ໂດ້ຢັນບໍ່ເຄີຍດ່າເພື່ອນຮ່ວມທັບວ່າກາກກວ່າຕົນເອງ

 

ໂຣນັນໂດ ດາວເຕະ ເຣອັນ ມາດຣິດ ຢືນຢັນບໍ່ເຄີຍດ່າເພື່ອນຮ່ວມທີມ “ລາຊາຊຸດຂາວ” ມີຝີຕີນດ້ອຍກວ່າຕົນເອງຫຼັງເກມເສຍ ແອັດ ມາດຣິດ ຄາບ້ານ ບອກວ່າສື່ເອົາຄຳເວົ້າໄປຕີຄວາມໝາຍຜິດເອງ ແທ້ແລ້ວໝາຍເຖິງອາການບາດເຈັບຫຼາຍລາຍຂອງໝູ່ທີ່ເຮັດໃຫ້ທີມບໍ່ສາມາດຢູ່ໃນຟອມທີ່ດີທີ່ສຸດ.

 

ໂຣນັນໂດ ປີກຈາກ ເຣອັນ ມາດຣິດ ສະໂມສອນດັງໃນ ລາ ລີກາ ອອກມາຢືນຢັນວ່າບໍ່ໄດ້ຈວກເພື່ອນຮ່ວມທີມວ່າ ຫຼິ້ນໄດ້ບໍ່ເຕັມສັກກະຍະພາບເທົ່າກັບຕົນເອງຫຼັງຈາກທີ່ທັບ ລາຊາຊຸດຂາວ ເປີດຮັງເສຍໃຫ້ກັບ ແອັດເລຕິໂກ ມາດຣິດ 0-1 ໃນເກມລີກນັດດາບີແມັດເມື່ອວັນເສົາທີ່ຜ່ານມາໂດຍຊີ້ແຈງວ່າ ສື່ເອົາຄຳເວົ້າຂອງຕົນໄປຕີຄວາມໝາຍຜິດເອງ.

 

ຫຼັງຈົບເກມດັ່ງກ່າວນັ້ນສື່ໄດ້ເຜີຍຄຳສຳພາດຂອງດາວຍິງເລືອດປັອກຕຸຍການທີ່ກ່າວຢ່າງຫົວເສຍວ່າ “ຖ້າທຸກຄົນຫຼິ້ນໄດ້ລະດັບດຽວກັບຂ້ອຍ ເຮົາອາດຈະນຳເປັນຈ່າຝູງແລ້ວກໍໄດ້ຖ້າທີມບໍ່ໄດ້ຫຼິ້ນດ້ວຍຟອມທີ່ດີທີ່ສຸດ ມັນກໍເປັນເລື່ອງຍາກທີ່ຈະປະສົບຜົນສຳເລັດໃນລາຍການທີ່ຕ້ອງແຂ່ງຂັນກັນຍາວໆແບບນີ້”.

 

ຢ່າງໃດກໍຕາມລ່າສຸດ ໂຣນັນໂດ ເຜີຍວ່າ “ຄວາມເຫັນຂອງຂ້ອຍຖືກຕີຄວາມໝາຍຜິດໄປຫຼັງຈົບເກມ ຂ້ອຍບໍ່ໄດ້ເວົ້າວ່າຕົນເອງດີກວ່າຄົນອື່ນ ຂ້ອຍເວົ້າເຖິງເລື່ອງອາການບາດເຈັບ ທີມຕ້ອງເສຍນັກເຕະສຳຄັນຫຼາຍຄົນເພາະບາດເຈັບຄື ເປເປ້, ແກເລັດ ເບວ, ຄາຣິມ ເບັນເຊມາ ແລະ ມາເຊໂລ ເຊິ່ງເຮັດໃຫ້ເຮົາບໍ່ໄດ້ຢູ່ໃນລະດັບປົກກະຕິ ຂ້ອຍໃຫ້ຄວາມເຄົາລົບກັບເພື່ອນຮ່ວມທີມທຸກຄົນ ຂ້ອຍບໍ່ເຄີຍດ່າພວກເຂົາ ຂ້ອຍບໍ່ເຄີຍຄິດວ່າຕົນເອງເຈັ໋ງກວ່າຄົນອື່ນແຕ່ຢ່າງໃດ”.

 

ດ້ານ ເຊຄິໂອ ຣາມອສ ກອງຫຼັງ “ລາຊາຊຸດຂາວ” ອອກມາປົກປ້ອງ ໂຣນັນໂດ ວ່າ “ຖ້າຈະມີໃຜຈັກຄົນຮູ້ຈັກ ໂຣນັນໂດ ດີນັ້ນແມ່ນຂ້ອຍ ຂ້ອຍບໍ່ຄິດວ່າເຂົາຕ້ອງການດ່າເພື່ອນຮ່ວມທີມ ຂ້ອຍຄິດວ່າ ມັນອາດຖືກຕີຄວາມໝາຍໄປໃນທາງທີ່ຜິດ ໃນຖານະກັບຕັນທີມຂ້ອຍພູມໃຈກັບເຮັດວຽກຂອງເພື່ອນຮ່ວມທີມ”.