕັນ ເປັນຕົວເຕັງທີ່ຈະດຶງ ຮວານ ມາຕາ ກອງກາງໂຕບຸກຂອງ ແມນເຊສເຕີ ຢູໄນເຕັດ ໃນຊ່ວງຊຳເມີນີ້ດ້ວຍລາຄາແທງ 2 ຈ່າຍ 5 ເຫດ ຟາຮັດ ໂມຊິຣີ ເຈົ້າຂອງໃໝ່ຂອງ ເອເວີຕັນ ພ້ອມທຸ່ມເງິນຈຳນວນຫຼາຍເພື່ອດຶງໂຕໃຫ້ໄດ້.

 

“ສະກາຍເບັດ” ບໍລິສັດພະນັນຖືກກົດໝາຍຂອງປະເທດອັງກິດຍົກໃຫ້ ເອເວີຕັນ ສະໂມສອນດັງຂອງ ພຣີເມຍລີກ ເປັນທີມເຕັງທີ່ຈະໄດ້ໂຕ ຮວານ ມາຕາ ເພເມກເກີຂອງ ແມນເຊສເຕີ ຢູໄນເຕັດ ເນື່ອງຈາກວ່າ ຟາຮັດ ໂມຊິຣີ ເຈົ້າຂອງທີມຄົນໃໝ່ຂອງ ເອເວີຕັນ ພ້ອມທຸ່ມເງິນກ້ອນໃຫຍ່ເພື່ອດຶງໂຕໃຫ້ໄດ້ໃນຊ່ວງເປີດຕະຫຼາດຊື້ຂາຍນັກເຕະຊ່ວງຊຳເມີນີ້.

 

ເຊື່ອກັນວ່າ ໂຊເຊ ມູຣິນໂຢ ຜູ້ຈັດການທີມ ຜີສາດແດງ ອາດຈະອະນຸຍາດໃຫ້ກອງກາງເລືອດກະທິງທີ່ໄດ້ຮັບຄ່າເມື່ອຍກັບຕົ້ນສັງກັດອາທິດລະ 170,000 ປອນຍ້າຍອອກຈາກ ໂອນ ທຣາຟເຟິດ ຂະນະດຽວກັນ ໂມຊິຣີ ຫາກໍເຂົ້າໄປເທັກໂອເວີ ເອເວີຕັນ ເມື່ອຊ່ວງຕົ້ນປີນີ້ອີກທັງໄດ້ດຶງເອົາ ໂຣເນົາ ຄູມັນ ມາຄຸມທີມແລ້ວແຕ່ກໍຍັງບໍ່ໄດ້ເຊັນສັນຍານັກເຕະໃໝ່ມາເສີມທັບແຕ່ຢ່າງໃດ ແລະ ກໍມີຂ່າວລືກັນວ່າພວກເຂົາກຳລັງຈັບຕາເບິ່ງ ມາຕາ ຢູ່.

 

ຫຼ້າສຸດ “ສະກາຍເບັດ” ໃຫ້ ເອເວີຕັນ ເປັນເຕັງໜຶ່ງທີ່ຈະໄດ້ໂຕທີ່ອັດຕາຄ່າຕໍ່ລອງ 5-2 (ແທງ 2 ຈ່າຍ 5 ບໍ່ໄລ່ຕົ້ນທຶນ) ສ່ວນ ເປເອັດເຊ, ບາເຊໂລນາ ແລະ ແອັດເລຕິໂກ ມາດຣິດ ເປັນເຕັງ 2, 3 ແລະ 4 ຢູ່ທີ່ລາຄາ 4-1, 8-1 ແລະ 10-1 ຕາມລຳດັບ.