ໂຊກຮ້າຍຮັບວັນເກີດ!!ຕັອດຕິ ຕ້ອງພັກ 1 ເດືອນຈາກອາການບາດເຈັບ

ດວງແຕກຮັບວັນເກີດແທ້ໆ ສຳລັບ ຟຣານເຊສໂກ້ ຕັອດຕິ ກັບຕັນທີມ ໂຣມາ ຫຼັງຈາກທີ່ຕົ້ນຂາດ້ຽງຈາກເກມທີ່ບຸກທຸບ ຄາບີ້ ສົ່ງຜົນໃຫ້ຕ້ອງພັກ 1  ເດືອນ ເຊັ່ນດຽວກັບ ເອດິນ ເຊໂກ້ ຫົວຫອກຊາດ ບອສເນຍ ສ່ວນ ເຊດູ ເກອິຕ້າ ພັກປະມານ 2 ອາທິດ.

ຟຣານເຊສໂກ້ ຕັອດຕິ ກອງໜ້າກັບຕັນທີມ ໂຣມາ ສະໂມສອນຊັ້ນນຳແຫ່ງ ລີກ ອີຕາລີ ໝົດສິດລົງສະໜາມດົນເຖິງ 1 ເດືອນ ຫຼັງຈາກຮັບການບາດເຈັບຕົ້ນຂາຈາກເກມທີ່ຖະລົ່ມ ຄາບີ້ 5-1 ທີ່ສະໜາມ ສະຕາດິໂອ ໂອລິມປິໂກ້ ເມື່ອວັນເສົາທີ 26 ກັນຍາທີ່ຜ່ານມາ.

ຕັອດຕິ ຕ້ອງໂຊກຮ້າຍຮັບວັນຄ້າຍວັນເກີດຂອງຕົນເອງທີ່ອາຍຸຄົບ 39 ປີ ໃນວັນອາທິດທີ 27 ກັນຍາ ຫຼັງຈາກລົງສະໜາມໄປແທນ ເອດິນ ເຊໂກ້ ໃນນາທີ 46 ແຕ່ຢູ່ໃນສະໜາມໄດ້ພຽງ 6 ນາທີເທົ່ານັ້ນກໍຖືກປ່ຽນໂຕອອກ ເພາະເຈັບຕົ້ນຂາໂດຍຕອນທຳອິດຢ້ານກັນວ່າອາດຈະຕ້ອງໄດ້ພັກຍາວເຖິງ 2 ເດືອນ ແຕ່ລ່າສຸດມີລາຍງານຜົນການກວດວ່າ ຈະພັກປະມານ 1 ເດືອນ.

ສ່ວນ ເຊໂກ້ ທີ່ບາດເຈັບຫົວເຂົ່າ ຕ້ອງພັກປະມານ 1 ເດືອນເຊັ່ນກັນ ຂະນະທີ່ ເຊດູ ເກອິຕ້າ ກອງກາງຈອມຂະຫຍັນທີ່ບາດເຈັບຕົ້ນຂາຈະພັກປະມານ 2 ອາທິດ.

..........................................................................................................................................